“Shoqacoq” Diosman markäkushun

“Alabecushun Jesucristupa Papänin Dios Yayantsicta, porqui pëqa allapa ancupäcoq Papämi y shoqacoq Diosmi.” (2 COR. 1:3.)

1. ¿Imatataq wanantsik llapan kawënintsikchö?

YURIKUNQANTSIKPITA patsëmi kuyashqa këta y shoqashqa këta wanantsik. Hina tsë hörallam waqarnin o qaparirnin mellqamänapaq o mikutsimänapaq mañakuntsik. Más watakuna pasariptimpis wanëkantsikllam imëka mana allikunapa pasashqa pipis kallpata qomarnintsik shoqamänata.

2. ¿Imanötaq Biblia rikätsimantsik Jehová pëman markäkoqkunata shoqanampaq kaqta?

² Hora höraqa kastantsikkuna y amïgontsikkunam llakikïnintsikkunachö yanapamantsik. Tsënö kaptimpis, höraqa alläpa sasa llakikïkunapa pasashqam ni imanö yanapamënintsikta puëdeyantsu. Pero llapanchö y hasta más sasa llakikïnintsikkunachöpis yanapamënintsikta puëdeqqa Jehová Diosllam. Palabran Bibliam këta awnimantsik: “Jehová Diosqa [...] llapan qayakoqninkunapa lädonchömi këkan. [...] Y qayakïninkunataqa wiyanqam” (Sal. 145:18, 19). Hina këtam awnimantsik: “Jehoväpa nawinkunaqa alli ruraqkunatam rikarëkan, y rinrinkunanam pëkuna mañakuyanqanta wiyarëkan” (Sal. 34:15). Awmi, pëpa yanapakïninta y shoqakïninta chaskita munarninqa, pëmanmi paqwë markäkunantsik. Tsënö kanqantam David nirqan Salmos librochö kënö qellqarnin: “Jehoväqa mana huchoq perqanömi llakishqakunapaq kanqa, alläpa llakikï tiempokunachö mana huchoq perqanö. Y shutikita reqeqkunaqa qammanmi markäkayämunqa [yärakayämunga], porque ashiyäshoqnikikunataqa manam haqinkitsu, oh Jehová” (Sal. 9:9, 10).

3. ¿Ima igualatsikïwantaq Jesus rikätsikurqan Jehová sirveqninkunata alläpa kuyanqanta?

³ Jehoväqa sirveqninkunata alläpam kuyan. Tsëtam Jesus rikätsikurqan kënö nirnin: “¿Manacu pitsqa pishqupa ishque sentabulla chanin! Tseno quecaptinpis, pecunapaqqa Dios imepis yarparëcanmi. Y qamcunapatanäqa llapan aqtsequicunatapis jucllellapayan yupashqam quecatsin. Tseno quecaptenqa, ama imatapis mantsacuyëtsu. Porqui atsca pishqocunapitapis qamcunaqa masmi baliyanqui” (Luc. 12:6, 7). Hinamampis, profeta Jeremïaswanmi markan Israelta Jehová kënö nirqan: “Mana ushakaq kuyakïnïwanmi noqaqa kuyarqoq. Tsëmi rasumpa kuyakïnïwan qamta noqaman wititsimurqoq” (Jer. 31:3).

4. ¿Imanirtaq Jehoväpa awnikïninkunaman imëpis markäkushwan?

⁴ Alläpa llakikï tiempokunachöqa alläpam yanapakun Jehoväman y awnikïninkunaman markäkï. Noqantsikpis Josuënömi Jehoväman markäkunantsik, pëqa kënömi nirqan: “Alli[m] musyayanki Jehová Dios qamkunapaq allikunata parlanqan llapan cumplikanqanta, y manam ni hukllëllapis mana cumplikashpaqa quedashqatsu. Y manam ni ima parlanqampis pishintsu” (Jos. 23:14). Mana aguantëpaq llakikïkunata pasëkarpis, allim musyantsik ‘Dyosqa fyel’ o mana haqikoq kanqanta, y mana haqishqaqa pëpis manam imëpis haqimäshuntsu (lei 1 Corintios 10:13, QKW).a

5. ¿Imataq yanapamantsik cristiano mayintsikkunata shoqanapaq?

