Familiakuna alli kawakuyänampaq

1. ¿Imanötaq yanaparqan sábado hunaqchö hamë familiayoq israelïtakunata?

¹ Sábado hunaqpaq Jehová mandakunqanqa, alläpam yanaparqan familiayoq israelïtakunata, awmi, sábado hunaqchö hamëqa Jehoväpa kuyakïninman yarpachakuyänampaq y pëwan alli këta tariyänampaqmi yanapaq. Hina teytakunataqa yanaparqanmi Jehoväpita wambrankunata shumaq yachatsiyänampaqpis (Deu. 6:6, 7). Llapan sábado hunaqkunam israelïtakunata yanapaq Jehoväman más witiyänampaq.

2. ¿Imatataq yachatsimantsik israelïtakunata sábado hunaq hamayänampaq Jehová mandanqan?

² Pero kananqa manam Jehová sábado hunaq hamanapaq mandakunnatsu. Tsënö kaptimpis, tsë Leyqa yachatsimantsik Diosnintsikqa imëpis markan pëpita alli yachakunanta munanqantam (Isa. 48:17, 18). Kuyakïnintaqa Jehová Dios rikätsikun kanan tiempopaq Familiachö Diosta Adorana Hörata patsätsimunqanwanmi.

3. ¿Imapaqtaq yanapakun Familiachö Diosta Adorana Hora?

³ ¿Imapaqtaq yanapakun Familiachö Diosta Adorana Hora? Enero killa, 2009 watapita patsëmi Libropita Yachakunapaq reunión rurakarnin qallëkurqan Yachatsikunapaq Diospa Escuëlan y Diospa Gobiernompita Yachatsikunapaq reunionkunawan junto. Tsëtaqa mäkoq mäkoq cumplido sirveq patsätsimurqan familiakuna semänachö huk ampi o paqas familianö junto Diospita yachakuyänampaqmi, tsënöpa Jehoväta kuyayanqan más sinchiyänampaq. Tsëmi nimarqantsik puntata librota estudianqantsik hunaq o hörachö familiantsikwan Diosta adoranapaq, Bibliapita y familiantsik wananqan tëmakunata yachakunapaqpis.

4. ¿Familiantsikwan huk hörallatsuraq yachakurishwan?

⁴ Libropita Yachakunapaq reunionman ëwanapaqqa atska tiempotaran wanarqantsik alistakunapaq y estudianqantsik wayiyaq ëwanapaqpis. Wakinnintsikqa atska hörakunataran wanaq kantsik kë reunionman ëwanapaq. Pero kananqa masnam tiempontsik kan familiantsikwan Diosnintsikta adoranapaq, tsëmi huk hörallatsu kanan, sinöqa más hörakunapis yachakurishwanmi. Y ëka hora yachakunantsikpaqqa, familiantsik imata wananqanta y yachakïta munanqantam rikänantsik.

5. ¿Llapan familiaraqku imëpis yachakunan?

⁵ ¿Llapan familiaraqku yachakunan? Llapan familiakuna y mana wambrayoq casädokuna Bibliapita yachakurqa, huknimpis huknimpis yanapanakuyanmi (Rom. 1:12). Familiakuna huknölla kayänampaqmi yanapan. Tsëmi alläpa preciso Familiachö Diosta Adorana Hora Bibliapita yachakunantsik. Pero familiachöpis hapallankunalla estudiëta puëdeyanmi. Maslla yachakïta munarninqa, puëdeyanmanmi cada uno yachakïta, itsa reunionkunapaq preparakïta o revistakunata leita. Wakin familiakunaqa tsë ampi manam ichikllapis televisionta rikäyantsu.

6. ¿Imanötaq Familiachö Diosta Adorana Hörachö yachakushwan?

⁶ ¿Imanötaq rurashwan? Manam tapukïwan y respuestawanraqtsu imëpis yachakunantsik. Wakin familiakunaqa yachakuyänampaq kaqta atskaman rakirïkurmi reunionchönö yachakuyan. Wakinkunaqa Bibliatam leiyan, reunionkunapaq yachakuyan y yachatsikoq yarquyänampaqmi practicayan. 6 kaq päginanchömi más yachatsikïkuna kan.

