BIBLIAPITA TAPUKÏKUNA
¿Imachötaq yanapamantsik Jesus wanunqan?
Diosnintsikqa nunakunata (runakunata) kamarqan, mana qeshyashpa imëyaqpis kë Patsachö kawakuyänampaqmi. Peru Adanqa Diosta mana wiyakurmi tsë llapanta oqrarirqan. Y pëpa tsurin karmi llapantsik, wanïta (wanuyta) herenciatanö chaskirquntsik (Romänus 5:8, 12; 6:23). Rasumpa kaq Dios Jehovämi Tsurinta kë Patsaman kachamurqan noqantsikrëkur wanunampaq, tsënöpa Adan mana allita ruranqanta altsanampaq. (Leyi Juan 3:16.)
Jesusqa wanurqan, kë Patsachö imëyaqpis kawakunapaqmi. ¿Mana wanushpa kawakï imanö kanampaq kaqtataq pensanki?
Jesus wanunqanrëkurmi, jutsantsikkunapita perdonashqa këta y imëyaqpis kë Patsachö kawakïta puëdintsik. Bibliaqa rikätsikun mana qeshyashpa (qeshyaypa), mana awkinyashpa (awkinyaypa) y mana wanushpa (wanuypa) imanö kawakunapaq kaqtam. (Leyi Isaïas 25:8; 33:24 y Apocalipsis 21:4, 5.)
¿Imanötaq Jesus wanunqanta yarpashwan?
Manaraq wanurninmi, Jesusqa discïpulunkunata nirqan wanunqanta yarpäyänampaq y sencïllulla rurayänampaq. Jesus wanunqanta cada wata yarpanqantsikmi yanapamantsik, Jehoväwan Jesus alläpa kuyamanqantsikman yarpachakunapaq. (Leyi Lücas 22:19, 20 y 1 Juan 4:9, 10.)