¿Pillapis wiyamantsiktsuraq?

Mëtsikaqmi creiyan mañakïqa tiempota perdilla kanqanta y pipis mana wiyanqanta. Wakinnam mañakïninkuna mana contestashqa kanqanta sientiyan. Diosman mana creeq nunam, Dios imanö kanqanman pensëkur mañakurqan, “imallatapis nimë” nir. Peru manash “ni imatapis” nirqantsu.

Tsënö kaptimpis, mañakïnintsikta Dios wiyanqantam Bibliaqa nimantsik. Diospa Palabranqa rikätsikun unë witsanchö juk markata kënö ninqantam: “[Diosqa] mana qonqëpam qayakunqëkita wiyanqa; y wiyarirqa, rasumpam contestashunki” (Isaïas 30:19). Jina juk versïculupis kënömi nin: “Alli kaqta ruraqkunapa mañakïninqa kushitsinmi” (Proverbius 15:8).

Jina Bibliaqa willakunmi mëtsikaqpa mañakïninta Dios wiyanqanta. Juk versïculum Jesuspaq nin ‘allapa rogacurmi mañacorqan poderninwan wanïpita libracoq Diosman’. Y pëqa ‘wiyecorqanmi’, tsëmi kawaritsirqan (Hebrëus 5:7). Mas willakïkunatapis tarintsik Daniel 9:21 y 2 Crönicas 7:1 textukunachömi.

Tsëqa, ¿imanirtaq wakin nunakunaqa sientiyan mañakïninkuna mana wiyashqa kanqanta? Bibliachö jutin yureq Jehovä Dios wiyamänata munarqa pëllatam mañakunantsika. Manam juk Dioskunaman ni unë kastantsikkunaman mañakushwantsu. Jinamampis, kë Patsata Kamaq Diosnintsikqa munan “pe munashqanno” mañakunatam. Tsënö rurashqaqa pë ‘wiyamänapaq’ kaqtam Bibliaqa nimantsik (1 Juan 5:14). Tsëmi Diosta reqinantsik y wiyakunantsik precisan.

Mëtsikaqmi pensayan, mañakïqa religionkunapa costumbrinlla mana kanqanta, antis Dios wiyamänatam següru këkäyan. Kenia nacionpita Isaacmi kënö nin: “Bibliata alleq entiendinäpaqmi mañakurqä. Y ichik tiempullatam yanapakïta chaskirirqä”. Y Filipïnas nacionpita Hildanam, cigärru shoqïta jaqita munarqan. Mëtsika kutim jaqinampaq kallpachakurqan, peru manam puëdirqantsu. Tsëmi qowanqa nirqan Diosman mañakunampaq, y tsënömi rurarqan. Pëmi kënö willakun: “Espantakurqämi Diospa yanapakïninta chaskirir. Cigärru shoqï munënïpis manam karqannatsu. Y chipyëpam viciüta jaqirirqä”.

Mañakïniki Dios munanqanmannö kaptinqa, ¿wiyashunkitsuraq?