Teyta Diosman mañakunqantsikqa, ¿imanötan yanapakun?

Pamëlaqa alläpa qeshyapäkurninmi doctorkunaman ëwarqan. Tsëkunapa pasëkarpis Teyta Diosmanmi mañakurqan yanapëkunampaq. Teyta Diosman mañakunqanqa, ¿yanaparqanku?

Pëmi kënö willakun: “Cancer qeshyapaq jampiyämanqan höram alläpa mantsakoq kä. Peru Jehoväman mañakurninqa mas allinam sientikoq kä. Kanan witsankunapis nanapäkur-raqmi këkä, peru Diosman mañakunqäqa tsëman mana alläpa yarparänäpaqmi yanapaman. Nunakuna imanö këkanqäta tapuyämaptinmi kënö nï: ‘Manam allinötsu këkä, peru kushishqam sientikü’”.

Manam mana allikunaraqtsu pasamänantsik Teyta Diosman mañakunapaqqa. Llapantsikmi pasantsik imëka problëmakunapa, tsëmi Diosnintsik yanapamänata wanantsik. Mañakunqantsikqa, ¿yanapamantsikku?

Bibliam kënö nin: “Ima llakikïnikikunatapis TEYTA DIOSPA makinchö jaqiriyë. Pëmi imachöpis yanapayäshunki. Cäsuqninkunataqa manam imëpis jaqirinqatsu” (Salmus 55:22). Tsëqa, ¿mañakunqantsik yanapamantsikku? Teyta Diosqa yanapamäshunmi pë munanqannö mañakushqaqa (rikäri “¿Imanötan mañakunqantsikqa yanapamantsik?” neqta).

¿Imanötan mañakunqantsikqa yanapamantsik?

Yamë kanapaq

“Yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filipensis 4:6, 7). Imapaq yarpachakunqantsikta Teyta Diosta willashqaqa, yamë kanapaqmi yanapamäshun.

Yachaq kanapaq

“Sitsun qamkunachö pipapis yachënin pishinqa, tsëqa Diosta mañakurnin sïguitsun, [...] pëqa llapankunatam shonqupita patsë mëtsikata qon, y manam qokunqampita imatapis nikuntsu, y tsënö mañakurqa chaskinqam” (Santiägu 1:5). Ima mana allikunapa pasarmi höraqa allitsu decidintsik. Peru yachaq këta Teyta Diosta mañakushqaqa, pëmi yanapamäshun Palabran Bibliachö alli consëjunkunawan.

Ima pruëbakunachöpis alli tsarakunapaq

“Dios kallpata qomaptinmi imëkapaq kallpä kan” (Filipensis 4:13). Teyta Dios puëdeq karninmi mana allikunapa pasanqantsik höra, alli tsarakunapaq yanapamäshun (Isaïas 40:29). Tukuynöpa shoqakoq Dios kanqanta y llapan pruëbantsikkunachö shoqamanqantsiktam Bibliachöqa Jehoväpaq nin (2 Corintius 1:3, 4).