¿Imanötaq Diosqa shoqamantsik?

Apostol Pablum Jehoväpaqa parlarnin kënö nirqan: “Shoqacoq Diosmi. Pemi shoqamantsic imapis nacaquinintsiccunacho” (2 Corintius 1:3, 4). Kë palabrakunawanmi Bibliaqa rikätsimantsik mana allikunapa pasëkashqapis Diosnintsik yanapamënintsikta puëdinqanta, y mana allikunapa pasëkashqapis shoqamanqantsikta.

Peru Jehovä Diosnintsik shoqamänata munarqa, juktam ruranantsik. Këman pensari: ¿imanöparaq juk doctorqa yanapamashwan pëwan cïtata mana jorqëkashqaqa? Profëta Amospis kënömi tapukurqan: “¿Tinkuyänampaq mana willanakushqa këkarqa, ishkaq puriyanmantsuraq?” (Amos 3:3). Tsëmi, Diospa Palabranqa kënö nimantsik: “Diosman witiyë, y pëpis qamkunamanmi witimunqa” (Santiägu 4:8, NM).

¿Imanötaq noqantsikman Dios witimunampaq kaqta següru kashwan? Puntataqa, kikinmi mëtsika kuti nimantsik yanapamënintsikta munanqanta (qateqnin kaq päginachö këkaq recuadruta rikäri). Jina, musyantsikmi unë tiempuchö y kanan tiempuchöpis nunakunata Diosnintsik shoqanqanta.

Rey Davidqa, kanan witsan nunakunanöllam, atska desgraciakunapa pasarqan y Diospa yanapakïnintam ashirqan kënö rogakur: “Yanapamänëkipaq rogakur qamman mañakamunqäta wiyëkallämë”. ¿Jehoväqa contestarqantsuraq? Awmi, Davidmi kënö nirqan: “Yanapamashqam, tsëmi shonqü alläpa kushikun” (Salmu 28:2, 7).

¿IMANÖTAQ JESUSPIS SHOQAKUR YANAPAKUN?

Shoqashqa këta wanayanqan hörakunachö Jesus yanapakunantam Diosqa munarqan. Tsëmi, ‘shonqunkunachö llakishqakunata jampinampaq’ y ‘shonqunkunachö nanatsikïkaqkunata shoqanampaq’ cargun qorqan (Isaïas 61:1, 2). Profecïa ninqannömi, Jesusqa alläpa yarpachakurqan ‘llapan utishqa y llaquishqa caqcunapaq’ (Mateu 11:28-30).

Jesusqa nunakunata shoqarqan alli consëjukunata qornin, alli tratarnin y höraqa qeshyëkaqkunata kachakätsirninmi. Juk kutim, leprayoq nuna kënö rogarqan: “Munarnenqa, cachaquecatsillämë”. Llakiparninmi Jesusqa kënö nirqan: “Munämi, cachacänequita” (Marcus 1:40, 41). Nunaqa kachakärirqanmi.

Kë Patsachö Diospa tsurin manana këkaptimpis, Teytanmi ‘shoqacoq Dios’ kar, sufrikaqkunata shoqarnin sïguikan (2 Corintius 1:3). ¿Imanötaq shoqamantsik? Rikärishun chusku yanapakïkunata.

• Bibliawan. “Porqui unë witsan qellqayanqankunaqa yachakunapaqmi qellqakarqan, tsënöpa alli tsarakïnintsikwan y Qellqarëkaqkunapa shoqakïninwan shuyäkïnintsik kanampaq” (Romänus 15:4, NM).

• Santu espïrituwan. ¿Imanirtaq cristiänukunaqa yamë këta tariyarqan, Jesus wanunqampita ichik tiempu pasarinqanllachö? Bibliaqa willakun, llapan cristiänukuna “Jehoväta llakitsita mantsarnin y santu espïritupa shoqakïninchö këkäyanqantam” (Hëchus 9:31, NM). Santu espïritu o Diospa kallpanqa alläpa poderyoqmi, y Diosqa utilicëtam puëdin imëkapa pasëkashqapis shoqamänapaq.

• Mañakïwan. Bibliam kënö nin: “Ama imapaqpis yarpacachäyëtsu”, “Diosnintsicman ‘Grasias’ nicur mañaquicuyë. [...] [tsëmi] Teyta Diosqa allapa espantepaq juclaya shonquta, y yarpeta qoyashunqui shumaq cawacuyänequipaq” (Filipensis 4:6, 7).

• Cristiänu mayintsikwan. Wakin cristiänukunaqa, rasumpa amïguntsikkunam kayan, pëkunachö shoqashqa këta ashinapaq. Tsëmi yanaqinkunapaq apostol Pablu kënö qellqarqan: “Pecunam allapa yanapayämarqan” “llaquiquicunata y sufrimientucunata” pasaptï (Colosensis 4:11; 1 Tesalonicensis 3:7).

Itsa tapukunkiman kë rikärinqantsik yanapakïkuna imanö yanapakunqanta. Qepa kaq yachatsikïchö nunakunapaq parlanqantsik willakïkunapita maslla yachakurishun. Pëkunanöllam, qampis Diosnintsik änikur kënö ninqanta cumpleqta rikanki: “Imanömi juk nunata mamänin shoqëkanlla, tsënöllam noqapis qamkunata shoqëkäyashqëkilla” (Isaïas 66:13).