BIBLIAPITA TAPUKÏKUNA
¿Imanirtaq Gobiernun shamunanta Diosta mañakushwan?
¿Maslla yachakurita munankimanku Diospa Gobiernumpita y ruramunampaq kaqpita?
Diospa Gobiernunqa ciëluchömi këkan. Tsë Gobiernu Patsaman shamunampaq mañakuyänampaqmi Jesusqa qateqninkunata yachatsirqan, porqui tsë gobiernum apamunqa alli y yamë kawakïta. Manam ni mëqan nunapa gobiernumpis maqanakïta, wanutsinakïta, mana alli rurëkunata ni qeshyakunata ushakätsita puëdinqatsu, peru Diospa Gobiernunqa puëdinmi y ruranqam. Tsurin Jesucristutam akrashqa tsë Gobiernupa mandakoqnin kanampaq, jina juk grüpu cristiänukunatapis pëwan mandakayämunampaq. (Leyi Lücas 11:2 y 22:28-30.)
Ichikllachönam Diospa Gobiernunqa llapan chikeqninkunata ushakätsinqa. Tsëmi, Gobiernun shamunampaq mañakurqa, mañakïkantsik kanan witsan gobiernukunapa rantin, pëpa gobiernun patsakänampaq. (Leyi Daniel 7:13, 14 y Apocalipsis 11:15, 18.)
¿Imanirtaq tsë Gobiernu noqantsikpaq alläpa alli?
Jesus nunakunata llakipanqanmi alläpa alli mandakoqman tikraratsin. Jinamampis, Diospa Tsurin karmi kallpayoq y tsëmi Teytanman nunakuna yanapanampaq mañakuyaptin yanapëta puëdin. (Leyi Salmu 72:8, 12-14.)
Dios mandakunqannö kawakoqkuna y Gobiernun shamunanta shonqupita patsë mañakoqkunaqa mëtsika bendiciontam chaskiyanqa. Yachakï tsë Gobiernupita Biblia yachatsikunqanta. Manam pësakunkitsu. (Leyi Lücas 18:16, 17 y Juan 4:23.)