Juk viudapa wamranmi kawarimurqan

Alläpa usyanqan witsanmi Elïasta Jehovä kënö nirqan: “Sidonchö këkaq Sarepta markata ëwakuy, y tsëchö juk viudam pachëki qarashunki”. Tsënam tsë markapa yëkunanman chärir juk viuda yantakuykaqta rikarqan, y juk täza yakutam mañakurirqan. Yaku apamoq ëwëkaptinmi Elïasqa kënö nirqan: “Rogakushqëki juk tantëkillapis qarëkallämë”. Tsënam viudaqa kënö nirqan: “Teytallë, tantaqa manam jukllëllapis kantsu. Juk aptë harinawan ichikllana aceitillam kapaman wamräpaqwan noqapaq imallatapis rurarinäpaq”. Elïasnam kënö nirqan: “Jehovämi nimashqa takshalla tantata noqapaq ruraramuptikiqa, tamya kutimunqan tiempuyaq aceitiki y harinëki mana ushakänampaq kaqta”.

Tsënam viudaqa wayinman ëwëkur Jehoväpa willakoqnin Elïaspaq tantan rurapurqan. Y Jehovä ninqannöllam tsë viudapawan ollqu wamrampaqa usya witsan pasanqanyaq mikuyninkuna faltarqantsu. Manam ni harinankuna ni aceitinkuna ushakarqantsu.

Peru tsëpitaqa, tsë viudapa wamranmi alläpa qeshyarnin wanurirqan y tsëqa alläpa llakikuypaqmi karqan. Tsëmi imallatapis ruranampaq Elïasta rogakurqan. Elïasqa mamampa mellqanimpita wamrata tsarirkurmi wayipa altusninman aparqan, y cäma jananman churarirmi Jehoväman kënö mañakurqan: “Teyta Jehovä, kë wamrata kawëkatsillämuy”. ¿Musyankiku imanirmi espantakuypaq karqan, tsë wamrata Jehovä kawaritsinqan? Tsë witsanyaqqa manam pipis kawarishqaraqtsu karqan, tsëmi espantakuypaq karqan. Y tsë viudawan wamranqa manam israelïtatsu kayarqan.

Tsë wamraqa kawariramurqanmi. Tsëmi Elïasqa viudata kënö nirqan: “¡Rikë! Wamrëki kawariramushqa”. Rikëkurqa alläpam kushikurqan y Elïastam kënö nirqan: “Kananmi musyarï Diospa willakoqnin kanqëkita. Y Jehovä Dios ninqanta willakunqëkiqa cumplikanqanta”.