Allikunata imepis rurë, atska bendicionkunata chaskinekipaq
1. ¿Imanirtaq alli rikäneki, llapan Jehovapa kaqcho ruranqekikunata?
1 Qam cristianu keman chanqekichoqa, manachi faciltsu karqan tiemputa tarineki, llapan Jehovapa kaqta ruranekipaq: Bibliapita yachakuneki, reunionkunaman ewaneki, willapäkoq yarquneki, Jehovaman mañakunekipis, afanraqchi karqan. Jehovapa bendicionninwanqa espiritualmenti winarqonkim. Peru bautizakonqekipita kananyaq, ¿rurëkankiraqku, tseraq qallarnin ruranqekikunata?
2. ¿Imanötaq Biblia leyishqantsik yanapamantsik?
2 Jehovapa kaqcho ruranqekikunata rike: ¿Yachakankiku llapan hunaqkuna Bibliata leyirnin? Atska bendicionkunatam chaskishun tseno rurarqa (Jos. 1:8; Sal. 1:2, 3). Une Israelchoqa, kikin reymi, Leypita copiata horqarïkur, Bibliata leyinan karqan “llapan hunaq kawënincho”. ¿Imakunataraq tarinman tseta rurarqa? Humildi shonqutam tarinman, y Jehová mantsetam yachakunman, tseno Diospa leyninta mana haqinampaq (Deu. 17:18-20). Noqantsiktapis tsenollam Biblia leyishqantsik yanapamantsik, alli kanapaq, kë mana alli munducho. Nïkurmi yanapamantsik willapäkunapaqpis (Fili. 2:15; 2 Tim. 3:17).
3. ¿Ima bendicionkunatataq chaskintsik llapan reunionkunaman ewarnenqa?
3 Jesusqa yachakashqam karqan, ellukäyanqan wayiman ewëkur Biblia leyïta (Luc. 4:16). Kemi kallpata qorqan pruebakunata sufrirnin aguantanampaq. Noqantsiktapis reunionkunaman eweqa kallpatam qomashun, y tsechomi tarishun “noqantsikpura shumaqlla willapäkunapaqpis” (Rom. 1:12). Wawqintsikkunawan y panintsikkunawan ellukashqaqa, yanapamäshunmi kë mana alli tiempukunacho aguantanapaq (Heb. 10:24, 25). ¿Yachakashqanaku kanki llapan reunionkunaman eweta?
4. ¿Llapan semanakuna serviciuman yarqunqantsik, imanötaq yanapamantsik?
4 Bibliaqa willamantsikmi, apostolkuna Diospita willapäkur puriyanqanta “llapan hunaqkuna templucho y wayin wayin” (Hech. 5:42). Willapäkoq llapan hunaqkuna mana yarqurpis, ¿yachakashwantsuraq llapan semanakuna willapäkoq yarqita, revisitakunaman kutita o estudiukunaman eweta? Tseta rurarqa Diospa Palabrampita alleq willapäkoqmi kashun, y shumaq experienciakunam kapamäshun.
5. ¿Imanirtaq allapa alli, Jehovaman imepis mañakunantsik?
5 Profeta Danielmi chaskerqan atska bendicionkunata, “mana utishpa” llapan kawakïnincho Jehovata sirwinqampita. Jehovaman mañakipis Peta sirwillam karqan (Dan. 6:10, 16, 20). Tsenollam, noqantsikpis Jehovata imepis mañakushqaqa, Pë bendicimäshun espíritu santunwan (Luc. 11:9-13). Hina Pëqa chaskimäshunmi noqantsikman más witimur, tseqa huk amiguwannomi kuyanakushun (Sal. 25:14; Sant. 4:8). ¡Imeka shumaqraq këkunman! Atska bendicionkunatam chaskishun, imepis Jehovapa kaqcho, allita rurar kallpachakushqaqa.