Jesuspa ultimu cënan

Judïukunaqa wata watam 14 de nisan junaq Pascua Fiestata celebrayaq. Tsënömi yarpäyaq Egiptuchö esclävu kayanqampita Jehovä libranqanta y Äninqan Markakunaman chätsinqanta. Jesuswan apostolninkunapis 33 watachömi Jerusalenchö juk wayipa altusninchö tsë Pascua Fiestata celebrayarqan. Y cenar ushariyaptinmi Jesusqa kënö nirqan: “Juknikim traicionayämanki”. Tsëmi apostolninkunaqa mantsakar, “¿mëqäkunaraq?” niyarqan. Tsënam Jesusqa kënö nirqan: “Kë pakishqa tantata qaranqa kaqmi”. Y tsënö nirirmi Jüdas Iscariötita qararqan. Tsënam Jüdasqa jinan höra sharkur ëwakurqan.

Tsëpitanam Jesusqa tantata aptarkur Teyta Diosman mañakuskir pakirirqan, y 11 apostolninkunata kënö nir qararqan: “Këqa, qamkunarëkur entreganäpaq kaq cuerpü cuentam”. Tsënöllam vïnuwampis rurarqan. Jehoväman mañakurirmi apostolninkunata makyarqan, y kënömi nirqan: “Kë vïnuta llapëki upuyë. Këqa Jutsëkikunapita perdonashqa kayänëkipaq entreganäpaq kaq yawarnï cuentam. Ciëluchö juntu gobernanapaqmi qamkunata äniyaq. Noqata yarpäyämarnï këta rurar sïguiyë”. Kanan witsampis Jesusman llapan creikoqkunaqa Jesus wanunqanta yarpäyänampaqmi cada wata juntakäyan. Y tsëtam Señorpa Cënan nir celebrayan.

Cenar usharirnam apostolkunaqa pëkunapita mëqan mas alli kanqampaq fuertipa discutir qallëkuyarqan. Peru Jesusqa kënömi nirqan: “Mas reqishqa kaqqa, mas jövin kaqnö katsun, y dirigeq kaqqa, sirwipakoqnö katsun”.

Jesusqa kënöpis nirqanmi: “Qamkunaqa amïgükunam kayanki. Tsëmi qamkunataqa willayaq Teytä llapan nimanqankunata. Ichikllachönam Teytä kaqta ciëluman kutikushaq. Peru qamkunaqa këchömi quedakuyanki, y kikikikunapura kuyanakuyanqëkipitam nunakunaqa musyayanqa qatimaqnïkuna kayanqëkita. Qamkunata kuyayanqaqnöllam, qamkunapis kuyanakuyänëki”.

Y usharinampaqmi Jesusqa Jehoväta mañakurqan qateqninkunata cuidanampaq, y imëpis juntu y yamë trabajar kayänampaq yanapëkunampaq. Jesusqa Jehoväpa jutin respetashqa kanampaqpis mañakurqanmi. Tsëpitanam qateqninkunawan cantarnin Jehoväta alabarir, tsë wayipita ëwakuyarqan. Y ichikllachönam Jesusta prësuyänan karqan.