Jerusalentaqa ushakätsiyarqanmi

Judä nunakunaqa atska kutichömi Jehoväta dejarïkur santukunata adorayarqan. Y pëkunata yanapëta munarmi Jehoväqa mëtsika willakoqninkunata mandarqan. Tsë nunakunaqa mana cäsukurmi pëkunapita burlakuyarqan. Jehoväqa manam munarqantsu santukunata adorar sïguiyänanta. ¿Y tsëpaqqa imatataq rurarqan?

Babiloniapa gobernaqnin Nabucodonosormi juk nacionkunata dominar qallëkurqan. Tsëmi Jerusalenta atacaq ëwarqa gobernanti Joaquinta, dirigeqkunata, soldädukunata y artesänukunata prësu apakurqan. Jehoväpa templumpita y palaciu wayipitam llapan väleq cösaskunata apakurqan. Nïkurmi Judäpa gobernantin kanampaq Sedequïasta churarqan.

Judächö gobernar qallanqan witsanqa, Sedequïasqa Nabucodonosortam cäsukurqan. Peru Diospa willakoqnin tukoqkuna y amänun nacionpita nunakunam Nabucodonosorpa contran churakänampaq niyarqan. Tsënam Jeremïasqa kënö nirqan: “Contran churakaptikiqa wanutsinakuy, mallaqë y qeshyakunam Judächö kanqa”.

Öchu wata gobernarirmi Sedequïasqa Nabucodonosorpa contran churakarqan y Egiptu soldädukuna yanapayänampaq ashirqan. Tsëmi Nabucodonosorqa soldädunkunata Jerusalenta atakayänampaq mandarqan. Chëkurnam tsë markapa murällan waqtampa altu perqakunata rurayarqan. Jeremïasqa kënömi Sedequïasta nirqan: “Entregakurqa manam ni qam ni markëki ushakäyankitsu. Peru mana entregakuptikiqa Jerusalenta kayëkurmi prësu apakuyäshunki”. Sedequïasnam nirqan: “¡Manam entregakushaqtsu!”.

Babilonia soldädukunaqa juk wata pullan shuyärirmi Jerusalenpa perqanta juk lädupa juchuratsirnin yëkuriyarqan, y llapantam kayayarqan. Jehoväpa templuntapis kayayarqanmi, y mëtsika nunakunatam wanutsiyarqan, y wakintaqa prësum apayarqan.

Sedequïasqa qeshpirmi ëwakurqan, peru Babilonia soldädukunaqa Jericöpa tsunyaq sitiunchö taripëkurmi gobernanti Nabucodonosorman apayarqan. Nabucodonosorqa Sedequïastam obligarqan wamrankunata imanö wanutsiyanqanta rikänampaq. Nïkurmi wiskuyäratsirnin Babiloniaman prësu aparqan, y tsëchömi Sedequïasqa wanurqan. Peru Jehoväqa Judä nunakunata kënö nirmi änirqan: “70 wata cumpliriptinmi markëkikuna Jerusalenman kutitsiyämushqëki”.

¿Imaraq pasarqan Babiloniaman apayanqan jövinkunataqa? ¿Jehoväta cäsukurtsuraq sïguiyarqan?