QARANCHÖ YACHATSIKÏPITA | ¿RASUMPAKU DIABLU KAN?
¿Kantsuraq Diablu?
Juk angel ishkimushqata Diablutanö rikätsikoq imägin (Madrid, España)
Salvador markapita Rogelium kënö nin: “Wamra karqa Diosmanmi creeq kä, peru manam Diablumanqa. Mana alli portakuptïqa, mamänïmi kënö nimaq: ‘¡Diablum apashunki!’, y noqanam ‘¡apakamätsumpis!’ neq kä”.
Y qamqa, ¿ima ninkitaq Diablupita? ¿Qateqninchö niyanqampita mëqantaq rasumpa kaq?
Diabluqa manam kantsu. Nunakunapa mana alli munëninkunallam.
Diabluqa kanmi, peru nunakunapa kawëninkunamanqa manam mëtikuntsu.
Diabluqa juk alläpa puëdeq espïritum y mana allitam nunakunata ruratsita procuran.
Nunakunapa pensëninkunaqa jukläya jukläyam. ¿Mëqantataq creishwan? ¿Precisanku musyanantsik? Diablu mana kaptinqa, pëman creeqkuna ulikïchöchi (llullakuychöchi) kawakuyan. Rasumpa karninqa y kawënintsikman mana mëtikamuptinqa, pëta mantsaqkuna ardëchi sufriyan. Y Diablu kaptinqa y mana allita nunakunata ruratsita procurëkaptinqa, itsa pensanqantsikpitapis mas peligrösu kanman.
¿Diabluqa nunakunapa mana alli munëninllaku o rasumpaku kan? Rasumpa kaptinqa, ¿peligruchöku këkanki? Y tsënö kaptinqa, ¿imanötaq tsapäkïta puëdinkiman? Rikärishun tsëpaq Biblia imata yachatsikunqanta.