⁵ “Shoqacoq Diosmi” nirmi Pabluqa qellqarqan Jehoväpaq. Shoqashqa kë palabraqa, “huk nuna llakikïnimpita, nanatsikïnimpita o piñakïnimpita yamëyärinqan” ninanmi. Y tsënö sientekurinapaqmi ciëlochö këkaq Teytantsikpis yanapamantsik (lei 2 Corintios 1:3, 4). Manam ni pï ni ima michantsu llapan kawëninkunawan kuyaqninkunata yanapananrëkur imatapis rurananta. Tsëta ruranampaqqa makinllachömi imapis këkan. Kallpata qomashqam noqantsikpis cristiano mayintsikkunata imëka “sufrimientuncunacho” yanapëkïta puëdentsik. “Pemi shoqamantsic imapis nacaquinintsiccunacho”, tsënöpam noqantsikpis pitapis shoqëta puëdentsik. Corintochö këkaq cristiänokunata Pablu tsënö ninqanqa clärom rikätsikun hipëkaqkunata Jehová yanapëta puëdenqanta.

Alläpa llakikïkunachö tsarakunapaq yanapakïkuna

6. ¿Imakunapa pasanqantsiktaq alläpa llakitsimantsik?

⁶ Imëka pasanqantsikchömi shoqashqa këta wanantsik. Pero masqa llakikuntsik huk kuyashqantsik wanukïkuptinmi, hina masran majantsik o wambrantsik wanuptinnäqa. Hina tsënöllam alläpa llakikuntsik pipis colornintsikrëkur o markantsikrëkur hukläya rikämashqa, qeshyapäkoq karnin, awkinyarnin, chakwanyarnin, waktsa karnin, casado kawakïchö problema kaptin o kë Patsa imëka mana allikunaman chaptin.

7. a) ¿Imatataq wanantsik sasa tiempokunapa pasarnin? b) ¿Imatataq Jehová rurëta puëden ‘nanatsikoq y alläpa llakishqa’ shonquyoq nunapaq?

⁷ Alläpa sasa tiempokunapa pasarmi masqa wanantsik pillapis shoqaramänata. Shonquntsik llakikuptin, mana alli pensëkuna chämuptin, mana alli sentimientokuna kaptin, qeshyapäkurnin y Jehoväwan alli kënintsik oqrakaqnö kaptin hipashqa, Biblia imanö yanapamanqantsikta rikärishun. Shonqupaq puntata parlarishun. Bibliaqa nin höraqa shonquntsik ‘nananqanta y alläpa llakishqa’ kanqantam (Sal. 51:17). Pero sirveqninkunataqa Jehová yanapanmi, awmi, “shonqunkunachö nanatsikoqkunata kachakëkätsinmi y herïdankunatam watëkan” (Sal. 147:3). Paqwë mana allikunapa pasëkashqapis yanapëkämäshunmi pëman markäkurnin mañakushqa y mandamanqantsikkunata cumplishqaqa (lei 1 Juan 3:19-22; 5:14, 15).

8. ¿Imanötaq Jehová yanapamantsik alläpa yarpachakushqa?

⁸ Höraqa pensënintsikpis tukï pruëbakunaman y llakikïkunamanmi chätsimantsik. Y kikintsikpa kallpantsikllapitaqa manam tsarakïta puëdentsiktsu, tsëmi pillapis kuyëpa parlapäramänata y kallpata qomänata wanantsik. Y Jehovämi salmokuna qellqaqtanö yanapamënintsikta puëden, pëqa kënömi cantarqan: “Tukïpaq yarpachakïnïkuna noqachö alläpa kaptinmi, shoqakïniki almäta shullpapar qallëkurqan” (Sal. 94:19). Hinamampis, Pablum këta qellqarqan: “Ama imapaqpis yarpacachäyëtsu, antis imano ecano carpis, Diosnintsicman ‘Grasias’ nicur mañaquicuyë. Tseno mañacuyaptiquim, Jesucristurecur Teyta Diosqa allapa espantepaq juclaya shonquta, y yarpeta qoyashunqui shumaq cawacuyänequipaq” (Fili. 4:6, 7). Awmi, Bibliata leinqantsik y leinqantsikman yarpachakunqantsikqa, alläpam yanapakun imëkakunapaq yarpachakushqa (2 Tim. 3:15-17).

9. ¿Imanötaq tsarakushwan mana alli sentimientokuna kaptin?

