Jehovämi Jesusta salvarqan

Inti o rupay yarqamunan läduchö këkaq markachö nunakunaqa, mëpa ëwayänampaq kaqta estrëllakuna diriginqantam creiyaq. Juk paqasmi ciëluchö chipapëkaq estrëllata rikëkur nunakuna Jerusalenman shayämurqan. Y chärirmi kënö niyarqan: “¿Mëchötan këkan judïukunata gobernanampaq yurishqa wamra? Puntanman qonqurikoqmi shayämurqö”.

Jerusalenpa gobernaqnin Herödismi judïukunata gobernanampaq wamra yurishqa kanqanta wiyarqan. Tsëmi alläpa yarpachakur tsë markachö mandakoq sacerdötikunata y Ley qellqaqkunata qayëkatsir, Cristu mëchö yurinampaq kaqta tapurqan. Tsënam pëkunaqa niyarqan: “Judëachö këkaq Belen markachö yurinampaq kaqta”. Tsënam Herödisqa tsë estrëllakunata rikëkur willakoq nunakunata pakëllapa qayatsirqan, y yachëllapa tapuparmi Belenman kënö nir mandarqan: “Ëwar tsë wamrata ashiyämuy. Tarirqa willayämänëkipaq kutiyämunki, noqapis ëwar puntanman qonqurikunäpaq”.

Herödis tsënö niptinmi, pëkunaqa viajar sïguiyarqan. Tsë rikäyanqan estrëllaqa puntankunatam ëwarqan, y wamra këkanqan sitiupa jananchömi quedarirqan. Y wayiman yëkurirnam, wamrata rikäyarqan maman Marïawan këkaqta. Tsënam Jesusta respetar puntanman qonqurikuyarqan, y cäjankunata kicharkurmi öruta, yuraq inciensuta y mïrrata qarayarqan. Peru, ¿Jehoväku tsë nunakunataqa Jesusman mandarqan? Manam.

Tsë paqasmi Teyta Jehoväpa angelnin suëñunchö yuripur Josëta kënö nirqan: “Sharkuy, kanan höra wamratawan mamäninta pusharkur Egiptuta ëwakuy, Herödismi wamrata ashïkur wanutsinampaq këkan, tsëmi Egiptuchö quedakunëki imatapis yapë ninqaqyaq”. Tsënam Josëqa familianwan jinan höra Egiptuta ëwakuyarqan.

Estrëllakunata rikëkur willakoq nunakunaqa, Herödisman mana kutiyänampaq suëñunkunachö Teyta Dios nishqa kaptinmi, juk nänipana nacionninkunata kutikuyarqan. Y engañayanqanta musyëkurnam Herödisqa alläpa cölerarqan. Tsëmi Herödisqa Jesusta mana tarïkur mandakurqan, ishkë watapita qepaman ollqu wamrakunata Belenchö y amänun markakunachö wanutsiyänampaq. Peru Jesusqa Egiptuchönam këkarqan, tsëmi salvakurqan.

Herödis wanuriptinnam, Egiptuchö këkaptin Josëta suëñuyninchö Teyta Jehoväpa angelnin yuripur kënö nirqan: “Kananqa allinam kutikunëkipaq”. Tsënam sharkur wamratawan mamäninta pusharkur Israelta kutikurqan, y Nazaret markachömi täkuyarqan.