BIBLIACHÖ IMA NINQAN
Alläpa jutsallakushqaqa, ¿Jehovä perdonamantsikku?
Teyta Diostaqa kushitsita puëdintsikmi
Bibliachömi willakun nunakunaqa jutsa ruraq kanqantsikta. Adanpita yurishqa karmi llapantsikpis jutsasapa kantsik. Tsëmi höraqa mana allikunata rurantsik, peru tsëpitaqa mana allita ruranqantsikpitam llakikuntsik. Diospa Tsurin Jesucristuqa jutsapita salvamänapaqmi wanurqan. Pë wanunqanrëkurmi Teyta Diosqa jutsantsikpita perdonamënintsikta puëdin. Teyta Diosqa alläpa kuyakoq karmi noqantsikrëkur Tsurin wanunanta permitirqan (Leyi Romänus 3:23, 24).
Wakin nunakunaqa alläpa jutsata rurashqa karmi, “noqataqa manachi imëpis Teyta Dios perdonamanqatsu” nir pensayan. Tsënö kaptimpis, Bibliachömi kënö willakun: “Tsurin Jesuspa yawarninmi llapan jutsantsikpita limpiamantsik” (1 Juan 1:7). Awmi, alläpa jutsata rurashqa kashqapis, llapan shonquntsikwan arrepentikushqaqa Jehovä perdonamantsikmi (Leyi Isaïas 1:18).
¿Imatataq ruranantsik Jehovä perdonamänapaq?
Jehovä perdonamänapaqqa, imanir imatapis ruranqanta, imata consejamanqantsikta y imata mandamanqantsikta musyanapaqmi pëta reqinantsik (Juan 17:3). Pï nunapis jutsata rurayanqampita arrepentikuptin y cambianampaq kallpachakuptinqa, Jehovä perdonanmi (Leyi Hëchus 3:19).
Teyta Diostaqa kushitsita puëdintsikmi. Pëqa musyanmi jutsa ruraq kanqantsikta. Jehoväqa alläpa allim y llakipäkoqmi. Tsëqa, ¿manaku pëpa rikëninchö alli kanëkipaq imata ruranëkipaq kaqta musyëta munankiman? (Leyi Salmus 103:13, 14).