BIBLIAPITA TAPUKÏKUNA
¿Wanushqakuna kawariyämunqatsuraq?
Wanushqakunaqa punïkaqnöllam (punuykaqnöllam) këkäyan, tsë ninanqa imatapis manam mäkuyantsu ni imatapis rurëta puëdiyantsu. Peru kawëta kamaq Diosqa puëdinmi yapë kawaritsimïta. Tsë rasumpa kanqanta musyanapaqmi, Jesusta poderta qorqan atskaq nunakunata kawaritsinampaq. (Leyi Eclesiastes 9:5 y Juan 11:11, 43, 44.)
¿Ima ninantaq wanushqakuna punïkaqnö këkäyanyanqa?
Diosmi awnikushqa kawaritsimunan höra chaptin, yarpëninchö këkaq wanushqakuna juk mushoq y alli Patsachö kawariyämunampaq kaqta. Llapanta puëdeq Diosmi kallpanta utilisëta munëkan wanushqakunata kawënin yapë qoykunampaq. (Leyi Job 14:14, 15.)
¿Imanöraq wanushqakuna kawariyämunqa?
Kawarimoqkunaqa musyayanqam pï kayanqanta, kastankunata y amïgunkunatapis reqiyanqam. Cuerpunkuna ushakashqa kaptimpis, Diosmi mushoq cuerpunkuna qonqa, peru unë kayanqannöllam kayanqa. (Leyi 1 Corintius 15:35, 38.)
Wallkaq nunakunallam kawariyämunqa ciëluchö täräyänampaq (Apocalipsis 20:6). Peru cäsi llapanmi kawariyämunqa mushoqyashqa Patsachö täräyänampaq. Manana imëpis wanïman yarparninnam, juk mushoq kawakïta yapë qallayanqa. (Leyi Salmu 37:29 y Hëchus 24:15.)