Mana kachakaq qeshyawan qeshyakurkurnin

71 watayoq Lindam kënö nin: “Pulmonnïchö y juk kaq aqishnïchö cancer kapamanqanta niyämanqanqa, imëka wanunäpaq kaqta niyämanqannömi karqan. Wayïman chärirmi kënö pensarqä: ‘Manam tsëtaqa shuyararqätsu, peru imata ruranäpaq kaqmanmi pensar qallëkurqä’”.

49 watayoq Ëlise jutiyoqmi kënö nin: “Itsoq kaq qaqllächömi juk qeshya tsarïkamarqan. Y tsë qeshya alläpa nanaptinmi, höraqa llakishqalla o piñashqanölla kakoq kä. Höra höraqa japallämi sientikü y wanukïllatanam pensäpis”.

Juk edäna nunatam puritsiyänan sïllachö kuyashqa kastankuna purikätsiyan

QAMTA o pïnikillatapis mana kachakaq qeshyarëkur wanunëkipaq kaqta nishqa kayäshuptikiqa, alleqchi musyanki tsëqa alläpa llakikïpaq kanqanta. Peru manam qeshyarëkurllatsu tsënöqa sientikunki, sinöqa tsëllamanna yarparäkurmi. Y masqa llakikunki y yarpachakunki doctor kutin kutin qayatsishuptiki, jampikuna alläpa chaniyoq kaptin o jampikuna mana allita rurashuptikim. Y tsëkunaman alläpa yarparäkunqëkim kallpannaqta sientitsishunki.

¿Imaraq yanapamashwan tsëkunapa pasashqa? Mëtsika nunakunatam Diosman mañakuyanqan y Bibliata leyiyanqan alläpa yanapashqa. Y wakinkunatanam, familiankuna y amïgunkuna kuyëpa tratayanqan yanapashqa.

¿IMATATAQ WAKIN NUNAKUNA RURAYASHQA?

Robertqa 58 watayoqmi, pëmi kënö consejakun: “Qeshyëniki alläpa mana llakitsishunëkipaqqa, Diosman markäkunqëkim yanapashunki. Jehoväman mañakurninqa imanö sientikunqëkita willari. Jehoväqa santu espïritunwanmi kallpata qoshunki y tranquïlu sientikunëkipaqmi yanapashunki”.

Jina Robertqa kënömi nin: “Familiëki yanapashunëkiqa alläpam precisan. Cada junaqmi, mëqan familiällapis imanö këkanqäta musyanampaq qayaman. Jina tsënöllam amïgükunapis rurayan. Tsënö rurayanqanmi, mas alli sientikunäpaq y alli tsarakunäpaq yanapaman”.

Juk qeshyëkaq amïguïkita watukaq ëwëta pensarqa, Linda kënö ninqanta rurë: “Qeshyëkaqkunaqa manam qeshyankunapita parlëta alläpa munayantsu. Tsëmi pëkunata watukaq ëwarqa, qeshyampita parlapänëkipa rantin juk cösaskunapita parlapë”.

Diosnintsik kallpata qoshunqëki, Bibliata leyinqëki, familiëkikuna y amïguïkikuna kuyayäshunqëkiqa; mana kachakaq qeshyawan këkarpis, alli kawakïta puëdinqëkitam rikätsishunki.

Diospa Palabranmi yanapashunki

Diospa yanapakïninta ashi

“Jehovätam tapukurqä, y pëqa contestamarqanmi, y llapan mantsanqä kaqkunapitam libramarqan. Llakishqa nunapa mañakïnintaqa, Jehoväqa wiyanqam” (Salmus 34:4, 6).

Lindam kënö nin: “Diostaqa manam kachakätsimänampaqtsu mañakü, sinöqa kallpata qomänampaq y alli tsarakunäpaqmi”.

Bibliata leyinqëkim yanapashunki

“Manam ni pï ninqanatsu: ‘Qeshyämi’” (Isaïas 33:24).

Shamoq tiempuchö Dios ruranampaq kaqman pensë. Tsëmi, tsëman mas markäkunëkipaq y aguantar sïguinëkipaq yanapashunki.

Familiëki y amïguïkikunapa yanapakïninta ashi

“Llapan tiempuchömi rasumpa amïguqa kuyakun. Y llakikï tiempuchö yanapamänapaq yurishqam” (Proverbius 17:17).

Ëlisem këta ruranëkipaq nin: “Amïguïkikuna yanapayäshunëkita ashi, y ama japallëkillaqa kakïtsu. Höraqa japallëki sientikurmi Dios mana wiyashunqëkita pensankiman, peru ama japallëkiqa kakïtsu”.