Diosman mañakuyänampaqmi Jesusqa discïpulunkunata yachatsirqan

Fariseukunaqa alli tukuyta munar y wakinkuna rikäyänanllapaqmi imëkatapis rurayaq. Pëkunaqa rëzukunata yachakurkurmi cällikunachö y Diosta adorayänan wayikunachö kutin kutin Diosman mañakuyaq. Y tsëtaqa rurayaq nunakuna rikäyänanta munarmi. Tsëmi nunakunaqa yarpachakuyarqan Jesus kënö niptin: “Ama fariseukunanöqa mañakuyankitsu. Pëkunaqa mëtsika palabrakunata niyaptinraq, Teyta Dios wiyanampaq kaqtam pensayan, peru manam tsënötsu. Mañakuyanqëkitaqa Jehovällam musyanan. Ama juk palabrallataqa kutin kutin parlayankitsu. Jehoväqa munan imanö sientikuyanqëkita willayänëkitam”.

Tsëpitam Jesusqa kënö mañakuyanki nirqan: “Ciëluchö këkaq Teytalläkuna, jutillëki respetashqa këkullätsun. Gobiernuyki shamuykullätsun. Ciëluchö y patsachöpis rurëta munanqëkita rurëkullë”. Y nirqanmi mikuyninkuna mana faltanapaq y jutsankunapita perdonashqa kayänampaq mañakuyänampaqpis.

Jesusqa kënöpis nirqanmi: “Ama Diosman mañakuyta dejayëtsu. Tsëpa rantinqa imëka allikunata Teytëkikuna Jehoväta mañakur sïguiyë. Llapan teytakunapis imëka allikunatam tsurinkunata qarayan. Tsuriki tantata mañashuptikiqa, ¿rumintsuraq qarëkunkiman? O ¿mëqëkiraq wamrëkikuna pescäduta mañayäshuptiki, pescädupa rantin culebran qarëkuyankiman?”.

Tsëpitanam kënö nirqan: “Qamkuna mana alli nuna këkarpis tsurikikunata allikunata qarëkäyaptikiqa, ciëluchö këkaq Teytëkikunanäqa, ¡masraqmi santu espïritunta mañakoqkunata poderninwan yanapanqa! Tsëmi mañakuytaqa dejayänëkitsu”. Qamqa, ¿Jesus ninqannöku Jehoväman mañakunki? ¿Imakunapaqtan Jehoväman mañakunki?