⁹ Alläpa llakikur qelanashqaqa itsa tukï mana alli sentimientokuna chämunman. Itsa huk asuntopaq Biblia ninqanta o congregacionchö cargo chaskinqantsikta cumplïta mana puëdenapaq kaqta pensashwan. Tsëkunata pasashqapis Jehoväqa yanapamënintsikta y shoqamënintsikta puëdenmi. Yarpärishun puëdeq nacionkunata ushakätsir israelïtakunata pushanampaq Josué cargota chaskiriptin Moises kënö ninqanta: “Kallpata tsariyë y sinchi kayë. Ama mantsakäyëtsu ni espantakuyëtsu pëkunapa nöpankunachö, Jehová Diosnikim qamwan ëwëkan. Manam qonqarishunkitsu ni paqwëqa haqirishunkitsu” (Deu. 31:6). Jehová yanapaptinmi Josuëqa israelïtakunata yëkatsirqan Jehová awnikunqan markaman y chikeqninkunata ushakäratsirqan. Hina tsënöllam Moisespis rikarqan Jehoväpa yanapakïninta Puka lamarpa israelïtakunata tsimpatsirnin (Éxo. 14:13, 14, 29-31).

10. ¿Imataq yanapamäshun imëka yarpachakïkuna qeshyatsimashqa?

¹⁰ Hina tukï yarpachakïkunam höraqa qeshyatsimantsik. Rasumpa kaqchöqa, cuerpontsik alli kanampaqqa yanapakunmi allikunata mikunqantsik, pununqantsik, ejerciciota ruranqantsik y limpio kanqantsik. Tsënö karpis, Diospa Palabran Biblia ninqanta wiyakurninqa imëka problema kaptimpis manam alläpaqa llakikushuntsu. Imëka yarpachakïkunapa pasarninqa apóstol Pablu pasanqankunamanmi yarpänantsik, pëqa kënömi nirqan: “Ima eca pasayämaptinpis ishquiyäraqtsu. Llaquiquicuna chämuptinpis tsaraquicäyamï. Chiquir qaticachäyämaptinpis, Teyta Diosqa manam jaqiyämantsu. Maqayämarnïpis, manaran wanuratsiyämanraqtsu” (2 Cor. 4:8, 9).

11. ¿Imaraq yanapamäshun Jehoväwan amigo kënintsik mana ushakänampaq?

¹¹ Hina imëkapa pasanqantsikkunapis Jehoväwan amigo kënintsiktam ushakätsita tïran. Y tsëkuna pasakuptimpis Kamakoq Teytantsikqa yanapëkämäshunmi. Palabranmi kënö awnimantsik: “Jehoväqa llapan ishkikaqkunatam tsarëkan, y muchkikashqa [umpukasha] këkaqkunatapis pallarikämunmi” (Sal. 145:14). ¿Imaraq yanapamäshun Jehoväwan alli kënintsikta mana oqranapaq? Congregacionchö anciänokunawan parlanqantsikmi (Sant. 5:14, 15). Hina Diosman markäkïnintsik pruëbaman churakaptinqa, shamoq tiempochö mana wanushpa kawakïta chaskinapaq kaqta yarparëmi yanapamäshun (Juan 17:3).

Unë witsan sirveqninkunata Dios shoqanqan

12. ¿Imanötaq Jehoväqa Abrahanta yanaparqan mana alläpa yarpachakunampaq?

¹² Santo espíritu yanapaptinmi huk salmista kënö nirqan: “Sirveqnikita ninqëkita yarpë, shuyätsimanqëkita. Tsëmi llakikïnïchö shoqaraman, porque ninqëkim kawëkaqta katsimashqa” (Sal. 119:49, 50). Kanan witsanqa Diospa qellqashqa Palabrantam katsintsik, y tsëchömi tarintsik tukï llakikïninkunachö mëtsikaq nunakunata imanö shoqanqanta. Abrahanpaq parlarishun. Alläpachi yarpachakurqan Sodömawan Gomorra ushakänampaq kaqta musyarir. Tsëmi Jehoväta kënö tapurqan: “¿Alli ruraq nunakunatawantsuraq mana alli nunakunata ushakäratsinki?”. Pëqa Abrahanta shoqarqan pitsqa chunkallatapis alli ruraq nunata tarirqa Sodoma markata mana ushakätsinampaq kaqta nirmi. Tsënö karpis, pitsqa kutiran tapurqan alli ruraqkuna más wallkaqllapis kaptin imata ruranampaq kaqta. Puntataqa qallarqan 45 nunakunapaq tapukurmi, tsëpitam 40, 30, 20, y 10 nunakunapaq. Diosqa mana piñakushpam wiyarqan tapukïninta, hina awnirqanmi chunkallapis alli nunakuna kaptinqa Sodoma markata mana ushakätsinampaq. Chunkallapis alli nunakuna mana këkaptimpis Lottawan warmi wambrankunataqa salvarqanmi (Gén. 18:22-32; 19:15, 16, 26).

