Mëtsikaq mikuyänampaqmi Jesusqa milagruta rurarqan

Pascua Fiestata 32 watachö celebrayänampaq ichikllana pishikaptinmi, Jesuspa apostolninkunaqa juk markakunapa yachatsikoq ëwayanqampita kutiyashqa kayarqan. Tsëmi Jesusqa utishqata o pishipashqata rikar, Betsaida markaman barcuwan ëwayänampaq y jamapäyänampaq nirqan. Peru qocha kuchunman chëkarnam Jesusqa rikärirqan mëtsikaq nunakuna qatir ëwashqa kayanqanta. Jesusqa apostolninkunawan jamarita munëkarpis, shumaqmi tsë nunakunata yachatsirqan. Qeshyëkaqkunatam alliyätsirqan y entëru junaqmi Diospa Gobiernumpita yachatsirqan. Tsëmi apostolninkunaqa kënö niyarqan: “Alläpa tardinam, caserïukunaman ëwar mikuyninkuna rantiyänampaq kë nunakunata despachëkuyna”.

Peru Jesusqa kënömi nirqan: “Manam pëkunaqa ëwakuyänantsu, qamkuna imallatapis qarayë”. Tsënam apostolninkunaqa kënö niyarqan: “¿Tanta ranteqku ëwariyä?”. Tsëmi Felïpi jutiyoq kaq kënö nirqan: “Qellënintsik atska kapamashqapis llapankunapaq rantinapaqqa manachi tinkunmantsu, alläpa atskaqmi kayan”.

Tsënam Jesusqa nirqan, “¿imallatan kapamantsik?”. Y Andresmi kënö nirqan: “Këchöqa pitsqa tanta y ishkë pescädullam kan. Peru këtsika nunakunapaqqa manam tinkunqatsu”. Tsëmi Jesus kënö nirqan: “Tsë tantakunata y tsë pescädukunata apayämuy”. Tsëpitanam nunakunata nirqan qewa jananllaman cincuenta cincuenta y cien cien grüpu grüpu jamakuyänampaq. Tsëpitanam pitsqa tantata y ishkë pescäduta aptarkur, ciëluman rikëkur Teyta Diosman mañakurqan. Tsëpitanam apostolninkunata entregarqan llapan nunakunata qarayänampaq. Tsëchöqa ollqullam 5.000 kayarqan, peru warmikuna y wamrakunapis kayarqanmi, llapankunam pacha junta mikuyarqan. Apostolkunaqa llapan sobranqantam mana malogranampaq juntayarqan, y ¡12 canastakunamanmi juntayarqan! Tsëqa alläpa shumaq milagrum karqan.

Alläpa kushikurmi nunakunaqa Jesus gobernaqninkuna kananta munayarqan. Peru Jehoväqa manam Jesus gobernananta munarqanraqtsu. Tsëta musyarmi Jesusqa llapan nunakunata despacharqan ëwakuyänampaq. Y apostolninkunatam nirqan Galilëa qochata tsimpayänampaq. Tsëmi pëkunaqa barcuchö ëwakuyarqan, peru Jesusqa japallanmi juk jirkaman witsarqan. Y japallanqa witsarqan, Teytanman mañakuyta munarmi. Jesusqa imëka rurëyoq këkarpis Diosman mañakuytaqa manam imëpis dejaqtsu.