Qoyllurkunata rikëkur tantiyaqkuna Jesusta rikaq ëwayan

Inti Yarqamunan Lädupitam qoyllurkunata rikëkur tantiyaqkuna chäriyarqan. Qoyllurkunata rikëkur tantiyaqkunaqa, qoyllurkuna mëchö këkäyanqanta rikëkur nunakunata imanir imapis pasanqanta entiendita puëdiyanqantam niyan (Isaïas 47:13). Tsë nunakunaqa nacionninkunapita patsëmi juk “qoyllurta” qatir mëtsika karuta ëwayarqan. Peru tsë qoyllurqa manam Belenmantsu pëkunata pusharqan, sinöqa Jerusalenmanmi.

Tsëman chärirqa tsë nunakunaqa kënömi tapukuyarqan: “¿Mëchötaq këkan judïukunapa reyninkuna kanampaq yurishqa wamra? Porqui Inti Yarqamunan Läduchö këkarninmi qoyllurninta rikäyarqö, tsëmi respetarnin puntanman qonqurikuyänäpaq shayämurqö” (Mateu 2:1, 2).

Jerusalenpa reynin Herödis tsëta wiyëkurqa alläpam piñakurqan. Tsëmi precisaq sacerdötikunata y wakin judïu pushakoq religiösukunata qayatsirqan, y Cristu mëchö yurinampaq kaqtam pëkunata tapurqan. Diospa Palabranta rikëkurmi pëkunaqa “Belenchömi” niyarqan (Mateu 2:5; Miquëas 5:2). Tsënam Herödisqa pakëllapa qayatsirqan qoyllurkunata rikëkur tantiyaqkunata y kënö nirqan: “Ëwayë y tsë wamrata alleq ashiyämï, y taririrninqa kutiyämunki willayämänëkipaq, tsënöpa noqapis ëwanäpaq y respetarnin puntanman qonqurikunäpaq” (Mateu 2:8). Rasumpa kaqchöqa, Herödisqa tsë wamrata wanutsitam munarqan.

Qoyllurkunata rikëkur tantiyaqkuna nänipa ëwar qallëkuyaptinnam, tsë qoyllurqa puntankunata yapë ëwar qallëkurqan. Tsë qoyllur lluta qoyllurlla mana kanqanqa clärum këkarqan. Tsë qoyllurtaqa pï karpis utilicëkarqanmi tsë nunakunata pushanampaq. Pëkunaqa, Josë, Marïa y Jesus täräyanqan wayi jananman chärinqanyaqmi qatirnin sïguiyarqan.

Wayiman yëkurirnam, wamrata maman Marïawan këkaqta rikäriyarqan. Tsë höram wamrata respetarnin puntanman qonqurikuyarqan, nïkurnam cäjankunata kichayarqan y qarëninkuna qoyarqan: öruta, olïbanuta y mïrrata. Herödis kaqman kutiyänampaq këkäyaptinnam, juk suëñuchö tsëpa mana kutiyänampaq tsë nunakunata Dios nirqan. Tsëmi juk nänipana markankunata kutikuyarqan.

¿Pitaq tsë “qoyllurta” utilizarqan tsë nunakunata pushanampaq? Yarpäshun, tsë qoyllurqa manam Jesus këkanqan Belenmantsu pëkunata defrenti pusharqan, sinöqa Jerusalenmanmi. ¿Y piwantaq tsëchöqa parlayarqan? Herödiswanmi. Tsë reyqa Jesustam wanutsita munarqan, y qoyllurkunata rikëkur tantiyaq nunakunata Jesus mëchö këkanqanta Dios mana michashqa kaptinqa, wanuratsinmanchi karqan. Clärum këkarqan, tsë qoyllurtaqa Diosta chikeq Satanasmi pushëkarqan Jesusta wanutsiyänampaq.