Jehoiadäqa valientim karqan

Jezabelpam Atalïa jutiyoq wamran karqan, y mamäninnö chiki warmim karqan. Judäpa gobernantinwanmi casakurqan, peru qowan o nunan wanuriptinmi wamranna gobernar qallarqan. Y wamran wanuriptinmi kikin Atalïa Judäta gobernarqan. Y pëlla gobernëta munarmi, gobernantipa llapan tsurinkunata y tsë carguta chaskita puëdeq kaqkunataqa wanutsirqan. ¡Y kikimpa willkankunatapis wanutsirqanmi! Tsëmi pëtaqa pï mëpis mantsayaq.

Mandakoq sacerdöti Jehoiadäwan warmin Jehosëbaqa musyayarqanmi Atalïa rurëkanqankunaqa mana alli kanqanta. Tsëmi vïdankunatapis peligruman churar Atalïapa llullu willkan Jehoasta jatunyanqanyaq templuchö cuidayarqan y pakarätsiyarqan.

Jehoas siëti watayoq këkaptinmi guardiakunapa mandaqninkunata y levïtakunata Jehoiadäqa qayatsirqan. Y kënömi nirqan: “Templupa punkunman ëwayë, y ama dejayëtsu pipis yëkamunanta”. Tsëpitanam Judäpa gobernantin kanampaq Jehoaspa peqanman o umanman juk corönata churarqan. Tsënam nunakunaqa, “¡gobernantintsik unëpa kawakutsun!” niyarqan.

Templuchö büllëkäyaqta wiyëkurmi Atalïaqa rikaq ëwarqan. Y churayanqan gobernantita rikëkurmi, röpantapis rachirir, “¡traiciunërukuna!, ¡traiciunërukuna!” nir qayëkacharqan. Tsënam soldädukunapa mandaqninkunaqa Atalïata tsarïkurnin juk sitiuman apëkur wanuratsiyarqan. Atalïaqa mana allikunatam israelïtakunata ruratsirqan. Y wanuratsiyaptinqa, ¿imatan pasakurqan?

Jehoiadäqa llapan nunakunatam yanaparqan Jehoväwan juk acuerduta rurayänampaq. Tsëchömi Jehovällata adorayänampaq änikuyarqan. Baal santupa templunta y llapan santukunatam ushakätsirqan. Tsëpitanam sacerdötikunata y levïtakunata templuchö yapë trabajayänampaq nirqan, tsënöpa templuman ëwar Jehoväta yapë adorayänampaq. Y soldädukunatam churarqan Jehoväta mana cäsukoq nunakuna templuman mana yëkuyänampaq. Jehoiadäwan soldädukunapa mandaqninkunaqa gobernar täkunamanmi Jehoasta apayarqan, y Judä nunakunaqa alläpam kushikuyarqan. Mana allita ruraq Atalïa wanushqana kaptinmi Jehovällatana llapampis sirwiyarqan. Jehoiadäqa valienti nunam karqan. ¿Cuenta qokurqunkiku valienti karnin mëtsika nunakunata yanapanqanta?