Familiayoq ollqukuna, Diospa kaqta rurayänëkipaq tiempïkikunata patsätsiyë
1 Tukï diosta adoraq y mana allikunallata ruraq Babilonia markachö Daniel atska watakunana tärëkaptimpis, ‘mana haqishpa’ Jehoväta servinqampitam reqiyarqan (Dan. 6:16, 20). ¿Imataq yanaparqan Dios munanqannölla kawanampaq? Diosta adoranampaqshi tiemponta alli patsätsishqa kanaq ninmi Bibliaqa. Huk hunaqchö kima kutish wayimpa altusninchö Diosman mañakoq (Dan. 6:10). Dios munanqannölla kawakunampaqqa hina Leykunatapis mana haqïtachi leirqan. Tsënöpam Diosta kuyanqanrëkur wanutsiyänan këkaptimpis, Jehovätaqa mana haqerqantsu, tsëmi wanunampita Jehová tsaparqan (Dan. 6:4-22).
2 Kanan witsampis kallpachakunantsikmi “mäcoq mäcoqlla” këkänapaq (Efe. 6:18). Kawëkanqantsik mundoqa ‘diablupa muneninchomi caquican’ (1 Juan 5:19). Mana yarpanqantsik hörachomi contrantsik yarquyanman o fënintsik rikätsikunantsik tiempoman chärishwan. Hatun hipakïchömi Gog de Magog Diospa sirveqninkunata paqwë ushakätsita munanqa, tsëqa mana tsarakuyänampaqnömi kanqa. Tsëchömi Jehoväman paqwë markäkïta o yärakïta wanashun (Eze. 38:14-16).
3 “Familiawanmi Bibliata leinantsik y leinqantsikpitam yachakunantsik, y tsë rurëta yachakänantsikqa alläpam precisan.” Tsënö nirmi qallarqan 1998 wata asambleachö, kënö tïtuloyoq drama: “Familiakuna, llapan hunaqkuna Bibliata leirnin Diospita yachakuyanqëkinölla kawayë”. Tsëpitanam kënö yachatsimarqantsik: “Familiawan Bibliapita yachakuyänampaq tiempota patsätsir, rikëkaq cuenta leiyaptenqa, tsë yachakuyanqankuna allim yanapanqa. Masmi yachakuntsik, fënintsiktam sinchiyätsin o jinchiyätsin, y unë witsan alli portakoq warmikuna ollqukuna alli rurayanqampitam yachakuntsik, y rasumpa kaqta puntaman churanapaqmi yanapamantsik y kallpata qomantsik”. Jehoväpa kaqta alli rurayänëkipaqmi kanan yachakurishun, tsëmi ollqu kaqkunata niriyaq familiëkikunawan Diospa kaqta huk o ishkë rurëchö más alliyäyänëkirëkur, tiempïkikunata shumaq patsätsiyänëkipaq.
4 Cada hunaq Diospa Palabranta yachakuyë: “Dios churanqan Gobiernollana gobernamuptin y ciëlochönölla kë Patsachöpis Dios mandakonqanta rurayaptenqa, nunakuna ni animalkunapis ‘manam imanäkuyanqanatsu, ni mana allitaqa rurayanqanatsu’ (Isa. 11:9; Mat. 6:9, 10).” Këtam yachatsikorqan 11 de septiembrepaq 2001 watachö folleto Examinando las Escrituras diariamente nishqan. ¡Imanö kushikïpaqmi këkorqan! ¿Familiachö ollqu kaqkuna, mana haqitaku yachakïkantsik cada hunaqpaq textopita y comentarionkunapita? Tsë rurëqa alläpa allim. Qoyapa o wärëpa mana rurarqa, tsë hunaqlla huk hörachö allim rurayankiman. Huk teytam kënö nerqan: “Punukuyänäpaq mikï höram noqakunapaqqa más alli cada hunaqpaq textopita yachakuyänäpaq”.
