BIBLIAPITA YACHATSINËKIPAQ
11 KAQ YACHAKUNËKIPAQ
Entiendinampaqnölla yachatsi
Bibliachö kënö ninqanman pensë: “Fäcil-lla entiendinanta mana parlayaptikiqa, ¿imanöraq pï nunapis musyanqa imata nikäyanqëkita?” (1 Cor. 14:9).
¿Imatataq Jesus rurarqan?
1. VIDEUTA rikë o Mateu 6:25 a 27 ninqanta leyi. Tsëpitana këkunaman pensë:
¿Imapitataq Jesus parlarqan Jehovä cuidamanqantsikta musyanapaq?
Pishqukunapita imëkata musyëkarpis, ¿imanirtan Jesusqa llapan musyanqampitatsu parlarqan? ¿Imanirtan tsënö ruranqanqa alli karqan?
¿Imatataq yachakuntsik Jesus ruranqampita?
2. Entiendiyänampaqnölla nunakunata parlapashqaqa, yachatsinqantsiktam yarpäyanqa y shonqunkunamanmi chanqa.
Jesus ruranqannö rurë
3. Ama alläpaqa parlëtsu. Imapita yachatsirpis ama llapan musyanqëkitaqa parlëtsu. Tsëpa rantinqa, yachakuykäyanqëki libruchö o follëtuchö ninqanllapita yachatsi. Imatapis tapurqa, contestashunqëkiyaq pacienciawan shuyë. Tapunqëkipa respuestanta mana musyaptin o contestashunqëki Bibliachö ninqannö mana kaptinqa, yachatsita munanqëkita entiendinampaq mas tapukuykunata rurë. Imatapis allina entiendishqa kaptinqa, qateqnin kaqtana yachatsi.
4. Manaraq musyanqanta yachatsinëki kaptinqa, puntataqa yachakushqana kayanqëkitaraq yarpätsi. Maslla musyarinapaq, wanushqakuna kawariyämunampaq kaqta yachatsinëki kaptinqa, capazchi wanushqakuna imanö këkäyanqampaq yachakuyanqëkitaraq yarpäratsinkiman.
5. Ima ejempluwan yachatsinëkipaq kaqta shumaq pensë. Manaraq tsë ejempluwan yachatsirnin këkunaman pensë:
“¿Tsë ejempluqa fäcil-lla entiendinanku?”.
“¿Yachëkätsinqä nuna o warmi entiendinqatsuraq?”.
“¿Yarpanqatsuraq imata yachatsita munanqäta o ejemplullatatsuraq yarpanqa?”.