Diospa Gobiernumpitam Jesusqa yachatsikurqan

Bautizakurirllam Jesusqa, “ciëluchö Gobiernuqa këllachönam këkan” nir yachatsikur qallëkurqan. Y qateqninkunapis pëwanmi entëru Galilëachö y Judëachö yachatsikur puriyarqan. Tsëpitaqa Nazaret markanman kutirirmi Jesusqa Diosta adorayänan wayiman ëwarqan, y Isaïas qellqanqan rölluta kicharir fuertipa kënö leyirqan: “Teyta Jehoväpa santu espïritunmi yanapaman alli noticiakunata willanäpaq”. ¿Y imanirtan tsëta leyirqan? Nunakuna milagrukunata rurananta munayaptinmi. Jesusqa manam milagrukunata rurananllapaqtsu Diospa podernin santu espïrituta chaskishqa karqan. Pëpaqa Diospa Gobiernumpita yachatsikuymi imëkapitapis mas väleqqa karqan. Tsëmi wiyakuykaqkunata kënö nirqan: “Kananmi kë leyimunqä cumplikärin”.

Y Galilëa qocha kuchumpa ëwëkarmi, mällankunata qochaman jitëkaq ishkaq nunakunata rikarqan, pëkunaqa wawqim kayarqan. Tsëpita pasarkurnam ishkaq mas nunakunata rikarqan, pëkunapis wawqim kayarqan. Pëkunatam kënö nirqan: “Qepäta shayämuy, nunakunata pesquëtam yachatsiyashqëki”. Pëkunapa jutinkunaqa Pëdru, Andres, Santiägu y Juanmi karqan. Pëkunaqa tsë höram barcuta y mällankunata dejëkur Jesuspa qepanta ëwayarqan. Y entëru Galilëachömi Jehoväpa Gobiernumpita yachatsikur puriyarqan. Diosta adorayänan wayikunachö, mercädukunachö y cällikunachömi yachatsikuyarqan. Y mëtsikaq nunakunam qatiräyarqan. Jesuspaqqa mëtsëchömi willakur qallëkuyarqan. Alläpa karuchö këkaptimpis, Siriachöpis willakuyarqanmi.

Tiempu pasariptinnam apostolninkunata qayëkatsir, mana alli espïritukunata qarquyänampaq y qeshyëkaqkunata alliyätsiyänampaq poderta chaskiyänampaq kaqta nirqan. Tsëpita ichik tiempullatanam, markan markan y caserïun caserïun, Diospa Gobiernumpita alli noticiakunata willakur ëwayarqan. Y juk grüpu warmikunapis pëta y qateqninkunata atiendirmi pëkunawan puriyaq. Marïa Magdalëna, Juäna, Susäna y jukkunapis kayarqanmi.

Imanö yachatsikuyänampaq kaqta nirirmi, Jesusqa qateqninkunata yachatsikoq mandarqan. Galilëachö puriyanqan witsanqa mëtsikaqmi Jesuspa qateqnin kayarqan y bautizakuyarqan. Y mas nunakunam Jesuspa qateqnin këta munayarqan, tsëmi Jesusqa nirqan cosëchapaq listu këkaq chakrakunanö kayanqanta. Tsëpitanam kënö nirqan: “Cosëchanman mas peonkunata mandamunampaq Jehoväman rogakuyë”. Tsëpita juk tiempu pasariptinnam, 70 qateqninkunata akrarir ishkë ishkë mandarqan llapan Judëachö yachatsikuyänampaq. Y pëkunaqa pï mëtam Diospa Gobiernumpita parlapäyarqan. Y kutirirqa llapan pasakunqantam Jesusta kushishqa willayarqan. Diabluqa manam ni imanöpapis puëdirqantsu yachatsikuyänanta michëta.

Jesusqa llapantam listuta dejarqan ciëluta kutikuptin tsë trabäjuta qateqninkuna rurar sïguiyänampaq. Tsënam Jesusqa pëkunaman witïkur kënö nirqan: “Ëwarnin qatimaqnïkuna kayänampaq llapan nacionpita nunakunata yachatsiyë, y Teytapa, Tsuripa y santu espïritupa jutinchö bautizayë”.