Diosqa ushakäratsimunqanam sufrimientukunata

“¿Imëyaqraq yanapamänëkipaq qayakallämushaq Teyta Dios, y qamqa manataq wiyëkallämankitsu? ¿Imëyaqraq qayakallämushaq maqanakïkuna kaptin salvëkayämänëkipaq?” (Habacuc 1:2, 3). Tsëtaqa Diosnintsikpa rikënimpaq alli kaqta ruraq Habacuc nunam nirqan. ¿Diosnintsikman mana confiakurtsuraq tsënö nirqan? Manam. Diosqa willashqanam karqan sufrimientukunata imë ushakätsinampaq kaqta (Habacuc 2:2, 3).

Kikintsik o mëqan reqishqantsikllapis sufriptinqa, ¿Diosqa manatsuraq imatapis ruranqa? nishwanmi. Peru Bibliachömi kënö nin: “Jehoväqa manam änikunqanta cumplichö demorantsu, wakin nunakuna demorakoq këta rikäyanqannöqa, sinöqa qamkunarëkurmi pacienciakïkan, porqui manam munantsu pipis ushakänanta; tsëpa rantinqa, llapankuna arrepentikuyänantam munan” (2 Pëdru 3:9).

¿IMËTAQ DIOSQA IMALLATAPIS RURANQA?

Ichikllachönam. Jesusmi nirqan “imëkapis imanö këkanqampa” ushëninna kanqanta rikätsikoq señalkuna kanampaq kaqta y tsë witsanllachö kawaq nunakuna tsëkunata rikäyänampaq kaqta (Mateu 24:3-42). Tsëqa kanan witsankunam cumplikëkan, tsëmi rikätsimantsik Diosnintsikqa ichikllachöna imata karpis ruramunampaq kaqta.a

Peru ¿Diosqa puëdinmanku sufrimientukunata ushakätsita? Kë Patsallachöraq këkarmi Jesusqa rikätsikamurqan llapan sufritsimaqnintsik kaqkunata ushakätsimita puëdinqanta.

Kë Patsachö imëka desgracia pasakunqan. Juk kutim Jesuswan apostolninkuna Galilëa lamarchö këkäyaptin, fuertipa vientïkurqan y barcunkunatapis cäsim hundiratsirqan. Tsë kutim Jesusqa rikätsikurqan Patsachö imëka pasakunqankunata päratsinampaq pëpa y Teytampa poderninkuna kanqanta (Colosensis 1:15, 16). Kënöllam nirirqan: “¡Upälla! ¡Ama büllëtsu!”. Y tsë höram vientu pärarirqan, y llapanmi kanqanman chipyëpa kutikärirqan” (Marcus 4:35-39).

Imëka qeshyakuna. Mëtsikaqmi musyayarqan Jesusqa wiskukunata, cöjukunata, atäkiwan qeshyaqkunata, leprawan qeshyëkaqkunata y maskunawan qeshyëkaqkunata kachakätsita puëdinqanta. Bibliachömi nin, Jesusqa “llapan sufrikaqkunata” kachakätsinqanta (Mateu 4:23, 24; 8:16; 11:2-5).

Mallaqë. Yachatsikunqan witsanmi, Jesusqa ishkë kutichö Teytan qonqan poderninwan, mëtsikaq nunakuna mikuyänampaq ichiklla kayäpunqan mikïta atskaman tikratsirqan (Mateu 14:14-21; 15:32-38).

Wani. Këllachöraq kanqan witsanmi Jesusqa wanushqakunata kawaritsirqan, juknäqa chusku junaqnam wanushqa karqan. Tsëmi rikätsikun Diosnintsik Jehoväqa wanushqakunata kawaritsita puëdinqanta (Marcus 5:35-42; Lücas 7:11-16; Juan 11:3-44).