Monumentutaqa manam adorayarqantsu

Gobernanti Nabucodonosormi örupita jatun monumentuta ruratsirqan. Tsëtam Düra niyanqan pampaman churatsirqan, y entëru nacionpita gobernadorkunata, dirigentikunata, consejërukunata, y juezkunatam tsëman qayatsirqan. Sadrac, Mesac y Abednëgupis ëwayarqanmi. Y gobernantiqa kënömi mandakurqan: “Waqrapita trompëtata, quënata, cïtarata, taksha arpata tocar qallayanqan höra llapëki qonqurikuyanki, mana qonqurikoq kaqtaqa alläpa achachëkaq hornumanmi jitarkuyäshunki”. ¿Ima ninkitan? ¿Tsë kiman hebreukunaqa tsë monumentupa puntanman qonqurikuyarqantsuraq? ¿O Jehovällatatsuraq adorayarqan?

Instrumentukunata tocar qallëkuyaptinmi, llapan nunakuna qonqurikur örupita monumentuta adorayarqan. Peru Sadrac, Mesac y Abednëguqa manam adorayarqantsu. Tsëta cuentata qokurirmi Nabucodonosorta kënö niyarqan: “Kimaq hebreukunam örupita ruratsinqëki monumentuta adorëta munayantsu”. Tsënam Nabucodonosorqa kimanta qayëkatsir kënö nirqan: “Örupita ruratsinqa monumentüta kanan kaq kutichö mana adorayaptikiqa achachëkaq hornumanmi tsë höra jitayäshunki. Y manam ni mëqan diospis salvayäshunkitsu”. Pëkunanam kënö niyarqan: “Diosnïkunaqa puëdinmi salvayämëta. Y mana salvayämänan kaptimpis, ruratsinqëki örupita monumentutaqa manam adorayäshaqtsu”.

Tsënö niyaptinmi, cölerakuptin Nabucodonosorpaqa cärampis pukayarqanraq. Tsëmi siëti kuti mas hornuta achachätsiyänampaq mandakurqan. Nïkurmi soldädunkunata kënö nirqan: “Kë nunakunata watarkur achachëkaq hornuman jitarkuyë”. Y alläpa achachaptinmi soldädukunaqa hornu punkuman chärirlla wanuriyarqan. Kiman hebreukunaqa hornu rurinmanmi ishkiyarqan. Peru Nabucodonosor rikëkunampaqqa chuskoqnam purir këkäyarqan. Y alläpa mantsakarmi consejaqninkunata kënö tapurqan: “¿Manaku achachëkaq hornumanqa kimaq nunakunallata watarkur jitarqantsik? Kananqa chuskoqnataq nina rurinchö kushishqa purikäyan, ¡y juknäqa angel niraqtaq!”.

Tsëpitanam hornu punkuman witïkur Nabucodonosorqa kënö nirqan: “¡Yarqayämuy!” “¡Llapanta Gobernaq Poderösu Diosta sirweqninkuna!”. Y Sadracta, Mesacta y Abednëguta sänuta rikëkurmi llapankuna espantakuyarqan. Ninaqa manam ni ichikllapis rupashqatsu kanaq, y manam rupashqanöllapis asyäyarqantsu.

Nabucodonosorqa kënömi nirqan: “¡Sadracpa, Mesacpa y Abednëgupa Diosnin alabashqa këkullätsun! Angelninkunawanmi pëkunata salvashqa. Pëkunapa Diosninkunanöqa manam ima diospis salvëta puëdintsu”.

Tsë kiman hebreukunaqa manam ni imanöpapis Jehoväta dejayarqantsu. ¿Qamqa pëkunanötsuraq kanki?