Mañakïqa ¿Imanötaq yanapamantsik?

Imatapis manaraq rurar itsa kënö tapunki: “¿Imataraq këpita chaskishaq?”. ¿Tsënöllatsuraq mañakurnimpis pensashwan? Mañakurnin imata chaskinapaq kaqman pensëqa allillam. Diosman markäkoq Job nunapis kënömi tapukurqan: “Qayakuptïqa, ¿contestamanqatsuraq?” (Job 9:16).

Punta kaq yachatsikïkunachömi rikarqantsik mañakïqa religionkunapa costumbrinlla o juk tratamientulla mana kanqanta. Kamakoq Diosnintsikqa mañakïnintsikkunata wiyanmi. Pë munanqannö imatapis mañakushqaqa wiyamantsikmi. Y pëman witinapaqpis animamantsikmi (Santiägu 4:8). Tsëqa, ¿imataraq shuyarashwan seguïdu mañakunqantsikpita? Tsëpaq këchö maslla yachakurishun.

Yamë kawakïtam qomantsik

Problëmëkikuna kaptinqa, ¿alläpaku yarpachakunki? Bibliam kënö consejamantsik: “Mana jaqita mañakuyë” y “llapan wanayanqëkikunata Diosta musyatsiyë” (1 Tesalonicensis 5:17, NM; Filipensis 4:6, NM). Diosman mañakoqkunatam Biblia änin, ‘allapa espantepaq juclaya shonquta, y yarpetam Diosqa qoyashunqui shumaq cawacuyänequipaq’ nir (Filipensis 4:7). Ciëluchö këkaq Teytantsikman shonqupita patsë mañakurnin y yarpachakïnintsikkunata willarqä, mas tranquïlum sientikushun. Y Bibliaqa tsëta ruranapaqmi nimantsik: “Qepi cuenta lasäshoqnikita Jehoväman churë, y pëqa yanapashunkim” (Salmu 55:22).

Entëru Patsachömi, Diosman mañakuyanqampita mëtsikaq alli sientikuyan. Corea del Sur nacionpita Hee Ran jutiyoq warmim kënö nin: “Imëka problëmakunapa pasëkarnin Diosman mañakurqä, imëka lasaq qepïta jitareq cuentam sientikurï, y tsëqa alläpam yanapaman”. Filipïnaspita Ceciliam kënö willakun: “Wamräkunarëkurmi alläpa yarpachakü. Jina mamänïtam cuidä y pëqa manam reqimannapistsu. Diosman mañakunqämi yanapaman mas tranquïlu sientikunäpaq. Pëkunata cuidanäpaq Jehovä yanapamänampaq kaqtaqa musyämi”.

Sasa tiempuchömi shoqamantsik y kallpata qomantsik

¿Alläpa yarpachakïpaku pasëkanki? ¿Kawëniki peligruchö kanqantaku pensanki? O ¿mana allikunapaku pasëkanki? ‘Shoqacoq Diosman’ mañakurninqa yamë këtam tarinki. Y ‘pe shoqamanqantsictam’ Bibliaqa nin (2 Corintius 1:3, 4). Tantiyarinapaq, Jesuspis alläpa llakikurmi ‘gonguricur Diosman mañacurqan’. ¿Imaraq pasarqan? ‘Cielupita juc angel yurisquirmi, Jesucristota mas callpata gorgan’ (Lücas 22:41, 43, NTCN). Jina Diosta sirweq Nehemïaspis mana allikunapam pasarqan, Diospa munëninta rurar jaqinampaqmi, tukïnöpa mantsakätsiyarqan. Pëqa Diosmanmi mañakurqan “makïkunata shintsiyëkatsi” nir. Y tiempuwanqa Dios yanapanqan rikakärirqanmi, porqui mantsapakïnintam vencirqan y ruranampaq kaqtam cumplirqan (Nehemïas 6:9-16). Ghana nacionpita Reginaldmi kënö willakun: “Mana allikunapa pasëkarnin mañakurirninqa, pipis yanapamëta puëdeqta willareqnömi sientikurï y alläpa mana yarpachakunäpaq nimaqtanömi sientirï”. Awmi, Diosta mañakushqaqa shoqamäshunmi.

Diospa yachënintam chaskintsik

Höraqa decidinqantsikkunam kawënintsikta o familiantsikpa kawënintapis cambiarin. ¿Imata rurartaq alli kaqta akrashwan? Bibliam nin: “Sitsun meqequicunapapis yacheniquicuna pishenqa, Dios Yayaman mañaquicuyë. Pëqa llapan nunatam atsca yachenin qoyconqa, mana ajayashpa” (Santiägu 1:5). Yachëta mañakushqaqa, santu espïritunwanmi Diosqa yanapamäshun alli kaqta decidinapaq. Jesusmi nirqan, “cielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa” (Lücas 11:13).

Jutsannaq këkarmi Jesucristupis Teytanta mañakurqan imatapis alli decidinampaq. 12 discïpulunkunata akranampaqpis, ‘waraqninpim Diosman mañacorqan’ (Lücas 6:12).

Jina mëtsikaqmi pënölla kushikuyan alli kaqta akrayänampaq Dios yanapanqanta sientir. Filipïnaspita Regïnapis atska problëmakunapam pasarqan, qowan wanuriptinmi familianta manteninan karqan, trabäjunnaq quedakurqan, y wamrankunatam japallanlla wätanan karqan. ¿Imataq yanaparqan alli kaqta decidinampaq? Pëmi nin: “Mañakurmi Jehoväpa yanapakïninta ashï”. Ghana nacionpita Kwabëna jutiyoq nunam willakun, imanir Diospa yanapakïninta mañakunqanta: “Construccionchö alli trabajuyoqmi karqä, peru orqarirqämi. Alli decidir ima trabäjutapis akranäpaqmi Diosta imëpis mañakoq kä. Wananqäkunachö y Diospa kaqchö alli kanäpaq yanapamaq trabäjuta akranapaq Jehovä yanapamanqampitaqa segürum këkä”. Dioswan amïgu kënikita imapis ushakätsita munaptinqa, qampis yanapakïninta chaskita puëdinkim pëman mañakurqa.

Mañakurnin yanapakïkunata chaskita puëdinqëkipitaqa wakinllataran rikarquntsik. (Masta yachakuri, “¿Imakunachötaq mañakï yanapakun?” recuadruchö.) Mañakïniki wiyashqa kananta munarqa, Diostaran puntata reqinëki y änikunqankunata musyanëki. ¿Imanirtaq Jehoväpa testïgunkunawan parlarinkitsu Bibliapita maslla yachakurinëkipaq?a Itsa tsënöpa “mañakïkuna Wiyaq” Diosman witir qallëkunkiman (Salmu 65:2).