BIBLIAPITA TAPUKÏKUNA
¿Imanirtaq Jesuspa wanïninta yarpashwan?
¿Imanötaq shamoq tiempuchö kawashun Jesus wanunqanrëkur? (Isaïas 25:8; 33:24)
Jesuspa wanïninqa imapitapis mas precisaqmi, tsërëkurmi llapan nunakuna yapë mana wanushpa kawakïta tariyanqa. Nunaqa manam mana alli munëyoqtsu ni qeshyanampaq o wanunampaqtsu kamashqa karqan (Genesis 1:31). Tsënö kaptimpis, punta nuna Adanrëkurmi kë Patsaman jutsa rurë yëkamurqan. Jesusmi kawëninta entregarqan jutsapita y wanïpita salvamänapaq. (Leyi Mateu 20:28 y Romänus 6:23.)
Diosqa alläpa kuyakoq kanqantam rikätsikurqan noqantsikrëkur wanunampaq kë Patsaman Tsurinta kachamurnin (1 Juan 4:9, 10). Jesusqa qateqninkunatam mandarqan wanïninta yarpäyänampaq, tsë reunionchöqa churayänan karqan ichik vïnuta y tantatam. Llapan watakuna Jesuspa wanïninta yarparqa rikätsikuntsik Dios y Tsurin kuyamanqantsikpita alläpa agradecïdu kanqantsiktam. (Leyi Lücas 22:19, 20.)
¿Pitaq tantata mikunman y vïnuta upunman?
Wanïninta yarpäyänampaq qateqninkunata Jesus mandarqa juk conträtupitam parlarqan (Mateu 26:26-28). Kë conträtuqa yanapakurqan pëkuna y wakin nunakunapis ciëluchö mandakoq y sacerdöti kayänampaqmi. Jesuspa wanïninta yarpaq millonyëpayan nunakunapitaqa, wallkaqllam tantata mikuyanqa y vïnuta upuyanqa. (Leyi Apocalipsis 5:10.)
Cäsi ishkë waranqa watakunanam Jehoväqa akrëkashqa Tsurinwan juntu mandakayämunampaq kaqkunata (Lücas 12:32). Pëkunaqa yupashqallam kayan, peru Patsachö mana wanushpa kawaqpaq kaqqa mëtsikaqmi kayan. (Leyi Apocalipsis 7:4, 9, 17.)