Ima nintaq Bibliachö Diospa Gobiernumpaq
Qateqninkunata Diosman mañakïta yachatsirninmi Jesusqa kënö nirqan: “Ciëluchö këkaq Teytalläkuna, jutiki alläpa respëtuwan rikashqa katsun. Gobiernïki shamutsun. Ciëluchö y patsachö munëniki rurakätsun” (Mateu 6:9, 10). ¿Imataq Diospa Gobiernun? ¿Imatataq rurëkan? ¿Imanirtaq tsë Gobiernupaq mañakushwan?
Diosqa Jesustam Gobiernunchö mandakoq kanampaq churashqa
Lücas 1:31-33: “Jesus nirmi jutin churanëki. Pëqa precisaqmi kanqa, y Llapampa Janampa Këkaqpa Tsurin nirmi reqishqa kanqa, y Jehovä Diosmi, teytan Davidpa gobernar täkunanta pëta qonqa, y Jacobpa mirëninkunatam Reynö imëyaqpis gobernanqa, y Gobiernunqa manam ni imëpis ushakanqatsu”.
Jesusqa Diospa Gobiernumpitam yachatsikurqan
Mateu 9:35: “Jesusqa llapan markakunapa y caserïukunapa ëwarmi qallëkurqan, Diosta adorayänan wayikunachö yachatsikur, Gobiernupita alli willakïkunata willakur y imëka nanatsikïyoqkunata y qeshyayoqkunata kachakätsir”.
Diospa Gobiernun manaraq chämuptin pasakunampaq kaqkuna
Mateu 24:7: “Juk nacionmi juk nacionpa contran sharkunqa y juk gobiernum juk gobiernupa contran sharkunqa, y më tsëchömi mikï pishinqa y patsa feyupa kuyunqa”.
Diospa Gobiernumpitam më tsë markakunachö yachatsikïkäyan
Mateu 24:14: “Llapan nacion nunakuna musyayänampaqmi, Gobiernupita alli willakïkuna entëru patsachö willakushqa kanqa, y tsëpitanam, ushakë chäramunqa”.