¿Imatataq Diospa Gobiernompita Jesus yachatsikurqan?

“Jinantinpa marcan, marcan estansiacunapa ewar[mi], willacur yachatsicorqan Diospa mandaquinincho cayänapaq alli willaquicunata.” (LUCAS 8:1.)

HUK kutim Jesus kënö nirqan: “Nunaqa parlan shonqunchö imatapis yarpanqantam” (Mateo 12:34). Tsëqa rasunmi, imapis gustamashqaqa tsëllapaqmi más parlantsik. Tsëmi Jesus yachatsikunqankunaman pensarqa, cuenta qokuntsik Diospa Gobiernon pëpaq más precisaq kanqanta.

¿Imataq Diospa Gobiernonqa? Kikin Dios patsätsinqan Gobiernom, y huk reytam churashqa gobernamunampaq. Y tsë Gobiernopitam Jesusqa më tsëchöpis yachatsikurqan, tsëmi Mateo, Marcos, Lucas y Juan librokunachö 110 kutipitapis más tsëpaq parlaqta tarintsik. ¿Imanöraq tsë Gobiernopita y noqantsikpaq ruramunampaq kaqta más musyashwan? Jesus ruranqankunapita y ninqankunapita alli yachakurmi.

¿Pitaq Diospa Gobiernonchö gobernaq? Tsëtaqa manam nunakuna votartsu akrayan; kikin Diosmi akrashqa. Y Jesusqa nirqan Dios pëta akranqantam.

Jesusqa allim musyarqan Bibliachö Dios awnikunqan Mesïasqa imëyaqpis gobernanampaq kaqta (2 Samuel 7:12-14; Daniel 7:13, 14; Mateo 26:63, 64). Tsëmi Dios awnikushqan Mesias kikin kanqanta willakurqa, gobernanampaq Dios pëta akranqanta rikätsikïkarqan (Juan 4:25, 26). Tsënöpam atska kuti ‘mandaquinï’ nirqan (Juan 18:36).

Hina Jesusqa parlarqanmi pëwan huk grupo nunakuna gobernayänampaq kaqtapis (Lucas 22:28-30). Y “wallcalla” nirmi yupashqalla kayanqanta pëkunapaq rikätsikurqan. Nïkurnam “Dios Yayam cushishqa qamcunata churayäshunqui pepa mandaquinincho cayänequipaq” nirqan (Lucas 12:32). Bibliapa ushanan kaq libronmi willakun 144.000 gobernayänampaq akrashqa kayanqanta (Apocalipsis 5:9, 10; 14:1).

¿Mëpitaraq gobernayämunqa? Gobernador Poncio Pilätuwan Jesus parlarmi kënö nirqan: “Noqapa mandaquinïqa manam que patsacho nunacunapa mandaquininnotsu” (Juan 18:36). Tsëmi Diospa Gobiernonchöqa kë Patsapitatsu mandakuyanqa. Antis ciëlopitam kanqa, tsëmi Jesuspis atska kuti “syelukunapa reynun” nirqan (Mateo 4:17, QKW; 5:3, 10, 19, 20, QKW).a

Jesusqa musyarqanmi Patsachö llapan rurëninta usharirninqa ciëlopa kutikunampaq kaqta. Tsëchömi ‘alistanan’ karqan huk sitiota llapan akrashqakunapaq, tsënöpa pëwan huntakäyänampaq (Juan 14:2, 3).

¿Imatataq ruramunqa tsë Gobierno? Qateqninkunata Diosman mañakuyänampaq yachatsirmi Jesus kënö nirqan: “Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mateo 6:9, 10). Diospa munëninqa ciëlochö rurakëkannam, y tsënöllam kë Patsachöpis Gobiernonwan Diospa munënin rurakanqa. Pero tsëpaqqa kë Patsachö imëka mana allikunataran altsamunqa.

¿Imanöraq kë Patsata altsamunqa? Jesusqa willakurqan Diospa Gobiernon llapan mana allikunata ushakätsimunampaq kaqtam. ¿Imanöraq tsëta ruranqa? Llapan mana alli ruraqkunata paqwë ushakätsirmi (Mateo 25:31-34, 46). Tsënömi chiki kë y mana alli rurëkuna ushakärinqa. Jesus willakunqannömi kë Patsachöqa kawayanqa “qollmi shonquyoqcuna”, alli ruraqkuna, llakipäkoqkuna, “limpiu shonquyoqcuna” y “amishtatsicoqcuna” o nuna mayinwan yamë kawakoqkunalla (Mateo 5:5-9).