5 Familiëkikunawan cada hunaq textopita yachakur këkäyanqëkiqa alläpa kushikïpaqmi. Kananqa itsa más yachakuriyankiman huk puchallatapis Bibliata leirnin. Wakinkunaqa cada hunaqpaq texto yarqamoqpitam llapan capïtulonta leiyan. Wakinkunanam Bibliapita huk librota akrarir wallka wallkalla leiyan. Cada hunaq Bibliata leiyanqëkiqa familiëkita yanapanqa, Jehová Diosnintsikta kuyar mana allikuna rurëta mantsayänampaq y Pë munanqanta rurayänampaqmi (Deu. 17:18-20).
6 Bibliata leiyanqëki y llapan hunaqpaq texto diariota familiëkiwan estudiayanqëkiqa más alli kanqa, yachakuyanqëki imakunachöpis yanapayäshonqëkita shumaq parlayaptikim. Benefíciese librom 60 kaq päginanchö kënö nin: “Akrarinkimanmi [...] semänachö leinapaq kaqpita huk ishkë versïculokunata, y tsëpita alli yacharatsirmi kënö tapurinkiman: ‘¿Imakunatataq yachatsimantsik kë versïculokuna? ¿Imanöraq wayin wayin ëwar kë yachakonqantsikkunawan yachatsikushwan? ¿Jehová imanö kanqantataq yachatsimantsik, y imanötaq yanapamantsik más kuyanapaq?’”. Këkunapita parlayanqëkim familiëkita yanapanqa Jehová ‘Diospa boluntaninta cäyiquita tïrayanampaq’ (Efe. 5:17).
7 Familiawan ëllukëkur o qorikëkur yachakuyänëkipaq: Diospa kaqta puntaman churë alläpa precisanqanta wambrankuna cuentata qokuyänampaqqa, teytakunam mana haqita Bibliapita familianta yachatsinan. Huk jövenmi teytan yachatsenqanta kënö yarpan: “Hörantaqa uryanqampita o arunqampita utishqa chämurmi yachakuyäna höra alläpa pununaq, hinapam yachakuyaq kayä, tsëmi yanapayämarqan yachakuyäna alläpa precisanqanta rikäyänäpaq”. Wambrakunapis yanapakuyanmanmi familiawan yachakï alläpa alli kanampaq. Huk hörakunachö alläpa sasa o aja kaptinshi, isqon wambrayoq familia, las cincolla shärikuyan yachakuyänampaq.
8 Familiachö yachakuyanqan shumaq kanampaqqa, kikin teytam ‘alli yachatsicoq’ kanan (1 Tim. 4:16). Benefíciese librom 31 y 32 päginankunachö kënö nin: “Familiëkiwan shumaq yachakuyänëkipaqqa, pëkuna imanöpis këkäyanqantaraqmi musyanëki. ¿Familiëki imanötaq Jehoväpa kaqchö këkäyan? [...] Wambrëkikunawan wayin wayin ëwayaptiki, ¿mana mantsakushpaku estudiaq mayinkunata Jehoväpa testïgonmi kä niyan? ¿Kushishqaku leiyan y yachakuyan Bibliapita? ¿Jehová munanqannöku kawayan? Teyta kaq, familiëkichö kaqkunata alli reqerqa, musyankim imanö yachatsinëkipaq kaqta, y yachakuyanqannö kawayänampaqpis yanapankim”.
9 Ëllukänapaq o qorikänapaq: Reunionkunapaq puntallapitana yachakuyänëkipaq, y tsëkunaman ëwayänëkipaqpis hörata patsatsiyänëkiqa, alläpam precisanan (Heb. 10:24, 25). Hörantaqa reunionkunapaq allichi familiëkiwan yachakuriyankiman. Reunionkuna chämunantaraq shuyaräyanqëkinöqa, ¿puntallapitana yachakuriyankimantsuraq? Reunionkunapaq alli yachakunapaq y tsëchö shumaq wiyakunapaqmi yanapakun hörata alli patsätsiqa (Pro. 21:5).
10 Tiempota alli patsätsenqantsik y mana haqishpa rurëmi yanapakun Diospa kaqta alli ruranapaq. Tsënö karpis, ¿llapan reunionkunapaq yachakunëkipaq tiempota mana tariptikeqa? Benefíciese libro 31 kaq päginanchömi kënö yachatsimantsik: “Ama imëpis lluta llutallaqa leinkitsu yachakorqömi ninëkillapaqqa, ni, manam leir llapanta ushashaqtsu nerqa ama yachakïta haqiritsu. Tsëpa rantenqa, yarpachakuri ëkata yachakunëkipaq y nïkur tsëllataraq alli yachakuri. Llapan semänakuna tsënö rurë, nïkurna wakin reunionkunapaq kaqtapis yachakï”.
