Jesusqa ciëlutam kutikurqan

Jesusqa Galilëachömi qateqninkunawan juntakarqan, y kënö nirmi pëkunata mandarqan: “Ëwayë y qatimaqnïkuna kayänampaq llapan nacionkunapita nunakunata yachatsiyë. Y llapan mandanqäkunata yacharatsir bautizayë”. Kënöpis nirqanmi: “Yarpäyë, llapan junaqkunam qamkunawan këkäshaq”.

Jesusqa kawarirkamur 40 junaqpam Galilëachö y Jerusalenchö mëtsika qateqninkunata yuripurqan. Imëkatam shumaq yachatsirqan, y mëtsika milagrukunatam rurarqan. Tsëpitam juk kuti masllana apostolninkunawan Olïvus jirkachö juntakäyarqan. Y kënömi pëkunata mandarqan: “Ama Jerusalenpita ëwakuyëtsu. Sinöqa qamkunata Teyta äniyäshunqëkita shuyar këkäyë”.

Peru apostolninkunaqa manam entiendishqatsu kayarqan imanir tsënö mandanqanta, tsëmi kënö tapuyarqan: “¿Kanan witsanku Israelchö gobiernuta yapë patsätsinki?”. Tsënam Jesusqa kënö nirqan: “Jehoväqa manam munanraqtsu gobernar qallanäta, peru manam alläpanatsu pishin. Peru santu espïrituta chaskirmi poderyoq tikrayanki, tsëmi yachatsikuyänëki Jerusalenchö, entëru Judëa provinciachö, Samariachö, y patsapa mas karu kuchunchö”.

Tsëpitanam Jesusqa ciëluman witsar qallëkurqan, y juk pukutëmi tsaparirqan. Qateqninkuna rikarëkäyaptinmi illakärirqan.

Jesuspa qateqninkunaqa Olïvus jirkapitam Jerusalenman kutikuyarqan. Tsëchömi juk wayipa altusninchö imëpis juntakäyaq y Diosman mañakuyaq. Y imakunata rurayänampaq kaqta Jesus musyatsinantam shuyaräyarqan.