QARANCHÖ YACHATSIKÏPITA | ¿RASUMPATSURAQ KAN ANGELKUNA?
Angelkunaqa yanapamantsikmi
Alli kaq angelkunaqa nunakunapaqmi yarpachakuyan y Jehovä munanqanta rurarmi alläpa ocupädu kayan. Patsata kamar ushariptinmi, “Diospa llapan tsurinkuna sinchipa qaparir paqchillapa alabar” qallëkuyarqan (Job 38:4, 7). Pëkunaqa unëpita patsëmi, kë Patsachö ima pasakunampaq kaqta musyëta munayashqa (1 Pëdru 1:11, 12).
Diospa sirweqninkunata angelkuna yanapayanqantam Bibliaqa willakun, y tsëtaqa rurayarqan Dios munanqan cumplikänampaqmi (Salmus 34:7). ¿Pikunatataq yanapayarqan? Rikärishun:
Sodöma y Gomörra markakunachö alläpa melanëpaq portakoq nunakunata Jehovä ushakätsiptinmi, alli kaqta ruraq Lot-ta y familianta tsë markapita yarquyänampaq angelkuna yanapayarqan (Genesis 19:1, 15-26).
Unë Babilonia markachömi, Diosman creikoq kima jövinkunata rawrëkaq hornuman jitayänampaq condenayarqan. Tsëmi Diosqa “angelninta kacharqan sirweqninkunata salvanampaq” (Daniel 3:19-28).
Mallaqashqa leonkuna llawirëkanqanchö juk paqas llawirärirmi, Diospa willakoqnin Danielqa kënö nirqan: “Diosnïmi kachëkamushqa juk angelninta leonkunapa shiminta wichqarkunampaq” (Daniel 6:16, 22).
Unëpita patsëmi, angelkunaqa Diospa sirweqninkunata yanapayashqa.
PUNTA CRISTIÄNUKUNATAM ANGELKUNA YANAPAYARQAN
Jehovä Diospa munënin cumplikänanrëkurmi, punta cristiänukuna Diospita yachatsikuyanqanchö angelkuna yanapakuyarqan. Imanö yanapakuyanqanta, rikärishun:
Apostolkunata jorqanampaqmi, juk angel carcelpa punkunta kicharirqan y templuchö yachatsikur sïguiyänampaqmi nirqan (Hëchus 5:17-21).
Jehoväpa angelninmi Felïpita mandarqan, Gäza markaman kutikaq Etiopïa nunata yachatsinampaq. Tsë nunaqa Diosta adoraqmi Jerusalenman ëwashqa karqan (Hëchus 8:26-33).
Mana judïu kaqkuna cristiänu tikrayänanta munarmi, Diosqa angelninta tröpapa mandaqnin Corneliu nuna kaqman mandarqan. Tsë angelqa suëñïninchömi yuripurqan y apostol Pëdruta wayinman invitanampaqmi nirqan (Hëchus 10:3-5).
Carcelchö apostol Pëdru këkaptinmi, juk angel jorqarirqan (Hëchus 12:1-11).
ANGELKUNAQA YANAPAMANTSIKMI
Manam imapis rikätsikuntsu, unë witsannölla juk milagruta rurarnin Diosnintsik angelninkunawan nunakunata yanapëkanqantaqa. Peru kanan witsampaqmi Jesusqa kënö nirqan: “Llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa” (Mateu 24:14). ¿Musyarqëkiku angelkuna Diospita yachatsikïta dirigikäyanqanta?
Angelkunaqa Diospita yachatsikuyänampaqmi yanapakuyan.
Entëru Patsachö nunakuna Jehoväpita y munënimpita yachakuyänampaqmi, angelkunaqa llapan puëdiyanqanmannö yanapakuyan, tsëtam Revelacion o Apocalipsis libruqa willakun. Apostol Juanmi kënö qellqarqan: “Ciëlupa chowpinchö volëkaqtam juk angelta rikarqä, y mana ushakaq alli willakïkunatam katsirqan patsachö täraqkunata willanampaq, llapan nacionkunata, kastakunata, idiömakunata y markakunata. Pëmi sinchipa kënö nikarqan: ‘Diosta mantsayë y alläpa precisaqpaq churayë, porqui juzganan höram chäramushqa, tsëqa, ciëluta, patsata, lamarta y pukyukunata ruraqta adorayë’” (Revelacion 14:6, 7). Diospita yachatsikïchö angelkuna yanapakuyanqanqa clärum rikakushqa. Jinamampis, juk nuna jutsata ruranqampita arrepentikuptinqa, angelkunaqa alläpam kushikuyan (Lücas 15:10).
¿Imaraq pasakunqa Diospita manana yachatsikuyaptin? Ciëluchö këkaq tröpam Reykunapa Reynin Jesucristuwan juntu pelyayanqa, “Llapanta Puëdeq Diospa jatun junaqninchö” o Armagedon nishqan guërrachö (Revelacion 16:14-16; 19:14-16). “Señornintsik Jesuspita alli willakïkunata mana cäsukoq kaqkunapaq castïguta” Jesus apamuptinmi, angelkunaqa tsë mana cäsukoqkunata ushakätsiyanqa (2 Tesalonicensis 1:7, 8).
Yachakurinqantsiknöpis, atska kutim Jehoväqa angelninkunata utilizashqa sirweqninkunata cuidanampaq y yanapanampaq. Ama imëpis qonqëtsu, angelkunaqa qampaq y Diosta sirwita munaq nunakunapaqpis alläpam yarpachakuyan (Hebrëus 1:14).
Tsëmi salvakïta munarqa kënö tapukunëki: “¿Chaskikushaqtsuraq entëru Patsachö Diospita yachatsikuyanqanta?”. Diospa angelninkuna qamtapis yanapayäshunëkipaqmi, Jehoväpa testïgunkunaqa kushishqa yanapayäshunki.