BIBLIAPITA TAPUKÏKUNA

¿Rasumpaku Jesusqa wanushqakunata kawaritseq?

Jesus Läzaruta kawaritsin y pamparanqampita yarqamunampaq mandan — Läzaruqa chusku junaqnam wanushqa këkarqan Jesus kawaritsiptin

Bibliachöqa Jesus kawaritsikunqan willakïkunatam tarintsik. Këkunaqa manam cuentullatsu kayan, tsëchömi willakun imë y mëchö pasakunqanta. Tantiyarinapaq, 31 watakunam Jesusqa atskaq nunakunawan viajayarqan Capernaumpita hasta Nain markayaq. Tsëman chärirnam tarinakurqan atskaq nunakuna juk jövinta pampaq apëkaqkunawan. Y tsëchömi Jesus kawariratsirqan. Manam Biblia willakuptinllatsu tsë pasakunqanmanqa confiakuntsik, sinöqa atskaq nunakuna rikäyashqa kaptinmi. (Leyi Lücas 7:11-15.)

Tiempu pasariptinnam, Jesusqa chusku junaqna wanushqa amïgun Läzaruta kawaritsirqan. Tsëtapis atskaq nunakunam rikäyarqan, tsëmi cläru rikätsimantsik tsë kawarimï rasumpa kanqanta. (Leyi Juan 11:39-45.)

¿Imanirtaq wanushqakunata kawaritseq?

Llakipäkoq karmi Jesusqa wanushqankunata kawaritseq. Jinamampis, tsëtaqa ruraq kawëta Qokoq Teytan, poderninta qonqanta rikätsikunampaqmi. (Leyi Juan 5:21, 28, 29.)

Jesus kawaritsikunqankunam rikätsimantsik shamoq tiempupaq änikunqankunatapis cumplimunampaq kaqta. Pëqa millonyëpayan nunakunatam kawaritsinqa, Diosta mana reqeqkunatapis. Tsëmi pëkunapis reqita y kuyëta puëdiyanqa. (Leyi Hëchus 24:15.)

Maslla yachakïta munarqa, Rasumpëpaqa, ¿imatataq Biblia yachatsikun? librupa 7 kaq capïtulunta leyiri, kë librutaqa Jehoväpa testïgunkunam rurayämushqa

Jina www.jw.org/que päginapitam jorqëta puëdinki