Hinamampis pëkunaqa kawayanqa alläpa shumaq Patsachömi, y tsëchöqa mananam ni yaku, ni patsa, ni viento ni imapis rakchanatsu o iskanatsu kanqa; Jesus ninqannömi Diospa gobiernonqa kë Patsata paqwë altsaramunqa. Huk nuna wanunampaq këkar “noqalläta yarpecamanqui yö mandaquiniquicho quecar” niptinmi, “noqawan[mi] canqui paraiso nishqan shumaq cawaqui marcacho” nirqan Jesus (Lucas 23:42, 43). Awmi, Diospa Gobiernonqa punta Edén huertatanömi kë Patsata tikraratsinqa.

¿Ima mastaraq nunakunapaq ruramunqa? Diospa Gobiernon ruramunampaq kaqtaqa manam Jesus parlarqanllatsu, sinöqa ruranqankunawampis rikätsikurqanmi. Këman yarpärishun, pëqa imëka qeshyayoq nunakunatam kachakätsirqan, y tsënömi rikätsikurqan Rey karnin shamoq tiempochö ruranampaq kaqta. Santo espíritu yanapaptin Mateo willakunqannöpis, “Galilea probinsiacho jinantin marcacunapa purirnin[mi], ellucayänan wayicunacho Jesus yachatsicorqan Diospa Munenincho ca[yänampaq] alli willaquicunata. [Y] Tuquilaya qeshyacunawan jipaquicaqcunatam cachacätserqan” (Mateo 4:23).

Tukïläya qeshyayoqkunatam Jesusqa kachakätsirqan. Hasta wisku yurishqakunatapis kachakätsirqanmi (Juan 9:1-7, 32, 33). Huk kutinäqa, makinwan shumaq yatarirllam kachakäratsirqan alläpa melanëpaq lepra qeshyayoq nunata (Marcos 1:40-42). Y “mana wiyaq gaguta” apapuyaptimpis, ‘sorducunata wiyatsita y muducunata parlatsita’ puëdenqantam rikätsikurqan (Marcos 7:31-37).

Dios akrashqan reypaqqa wanïpita nunata sharkatsimunampis manam sasatsu karqan. Bibliam willakun kimaqta kawaritsinqanta: huk viudapa hapallan wambranta,12 watayoq shipashta y kuyë amïgon Läzaruta (Lucas 7:11-15; 8:41-55; Juan 11:38-44).

Jesusmi apóstol Juanta revelarqan Diospa Gobiernonchö nunakuna imanö kawayänampaq kaqta, kënömi nirqan: “Cananpitaqa Diospa wayincho wamrancuna juntunam pewan cawacuyanqa. Pellatam llapan nunacuna sirwiyanqa, y pellam Diosnincunapis canqa. Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam” (Apocalipsis 1:1; 21:3, 4). Hipakïkuna o ñakaykuna, nanatsikïkuna, y wanï manana kanampaq kaqman yarpëqa imanö shumaqmi. Tsë hunaq chäramuptinqa, ciëlochönö kë Patsachöpis Diospa munënin rurakänampaq mañakunqantsik paqwëmi cumplikäramunqa.

¿Imëraq Patsata gobernar qallamunqa? Pë ‘këkämunqanta’ musyayänampaq tukïkuna pasar qallanqan witsanlla gobiernompis qallamunampaq kaqtam Jesusqa yachatsikurqan. ¿Imëtaq pë këkämunqan witsan qallanan karqan? Tsëta musyarinapaqqa tukï pasanampaq kaqtam willakurqan. Hinantin Patsachömi imëka mana allikuna pasanan karqan: guërrakuna, mallaqëkuna, terremötokuna, imëka qeshyakuna, hina nunapura tukï mana alli ruranakïkunapis (Mateo 24:3, NM, 7-12; Lucas 21:10, 11). Tsëta Jesus willakunqankunaqa 1914 watapita witsëpam pasar qallëkurqan, tsë watam Punta Kaq Hatun Guërrapis qallarqan. ¿Imatataq këqa rikätsimantsik? Jesusna ciëlochö gobernëkanqantam. Tsëmi ichikllana pishin Jesus Patsata gobernar qallamunampaq y tsënöpa Diospa munënin rurakänampaq.b

Tsëqa, ¿noqantsikta yanapamäshuntsuraq Diospa Gobiernon chämur? Tsëqa kanqa Jesus yachatsikunqanta wiyakunqantsikpitam.

[Päginapa ura kuchunchö willakïkuna]