Estudiatsikunapaq alli yachakushun
1. ¿Imanirtaq estudianteta yanapanantsik yachakïkanqanta kuyanampaq?
1 Huk estudiante Jehoväta servinampaq yanapëta munarqa, kikintsikraqmi alli yachakunantsik. Yachakïkanqanta kuyanampaq yanapashqaqa Diosta servitam munarenqa, tsëqa estudiatsikunapaq kallpachakunqantsikpis manam ardëllatsu kanqa (Deu. 6:5; Pro. 4:23; 1 Cor. 9:26). Pero ¿imataraq rurashwan yachakïkanqanta kuyayänampaqqa?
2. ¿Imachötaq yanapamäshun yachakunapaq mañakonqantsik?
2 Jehoväman mañakurir-raq yachakï: Murutaqa Jehovämi winatsin, tsëmi estudio biblicota qokunapaq yachakorqa, estudiëkaqta imachö yanapanampaqpis Jehoväman mañakunantsik (1 Cor. 3:6; Sant. 1:5). Tsëqa musyashunmi Jehová munanqanta imanö yachatsinapaqpis (Col. 1:9, 10).
3. Estudiëkaq wananqanman yarparqa, ¿imanöraq yachakushwan?
3 Yachakïta wananqanman pensë: Alli yachatsikoqqa wiyaqninmanraqmi pensan, Jesuspis tsënömi rurarqan. Ishkë kutichömi, “¿imatataq rurashaq [...] wiñepa cawanäpaq?” nirnin tapuyarqan. Tsë ishkan tapukïtam hukläyapa hukläyapa contestarqan (Luc. 10:25-28; 18:18-20). Tsënö ruranapaqqa Bibliata estudiëkaq yachakïta wananqanman pensarmi yachakunantsik. ¿Publicacionchö mëqan textotaraq leirapushwan? ¿Atskatatsuraq yachatsishwan? ¿Mëqantaraq raslla yachakunmantsu o rasllaqa chaskikunmantsu? Bibliata estudiëkaq imakunata tapumänantsikmampis pensarqa, contestanapaq yachakushqallanam këkäshun.
4. ¿Imakunatataq ruranantsik estudiatsikoq ëwanapaq yachakur?
4 Yachatsinëkipaq kaq publicacionpita yachakï: Estudiatsikuna publicacionpita noqantsik atska kuti yachakushqana kashqapis, estudianteqa tsëran yachakonqa. Yachakïkanqanta llapan shonqunwan kuyanampaqqa, cada estudiatseq ëwanapaqmi alli yachakunantsik. Tsëmi, rurayänampaq kaqta nenqantsiknölla noqantsikpis publicacionpita yachakunantsik y textokunata leinantsik. Tsëtaqa ruranantsik estudiëkaq wananqanman pensarmi, y más precisaq kaqkunatapis markarishwanmi (Rom. 2:21, 22).
5. ¿Imata rurartaq Jehová munanqanta qatishwan?
5 Jehoväqa munan estudiantekuna alli yachakur mana alli rurëninkunata haqiyänantam (2 Ped. 3:9). Estudiatsikoq ëwanapaq alli yachakorqa, nunakunapaq Jehová munanqantam noqantsikpis munëkantsik.