13. ¿Imanötaq Ana rikätsikurqan Jehoväman markäkunqanta?

¹³ Kananna yarpärishun Elqanäpa warmin Änapaq. Wambrayoq këta alläpa munarpis, qolloq karmi llakishqa kawakoq. Tsëpaq yarpachakurmi Jehová Diosta mañakurqan, y sacerdötekunapa mandaqnin Elïnam kënö nirqan: “Israelpa Diosnin mañakunqëkita qoykushï”. Tsënö mañakunqampitam shoqashqa karqan, y tsënöpam “más llakikurqannatsu” (1 Sam. 1:8, 17, 18). Jehoväman alläpa markäkurmi llapanta pëpa makinchö haqirirqan. Y manam musyarqantsu mañakïninta imanö contestanampaq kaqta. Pero alläpa hukläyanam shonquncho sientikurqan. Tsëpita tiempo pasariptinnam, mañakunqanta Jehová contestanqanta musyarirqan qeshyaq tikrarir y huk ollqu wambrata qeshpikurir, y Samuel nirmi shutin churarirqan (1 Sam. 1:20).

14. ¿Imanirtaq shoqayänanta David wanarqan y pitataq mañakurqan?

¹⁴ Hina Davidtapis Jehoväpa shoqakïninqa alläpam yanaparqan. ‘Jehoväqa shonqu rikaq’ karmi, musyarqan joven David allita ruraq y pëta adoraq kanqanta, tsëmi akrarqan Israel nacionta gobernanampaq (1 Sam. 16:7; 2 Sam. 5:10). Tsënö kaptimpis, rey këkarnam Urïaspa warmin Bat-sëbawan punukïkurqan, y tsëta rurëkurnam mana pipis musyanampaq Urïasta wanïkatsiyänampaq mandarqan. Alläpa hatun hutsata rurëkunqanta cuentata qokurirnam, Jehoväman kënö mañakurqan: “Alläpa ankupäkoq [llakipäkog] kanqëkirëkur lluta rurënïkunata ushakäratsi. Pantanqäpita paqwë paqaramë [awiramay], y hutsäpita limpiaramë. Lluta rurënïkunataqa reqïmi, y hutsäqa nöpächömi imëpis këkan” (Sal. 51:1-3). Shonqumpita patsë hutsankunapita wanakushqa kaptinmi qollmi shonqu Davidtaqa Jehová perdonarqan. Tsënö kaptimpis tukïtam hiparqan mana alli rurëninkunapita (2 Sam. 12:9-12). Pero ciëlochö Teytan llakipanqanta musyarmi, yamë këta tarirqan.

15. ¿Ima yanapakïtataq Jesus chaskirqan manaraq wanutsiyaptin?

¹⁵ Jesus Patsachö kawanqan witsanqa tukï pruëbakunapa pasanantam Jehová permitirqan. Pero kë hutsannaq nunaqa Jehoväta manam imëpis haqirqantsu, tsënöpam rikätsikurqan Teytanllaman alläpa markäkunqanta, hina rikätsikurqanmi Teytanlla ciëlochöpis y Patsachöpis mandakoq kanqanta. Traicionayänampaq y wanutsiyänampaq ichikllana pishikaptinmi kënö mañakurqan: “Noqa munashqänoqa ama callatsuntsu, sinoqa qam munashqequino quecullatsun”. Tsë höram shoqanampaq, kallpata qonampaq huk ángel yuripurqan (Lucas 22:42, 43). Tsënömi Jehoväqa shoqarqan, kallpata qorqan y wanëkanqan hörachö yanaparqan.

16. ¿Imanötaq Jehová yanapamäshun pëman markäkunqantsikrëkur wanunantsik kaptimpis?

¹⁶ Noqantsiktapis Jehoväqa yanapamënintsikta puëdenmi pëta servita mana haqinapaq, hasta tsërëkur nunakuna wanutsimänantsik kaptimpis. Hina pëqa kallpata qomantsik wanushqakuna kawariyämunampaq kaqta awnimarnintsikmi. “Tsepitanam permitïconqa por ultimu wanïpis manana cananpaq” (1 Cor. 15:26). ¡Imanömi munëkuntsik tsë hunaq chëkamunantaqa! Diosqa kawaritsimunqam yarpëninchö llapan këkaqkunata, y yarpëninchöqa këkäyan sirveqninkuna y mëtsikaq más nunakunam (Juan 5:28, 29; Hech. 24:15). Kë awnikunqanman markäkunqantsikqa kallpatam qomantsik y yanapamantsik tsëta shuyaränantsikpaqmi, y masqa chikir qatikachämanqantsik tiempokunachömi yanapamantsik.

