Llakikushqakunapaq yanapakï
1 Kanan witsanchö nunakunaqa alläpam wanayan shumaq parlapänata. Tsëmi Reynintsik Jesucristota qateqkunaqa, sinchikuntsik “nanaq shonquyoqkunata hampinapaq” (Isa. 61:1).
2 ¿Imakunapitaraq parlashwan? Willapäkïnintsik llakikushqakunata yanapanampaqqa, shumaqpam y kushikuyänampaqmi nunakunata parlapärinantsik. Mundochö mana alli pasanqankunapita, y mana alli yachatsikïninkunapita parlarpis, Biblia rasumpa kaq nenqanta y Teyta Dios änimanqantsikkunapitam masqa yachatsikushwan. Tsëpis manam Armagedonpita yachatsikïta haqirishwantsu. Y willapäkunantsikmi “Jehovapa alli watampita, [hina] Diosnintsikpa piñakïnimpitapis”. Armagedonpita y mana alli nunakuna ushakäyänampaq parlarpis, manam Diospa Reinompita ‘alli willaquita’ haqirishwantsu (Isa. 61:2; Eze. 3:18; Mat. 24:14).
3 Wayin wayin: Imëpis tarintsikmi qeshyarnin llakikushqakunata, wanupukushqakunata, mana alli kawëwan hipaqkunata, qellëta mana tarir hipaq nunakunata. Tsëmi Diospa nunanqa ankupänan o llakipänan willapanqan nunakunata, Cristupis alläpa llakishqa warmita ‘ancuparqanmi’ (Luc. 7:13; Rom. 12:15). Willapäkoq, huk o ishkë textota llakikïnimpaqno leirapurpis, nuna parlaptin alliraqmi wiyanan, tsënöpa pensanqanta musyanampaq (Sant. 1:19). Puntata alli wiyarqa, listom këkäshun llakikushqakunata yanapanapaq.
4 Kënömi nishwan: “Bibliachö shumaq willapäkïtam qampaq leiramïta munä”. Parlanapaqqa alliran pensarishwan y mana allitanö nimashqapis shumaqpam parlapänantsik. Llakikushqakunata Bibliawan shumaq yanapëtam munantsik, tsënöpa kushikuriyänampaq. Tsëkunapaqqa atska yachatsikitam tarinki Razonamiento a partir de las Escrituras, 144 a 148 päginankunachö, “Estímulo” nishqan tëmacho. Hina qonkimanmi Diospa amïgon kashwanmi folletota y tsëpitanam yacharatsinkiman.
5 Llakishqakunata yanapashun: ¿Pillapis yanapakïta wanantsuraq kastëkicho, o vesïnïkicho, trabajaq o estudiaq mayikicho? ¿Imanirtaq sinchikunkitsu wayinman visitarinëkipaq y Bibliawan shumaq willapärinëkipaq? Ima llakitsenqanta musyarqa, manaraq ewarmi alleq yachakunkiman imanö parlapänëkipaqpis. Wakin wawqi panikunaqa cartakuyan o telefonopam qayakuyan. Imanö rurashqapis, nuna mayintsikta kuyanqantsikmi yanapamäshun ankupäkunapaq o llakipäkunapaq y Bibliawan shumaq parlapäkunapaq (Luc. 10:25-37).
6 Willapäkoq ewarqa, hina llakikushqakunata y ullpanashqakunatawanmi shumaq parlapänantsik, y tsënöpam shamoq kawëpaq yachëkätsishun. Kë shumaq willakïpitam hinantin Patsachö nunakuna wiyëta munëkäyan. Noqantsikmi alli shonquyoq nunakunata, y llakishqakunata shumaq parlapärishwan Dios änikonqampita. Imëpis yarpäshun ‘nanaq shonquyoqkunata hampinqantsik’ alläpa alli kanqanta (Isa. 61:1).