¿Imëtan Diospa gobiernunchö Jesus gobernar qallarqan? (2 kaq)

NABUCODONOSOR SUËÑUNQANTA YARPÄRISHUN

Juliu: ¿Buenos dias Ernestu? Yapëmi watukaqniki kutikämü. Cada shamuptïmi qamwanqa Bibliapita shumaq parlakuntsik.a ¿Imanöllatan këkanki?

Ernestu: Allillam këkä.

Juliu: Pasaq semänaqa, 1914 watachö Diospa Gobiernun gobernar qallanqanta imanir niyanqäpitam parlëkarqantsik.b Y yachakurqantsikmi Daniel librupa 4 kaq capïtulun tsëta maslla musyanapaq yanapamanqantsikta. ¿Yarpankiku tsëchö imapaq parlanqanta?

Ernestu: Awmi, gobernanti Nabucodonosor suëñunqampaqmi willakun.

Juliu: Awmi. Pëqa ciëluyaq chaq jatun montitam suëñurqan. Y suëñunqanchömi tsë montita o qeruta mutuyänampaq juk angel mandakunqanta wiyarqan. Tsëmi tsë montipa watsinllana o matsunllana y troncunllana quedarqan. Qanchis ‘tiempukuna’ pasariptinnam tsë montiqa yapë winarqan.c Y yachakurqantsikmi Bibliachö tsënö willakunqanqa ishkë kuti cumplikanqanta. ¿Yarpankiku puntata imanö cumplikanqanta?

Ernestu: Mmm... Nabucodonosorta pasanqanmi karqan, ¿aw? Qanchis watapam löcu tikrarqan.

Juliu: Awmi. Löcu tikrarmi gobernanti këta dejarqan. Ishkë kaq kutichönam, qanchis tiempupa Diospa jutinchö manana gobernayanqanchö cumplikarqan. Tsë tiempukunaqa Jesus manaraq shamuptin 607 watachö Jerusalenta ushakäratsiyaptinmi qallarqan. Tsë tiempupitaqa, manam Diospa jutinchö gobernaqkuna Patsachö karqannatsu. Tsë tiempukuna ushariptinmi Diosqa juk mushoq gobernantita churanan karqan, peru tsë gobernantiqa ciëlupitanam gobernanan karqan. Juknöpa nishqaqa, tsë qanchis tiempukuna ushariptinmi, Diospa Gobiernunqa ciëluchö gobernar qallëkunan karqan. Yachakurquntsiknam tsë qanchis tiempukuna imë qallanqanta. Kananqa tsë qanchis tiempukuna ëka tiempu kanqanta yachakurishun. Tsëmi yanapamäshun Diospa Gobiernun imë gobernar qallanqanta musyanapaq. ¿Entiendikanku?

Ernestu: Awmi, yarpëkänam pasaqchö parlanqantsikta.

Juliu: Allim. Kananqa yachakurishun tsë qanchis tiempukuna ëka tiempu kanqanta. Tsëkunata yarpänäpaqmi manaraq shamurnin alliraq yachakurqö. Alli entienditsinaqpaqmi kallpachakamushaq.

Ernestu: Yä.

QANCHIS TIEMPUKUNA USHARIPTINMI USHANAN TIEMPU QALLËKUN

Juliu: Gobernanti Nabucodonosorpa tiempunchö cumplikaptinqa, tsë qanchis tiempukunaqa qanchis watam karqan. Peru Diospa Gobiernunchö cumplikaptinqa, mas watakunaran pasanan karqan.

Ernestu: ¿Y tsëtaqa imanötan musyanki?

Juliu: Yarpäshun, Jesus manaraq shamuptin 607 watachö Jerusalenta ushakätsiyaptinmi tsë qanchis tiempukunaqa qallarqan. 607 watapita qanchis watata qepaman yuparqa 600 watamanmi chantsik. Y tsë wataqa manam Diospa Gobiernunwan imapis pasarqantsu. Manam tsëllatsu, pasaqchö yachakunqantsiknöpis, tsëpita atska tiempu pasanqanchömi Jesus kë Patsaman shamur nirqan tsë tiempukuna manaraq ushashqa kanqanta.

Ernestu: Awmi yarpämi.

Juliu: Tsëmi kë cäsuchöqa qanchis tiempukunaqa qanchis watallatsu, sinöqa mas tiemputam rikätsikun.

Ernestu: ¿Mas tiemputa? ¿Ëka tiemputa?

