BIBLIAPITA TAPUKÏKUNA
¿Wanushqakuna kawariyämunqatsuraq?
Musyëmi kawëta qokoqqa, yapë qokïta puëdinqanqa
Jehovä Dioschömi “kawëqa këkan” (Salmu 36:9). Tsëmi, pëqa wanushqakunata yapë kawënin qoyta puëdinqanta nintsik. Shamoq tiempuchö tsëta ruranampaq kaqtam Bibliaqa nimantsik. (Leyi Hëchus 24:15.) ¿Imanirtaq Diosqa wanushqakunata kawaritsimïta munan?
Kamamaqnintsikqa mana wanushpa kë patsachö imëyaqpis kawakunatam munarqan (Genesis 1:31; 2:15-17). Y munanqanqa manam cambiashqatsu. Imëka problëmayoq wallka tiempulla kawashqam, alläpa llakikun. (Leyi Job 14:1, 14, 15.)
¿Kawarimoqkunaqa mëchöraq täräyanqa?
¿Diosqa nunata kamarqan ciëluchö kawayänampaqku? Manam. Ciëluchö kawayänampaqqa angelkunatam kamarqan, y noqantsiktaqa kë Patsachö kawanapaqmi (Genesis 1:28; Job 38:4, 7). Tsëta cuentaman churar, pensarishun Jesucristu nunakunata kawaritsinqanman. ¿Mëchötaq tsë nunakuna kawariyämurqan? Kë Patsachömi. Tsënöllam pasanqa shamoq tiempuchö mëtsika kawarimoqkunawampis: kë Patsachömi kawayanqa. (Leyi Juan 5:28, 29 y 11:44.)
Tsënö kaptimpis, wallkaq nunakunallatam Diosqa akrashqa ciëluchö kawaritsinampaq, tsëchöqa espïritu cuerpuyoqmi kayanqa (Lücas 12:32; 1 Corintius 15:49, 50). Pëkunaqa Jesucristuwan juntum, kë Patsachö nunakunaman mandakayämunqa. (Leyi Apocalipsis 5:9, 10.)