Yarpakachashun wakinkunapaqwan kuyëllawan y respetuwan tratarnin
1 Jehovaqa llapampa más Puedeqnin kekarmi, hutsasapa nunakunata allapa kuyëllawan y respetuwan rikan (Gén. 13:14; 19:18-21, 29). Alli willakinintsiktaqa alliyätsishun Jehová kanqanno karmi (Col. 4:6). Kë llapan rureqa manam alli kellatsu ni respetuwan nunakunata parlapänanllatsu.
2 Wayin wayin: ¿Imataraq rurashwan atska rurakïyoq kekaq nunakunaman charnin? Tseno kaptenqa ichikllam parlapärishwan o huk hunaqnam kutiramushaq nishwanmi. Hina publicacionnintsikkunata mana chaskimashqaqa respetuwan y kuyëwan, manam kutipëkuryanqa imekanöpis qoyta tïrashwantsu. Tsenollam nunakunapa imëkankunatapis respetashwan tsemi punkunkunatapis ewkurnin llawïkapushwan y wambrantsikkunatapis tsenollam yachatsishwan. Mana wayikunacho pitapis tarirnin publicacionnintsikkunata tsecho haqirqa, mana rikakoqllam churashwan. Tsemi kuyaki y respetuqa yanapamashun nunakunata allipa tratanapaq, pekunapis tsenolla noqantsikta tratamanantsikpaq (Luc. 6:31).
3 Callicho: Respetuosum hina kashwan callikunacho o nanikunacho yachatsikorqa, manam purikoqkunata atajapashwantsu ni qatukoqkunapa nöpancho kichkipashwantsu. Tsenollam hina respetuosu karnenqa raslla ewkikaqkunataqa parlapashwantsu, tiempuyoq kaqkunatanollam parlapashwan. Quizasmi callikunacho bullarekur wiyamashwantsu tseqa fuertillapam parlapashwan manam qaparipashwantsu wakinkuna rikämanantsikpaq (Mat. 12:19).
4 Ankupäkoq keqa imepis yanapamäshunmi razumpa kaqta willapäkunapaq. Ishkaq cristianakunash willapakoq ewëkar rikäriyanaq, huk warmi pasepa qeshyakïkaqtano carrupeq yarpureqta. Shakurirninnash tapuriyänaq imallataqa wanankush. Tsenash tse warmiqa espantakunaq mana reqeqninkuna yanapeta munayaptin, musyetash munanaq imanir tseno kuyakoq y alli kayanqanta. Kë alli rureninkunash yanapayanaq razumpa kaqta willapakuyänampaq. Kë warmiqa kushishqash willanaq mecho wayin kanqanta y watukayänantash munanaq. Tsenopash Bibliapeq yachakurnin qallekunaq. Rasllanash reunionkunaman ewar qallekunaq, kananqa pëpis razumpakaqtash wakin nunakunata yachatsin. Tsemi Jehová Diosta qatita munarqa, respetakoq y kuyakoq kashwan.