Leyeqkuna tapukuyanqan

¿Imanirtan 2 Samuel 21:7 a 9 ninqanchö ‘Saúlpa willkan Mefi-bosetta’ David llakipanqanta nin y tsëpitaqa imanirtan Mefiböset-ta wanutsiyänampaq mandakunqanta nin?

Këchö ninqanta alli rikëkur pipis mana leyiptinqa, itsapis tsënö tapukunman. Peru ishkaq nunakunam Mefiböset jutiyoqqa kayarqan; tsë witsan ima pasakunqanta mas alli entiendir imata yachakunqantsikta rikärishun.

Israelpa reynin Saulqa, qanchis ollqu wamrayoq y ishkë warmi wamrayoqmi karqan. Mayor kaqpa jutinqa, Jonatanmi karqan. Tsëpitanam, Rizpä jutiyoq warminchö, Mefiböset jutiyoq wamran yurirqan. Peru Jonatanpapis, Mefiböset jutiyoq wamranqa kapurqanmi. Tsëmi Saulpaqa, juk wamran y juk willkan, Mefiböset jutiyoq kayarqan.

¿Peru imanirtan atskaq nunakunata wanutsiyänampaq David entregarqan? Rey Saulqa, Israelchö täraq Gabaon nunakunatam, chikir qallëkurqan y ushakätsitam munarqan. Tsë nunakunapitaqa atskaqtatsun wanutsirqan. Tsëta ruranqanqa alläpa mana allim karqan. Josuë kawanqan witsanmi, Gabaon nunakunawan yamë kawakuyänampaq Israelchö precisaq nunakuna y Josuë juk acuerduta rurashqa kayarqan (Jos. 9:3-27).

Rey Saul kawanqan witsampis, tsë conträtuqa välikarqanllaran. Peru pëqa, tsë conträtuta mana respetashpam Gabaon nunakunata ushakätsita procurarqan. Tsëmi Saul y kastankunaqa, ‘Gabaón nunakunata mana ankupashpa wanutsiyashqanpita’ jutsayoq kayarqan (2 Sam. 21:1). Rey këman David chäriptinmi, kawëkaq Gabaon nunakunaqa Saul imata ruranqanta willayarqan. Tsëmi Davidqa, Saul tsëta ruranqampita y israelïtakunata Jehovä bendicinampaq imata ruranampaq kaqta pëkunata tapurqan. Pëkunaqa, llapankunata ushakätsiyänampaq patsätseq rey Saulpa qanchis wamrankunata entreganampaqmi mañakuyarqan y manam qellëtatsu (Nüm. 35:30, 31). Tsëmi Davidqa, pëkuna niyanqanta rurarqan (2 Sam. 21:2-6).

Tsë witsampaqqa, Saulwan Jonatanqa guërrachömi wanushqana kayarqan. Peru Jonatanpa wamran Mefibösetqa kawëkarqanllaran. Pëqa wamrallaraq këkaptin cuidaqnin warmi kachapakunqampitam lisiädu quedarqan. Tsëmi Gabaon nunakunata awilun Saul wanutsiptin yanapakurqantsu. Y Davidqa, Jonatanwanmi juk acuerduta rurashqa karqan, llapan familianta cuidanampaq y familianchömi Mefibösetpis këkarqan (1 Sam. 18:1; 20:42). Bibliachömi Davidpaq kënö willakun: “TEYTA DIOSPA shutinchö Jonatánwan pactu rurashqanta cumplirmi Jonatánpa tsurin y Saúlpa willkan Mefi-bosettaqa David munarqantsu Gabaón nunakuna wanutsiyänanta” (2 Sam. 21:7).

Tsënö kaptimpis, Gabaon nunakuna mañakuyanqantam Davidqa rurarqan. Pëqa, Saulpa ishkan wamrankunata y pitsqa willkankunatam Gabaon nunakunata entregarqan. Tsëchömi, Mefiböset jutiyoq wamrampis këkarqan (2 Sam. 21:8, 9). Davidqa tsëta rurarninmi, Saulpa jutsanrëkur israelïtakuna maldecishqa kayanqampita librarqan.

Tsëpin pasakunqampitaqa këtam yachakuntsik: Saulpa ishkan wamrankuna y pitsqa willkankuna culpannaq kashqa kayaptinqa, Jehoväqa mana allipam rikanman karqan pëkunata wanutsiyanqanta. Leyninchömi, teytankuna rurayanqampita wamrankuna mana wanuyänampaq cläru neq. Jina tsë leyllachömi kënö neq: “Jutsa ruraq kaqta wanutsiyanki” (Deut. 24:16). Tsëmi cläru rikätsikun, Saulpa ishkan wamrankuna y pitsqaq willkankuna, Gabaon nunakunata ushakätsiyänampaq imanöllapis yanapakushqa kayanqanta. Tsëmi tsë qanchis nunakunaqa, mana allita rurayanqampita wanuyarqan.

Tsëqa, ¿imatataq yachakuntsik tsëpin pasakunqampita? Manam pipis mandashqa kayanqanta pensarnin o nirnin mana allita ruranqampitaqa tsapäkunmantsu. Proverbius libruchömi kënö nin: “Imanö kawanqëkitapis shumaq käyikï. Nänipita mana yaqashpa ëwaqnö imëpis allillata rurë. Mana allikunataqa ama rurëtsu. Jutsa rurëpitaqa witikurïkï” (Prov. 4:24-27; Efes. 5:15).