17. ¿Imanötaq Jehová shoqamantsik kuyashqa kastantsikkuna wanuyaptin?

¹⁷ Jehoväqa awnimarquntsik llapan wanushqa kuyë kastantsikkuna kawariyämunantam, y mananam kanan witsankunachönönatsu hipashun. Hinamampis Bibliaqa yachatsimantsik mana alli nunakuna ushakäyaptin “mana yupetapis puedipaq” nunakuna salvakuyänampaq kaqtam, y pëkunam mushoq Patsachö kawarimoqkunata chaskiyanqa y rasumpa kaqta yachatsiyanqa (Apo. 7:9, 10). ¡Imanö kushikïpaqmi tsëqa kanqa!

Mana imëpis ushakaq rikranwanmi tsarëkämantsik

18, 19. ¿Imanötaq Jehová sirveqninkunata kallpata qoshqa sasa tiempokunachö?

¹⁸ Huk alläpa shumaq y kuyanëpaq cancionchömi Moises kënö nirqan israelïtakunata: “Ratakuna [tsinkakuna] cuentam imëpis kawaq Diosqa, y hawanchömi këkan mana imëpis ushakaq rikran” (Deu. 33:27). Watakuna pasariptinnam profeta Samuel israelïtakunata kënö nirqan: “Jehoväta qatikäyanqëkipita ama rakikäkuriyëtsu. Llapan shonqïkikunawanmi Jehoväta serviyänëki. [...] Shutinrëkurmi Jehoväqa markanta haqirinqatsu” (1 Sam. 12:20-22). Rikanqantsiknöpis, Jehovällata, imëpis servikashqa y adorëkashqaqa, manam ni imë haqimäshuntsu. Antis yanapëkämäshunmi.

¹⁹ Kë ushanan alläpa sasa tiempokunachöpis, Jehoväqa markanta shoqëkashqallam y kallpatapis qoykashqallam. Pachak watapitapis masmi waranqëpayan cristiänokunata qatikachäyashqa y creiyanqanrëkur carcelayashqa. Tsë llapan cristiänokunam rikätsikuyan Diosqa sirveqninkunata sasa tiempokunachö cuidanqanta. Parlarishun Diosta sirvenqanrëkur unë Unión Soviëticachö ishkë chunka kima watakunapa carcelaränampaq condenashqa cristiano mayintsikpaq. Carcelarëkarpis imëkanöpam chaskirqan mikï cuentata Diospa yachatsikïninta, tsëmi yanaparqan kallpayoq y valoryoq kanampaq. Pëmi kënö nin: “Carcelaranqä watakunaqa Jehoväman markäkïtam yachakurqä, y pëqa kallpatam qomarqan” (lei 1 Pedru 5:6, 7).

20. ¿Imanötaq musyantsik Jehová ni imëpis haqimänapaq kaqta?

²⁰ Manam musyantsiktsu ima pruëbakunapa pasanapaq kaqta, pero imata pasanantsik kaptimpis allim kanqa salmista kënö ninqanta yarpanqantsik: “Jehoväqa manam markanta haqinqatsu” (Sal. 94:14). Pero shoqashqa këtaqa manam chaskinantsikllatsu. Sinöqa nuna mayintsikkunatapis shoqanantsikmi. Qateqnin kaq yachatsikïchömi rikäshun, kë tukï problëmayoq mundochö hipëkaqkunata yanapëta puëdenqantsikta.

[Päginapa ura kuchunchö willakï]

¿Ima nishwanraq?

• ¿Imakunataq höraqa alläpa llakikïman chätsimantsik?

• ¿Imanötaq Jehová sirveqninkunata shoqan?

• ¿Imataq shoqamantsik Diosta sirvenqantsikrëkur wanunantsik kaptimpis?

[23 kaq päginachö dibüjukuna y recuadru]

IMANÖRAQ TSARAKUSHWAN

▪ Shonquntsik llakikuptin Sal. 147:3; 1 Juan 3:19-22; 5:14, 15

▪ Mana alli pensënintsikkuna yurimuptin Sal. 94:19; Fili. 4:6, 7

▪ Mana alli sentimientokuna chämuptin Éxo. 14:13, 14; Deu. 31:6

▪ Qeshyapäkurnin 2 Cor. 4:8, 9

▪ Dioswan amigo kënintsikchö Sal. 145:14; Sant. 5:14, 15