11 Jehoväta alabayänampaq y shumaq yachakuyänampaq kaqta yarparëkäyänanllapaqnam yanapakun reunionkunaman temprano chëqa. ¿Tsënöku familiëki imëpis ruran? Tsëpaqqa tiempotam alli patsätsiyänëki y llapëkikunam shumaq yanapanakuyänëki. Reunionpaq alistakï höraraq familiëki imëkata rurar wakpa këpa purikachäyaptenqa, ¿alistakuyänëki hörata puntäratsiyankimantsuraq? ¿Kanku ima rurayänëkikunapis puntallatana rurayänëkipaq? Wayikichö mëqëkipapis atska rurayänëkikuna kaptenqa, ¿yanapanakuriyankimantsuraq? ¿Reunionkunaman ëwayänëkipaq más temprano listona këkäyanqëki allitsuraq kanman? Ordenado këmi yanapakun, wayichö y congregacionchö yamë këta tarinapaq (1 Cor. 14:33, 40).
12 Wayin wayin yachatsikïpaq: Diospa kaqpaq tiempota alli patsätsiqa wayin wayin yachatsikunapaqwanmi. Jayson shutiyoq jövenmi kënö nir yarpan: “Sábado qoyapam o wärëpam imëpis familiäwan wayin wayin yachatsikoq yarquyaq kayä, y tsëmi alläpa yanapamarqan, yachatsikïman imëpis más yarqurmi, käyerqä o mäkurqä alläpa alli kanqanta y más kushishqa kanqäta”. Cristiano teytankunawan winashqa wawqikuna y panikunapis käyiyashqam o mäkuyashqam yachatsikuyänampaq semänachö tiempota rakiqa, alli cristiano këman chäyänampaq, alläpa yanapanqanta.
13 Tiempota alli patsätsenqantsikqa yanapamäshun, familiantsikwan yachatsikonqantsikchö más kushishqa y alli yachatsikunapaqmi. ¿Imanötaq tsëta rurashwan? La Atalaya 1 de julio de 1999, 21 päginanchömi kënö yachatsikorqan: “¿Familiëkiwan yachakuyanqëki hörachö, ichik tiempota rakirinkiku yachatsikoq ëwar imanö parlayänampaqpis yanapanëkipaq? Tsënö rurëqa alläpam yanapakun (2 Tim. 2:15). Tsëqam yanapanqa yachatsikïta más kuyayänampaq y shumaq yachatsikuyänampaq. Tsëpaqqa, allichi wayin wayin ëwayänëkillapaq estudiariyankiman familiawan yachakuyänëki hörachö, y más allim kanman familiawan cada estudiarir huk rätulla wayin wayin ëwayänëkipaq yachakuriyanqëki, o semänachö huk hunaqkunapapis”. ¿Tsë nenqanta rurëkänkiku familiëkiwan?
14 Jehoväpa kaqchö masta rurashun: ¿Kë yachakonqantsikpita mëqanllatapis familiëkikunawan rurëkäyankinaku? Tsënö karqa, rurëkäyanqëki kushikïpaq kanqanta niri familiëkita y kallpachakuri más alli ruranëkipaq. Familiëkichö këkunata manaraq rurëkäyanqëkita rikarqa, hukta o ishkëta akrë, tsë kaqllataraq alli rurayänëkipaq. Y tsëkunata rurayänëkipaq tiempota allina patsätsishqa karqa huk o ishkë masta akrari. Alli yarqupushunëkipaq pensë y ichikllapa ichikllapayan alliyëta tïrë (Fili. 4:4, 5). Diospa kaqta ruranapaq tiempota alli patsätsiqa sasaraq o ajaraqmi, tsënö karpis allipaqmi kanqa Jehovämi kënö nimantsik: “Akranqan nänillapa ëwaqtaqa, salvacionnïtam rikätsishaq” (Sal. 50:23).