Juliu: Apocalipsis libruchö willakunqanmi Daniel libruchö ninqanta entiendinapaq y qanchis tiempukuna ëka tiempu kanqanta musyanapaq yanapamäshun. Apocalipsis libruchö willakunqanmi rikätsikun kima tiempu pullanqa 1.260 junaq kanqanta.d Tsëmi qanchis tiempukunaqa 2.520 junaqkuna. ¿Këyaq entiendikanku?

Ernestu: Awmi, peru 1914 watachö Diospa Gobiernun gobernar qallanqanta imanir niyanqëkitaqa manam entiendiraqtsu.

Juliu: Ama yarpachakuytsu, kanan höram yachakurishun. Wakin willakunqanchöqa, juk junaqpaq parlarmi Bibliachöqa juk watapaq parlëkan.e Tsëta cuentaman churashqaqa, 2.520 junaqqa 2.520 watakunam kanman. Jesus manaraq shamuptin 607 watapita 2.520 watata qepaman yuparqa 1914 watamanmi chantsik. Tsëmi Testïgukunaqa niyä tsë watachö qanchis tiempukuna ushanqanta y Diospa Gobiernunchö Jesus gobernar qallanqanta. Manam tsëllatsu, 1914 watapitam ushanan tiempupaq Bibliachö willakunqampis cumplikar qallëkurqan.

Ernestu: ¿Imakunatan cumplikashqa?

Juliu: Mateu 24:7 ninqanchömi Jesus willakurqan ciëluchö gobernar qallëkuptin imakuna pasanampaq kaqta, kënömi nirqan: “Juk nacionmi juk nacionwan guërrata ruranqa, juk gobiernum juk gobiernuwan pelyanqa, y wakchö këchömi mallaqë y terremötukuna kanqa”. Këchö rikärinqantsiknöpis, Jesusqa nirqan mallaqë y terremötukuna kanampaq kaqtam. ¿Manaku tsë watapita Bibliachö willakunqan cumplikanqanta rikarquntsik?

Ernestu: Awmi, tsëqa rasunmi.

Juliu: Jesusqa guërrakuna kanampaq kaqtapis nirqanmi. Apocalipsis libruchömi willakun tsë guërrakunaqa juk nacionllachö mana kanampaq kaqta, sinöqa entëru Patsachö kanampaq kaqta.f ¿Yarpankiku Punta kaq Jatun Guërra imë kashqanta?

Ernestu: Awmi, 1914 watachömi karqan. Jesus gobernar qallanqanta niyanqëki wata, ¿aw?. Manam imëpis tsëmanqa pensarqötsu.

Juliu: Awmi, qanchis tiempukunapaq y ushanan tiempupaq Bibliachö willakunqampita yachakurqa, llapantam shumaq entiendirintsik. Jehoväpa testïgunkunaqa segürum këkäyä 1914 watachö Jesus gobernar qallanqanta y tsë watapitaqa ushanan tiempuchöna kawëkanqantsikta.g

Ernestu: Tsë llapantam entiendita procurëka.

Juliu: Ama yarpachakuytsu, qallananllachöqa noqapis manam allillaqa entiendirqätsu. Peru ojalä yanaparishunkiman 1914 watapaq Bibliachö mana willakuptimpis, tsë watachö Jesus gobernar qallanqanta imanir creiyanqäta musyanëkipaq. Rikanqëkinöpis Jehoväpa testïgunkuna creiyanqanqa llapampis Bibliachömi këkan.

Ernestu: Awmi, tsëtam cuentata qokurqö. Qamqa imatapis Bibliawanmi yachatsimanki. Imata tapupteqpis manam “noqaqa pensä... “ o “noqaqa creï... “ nimankitsu. Sinöqa imëpis Bibliawanmi yachatsimanki. Peru ¿imanirtan Bibliata entiendinanqa fäciltsu? ¿Imanirtan Diosqa 1914 watachö Jesus gobernar qallanampaq kaqta cläru nirqantsu?

Juliu: Allim tsëkunaman pensanqëki. Bibliachöqa manam llapantatsu cläru willakun. Peru ¿imanirtan Teyta Diosqa tsënö qellqatsirqan? ¿O imanirtan Bibliata entiendinantsikpaqqa alliraq kallpachakunantsik? ¿Alliku shamoq semäna tsëpita parlakurishwan?

Ernestu: Awmi, allim kanqa. Shuyëkashqëkim.