QARANCHÖ YACHATSIKÏPITA | DIOSPITA RAKIMAQNINTSIK ULIKÏKUNA
¿Puëdishwantsuraq Diosta kuyëta?
“‘Teyta Diosniquita cuyanqui llapan shonqiquiwan, llapan boluntaniquiwan y llapan yacheniquiwan’. Que mandamientum mas presisaq llapan mandamientupitapis.” (Jesucristu, 33 wata)a
Wakin nunakunapaqqa (runakunapaqqa) Diosta kuyëqa sasaran, porqui Dios imanö kanqan mana musyëpaq kanqanta, alläpa karuchö o mana alli kanqantam creiyan. Rikärishun wakinkuna niyanqanta:
“Diospa yanapakïninta mañakurpis, pë alläpa karuchö këkanqantam sienteq kä, y manakuyakoq kanqantam creeq kä.” (Marcu, Italia.)
“Diosta sirwita munaqmi kä, peru pëman witi mana puëdipaqnö kanqantam creeq kä. Mana kuyakoq, sinchipa tratakoq y imëpis castigakoq Diostanömi rikaq kä.” (Rösa, Guatemala.)
“Wamra karninqa castigamänarëkur jutsantsikkunallata Dios rikanqantam creeq kä. Tsëpitanam karuchö këkaqtanö rikar qallëkurqä, imëka juk mandakoq nunakunapaq mana yarpachakoqtanö.” (Raimunda, Canadä.)
¿Qamqa ima ninkitaq? ¿Puëdishwantsuraq Diosta kuyëta? Mëtsika watakunapam cristiänukunaqa tsënö tapukuyashqa. Jina 400 wata witsampita 1400 wata witsankunayaqmi, mëtsikaq nunakuna Diosta mantsarnin pëman mañakuyaqtsu. Unë witsan pasakunqankunata estudiaq nunam kënö nirqan: “¿Imanöraq juk jutsasapa nuna mañakunman tsëläya karu y alläpa jatun trönuman?”.
¿Imataq yanapakushqa nunakuna Diospita tsënö pensayänampaq? Rasumpëpaqa, ¿imatataq Biblia yachatsikun? ¿Fäciltsuraq kanman Diosta kuyë rasumpa kaqta pëpita musyarninqa?