7. Familiachö Diosta adorayänan hora, ¿imanö kanampaqtaq teytakuna sinchikuyänan?

⁷ Familiachö Diosta adorayänan hora, ¿imanö kanampaqtaq teytakuna sinchikuyänan? Wambrakunaqa más yachakuyan, mana mantsatsishpa y kuyakïwan yachatsiyaptinmi. Itsa wayi rurin alläpa achachaptinqa, patiochö yachakuyanman. Hina utirirninqa, yachakur seguiyänampaq hamariyanmanmi. Wakin familiakunaqa imakunallatapis rurariyanmi yachakur usharir mikuriyänampaq. Itsa höraqa teytakuna wambrankuna imapapis pasëkäyanqanta rikäyänampaq tiempota rakiriyanman, pero manam Familiachö Diosta Adorana Hörachöqa piñapäyänantsu ni penqakatsiyänantsu. Tsëmi ima problëmakunapapis wambrankuna pasëkäyaptinqa hapallanllata y huk hörachö wambrankunata yanapariyanman, tsënöpa wakinkuna hananchö mana penqakatsiyänampaq. Familiachö Diosta Adorana Höraqa, manam mantsëpaq o qelanëpaqtsu kanman (1 Tim. 1:11).

8, 9. ¿Imanötaq preparakunan familianta pushaq cristiano?

⁸ ¿Imatataq ruranman familianta pushaq cristiano? Teyta puntallapitana imatapis yachakuyänampaq kaqta alistakuptinqa, alläpa kushikïpaqmi kanqa Familiachö Diosta Adorayänan Hora (Pro. 21:5). Qowaqa warminta nirinmanmi estudiota imanö rurayänampaq kaqtapis yanaparinampaq (Pro. 15:22). Hina, ¿imanirtaq wambrëkikunata tapurinkitsu imata yachakïta munayanqantapis? Tsëta rurarqa, más rasmi teyta musyarinqa wambrankuna imata yachakïta munayanqantapis.

⁹ Höraqa teytakuna manam alläpa tiempotatsu wanayanqa cada semana yachakuyänampaq kaqta patsätsirnin. Wakin familiakunaqa huk publicacionllatam cada semana yachakïta munayan. Y itsa yachakur usharirninlla huknin semana familianwan imata yachakuyänampaq kaqtapis rikärinman. Wakin teytakunanam huk papelman qellqarïkur imatapis yachakuyänampaq kaqta alëru rikakoqman churariyan. Tsënö rurayanqanmi familiata yanapanqa puntallapitana kushishqa alistakuyänampaq.

10. Hapallan kaq cristiänokuna, ¿imanötaq Familiachö Diosta Adorana Hora yachakuyanman?

¹⁰ ¿Imataraq ruräman hapallälla karqa? Hapallankunalla këkaqkunapis Familiachö Diosta Adorana Hora Bibliapita yachakïta puëdeyanmi. Yachakunapaq progrämaqa kanman Bibliata lei, reunionkunapaq preparakï y Täpakoq y ¡Despertad! revistakunata leïmï. Wakin cristiänokunaqa, yachakïta munayanqan tëmakunatam publicacionkunachö ashiyan. Y höraqa huk familiakunata o testïgokunatam invitayan wayinchö yachakuyänampaq.

11, 12. Llapan semana Familiachö Diosta Adorana Hora yachakurnin bendicionkunata chaskiyanqampita willakaramï.

¹¹ ¿Ima bendicionkunatataq chaskintsik Familiachö Diosta Adorana Hora cada semana yachakurqa? Shonqupita patsë Jehoväpa kaqta rurarqa, pëmanmi más witishun. Tsënö ruraq familiakunaqa masmi kikinkunapura kuyanakuyanqa. Këpaqmi huk matrimonio kënö willakun: “Ishkäkunam precursor kayä y manam wambräkuna kantsu, pero yachakuyäna hunaq chämunantaqa alläpa kushishqam shuyarëkuyä. Y ishkäkuna más kuyanakuyanqäta y Jehoväta más kuyayanqätam mäkuyä. Estudiayanqä hunaq chäramuptinqa, qoya qoyallam tapunakuriyä: ‘¿Imatam kanan hunaq rurashun?’ nishpa. Y ishkämi niriyä: ‘¡Familiachö Diosta Adorana hunaqmi kananqa!’”.

¹² Familiachö Diosta Adorana Höraqa, alläpa rurëyoq familiakunatapis yanapanmi. Huk cristiana hapallanlla ishkë ollqu wambrata wätaq precursöram kënö nishpa willakun: “Unëqa Familiachö Diospita yachakuyänäpaq alläpa sasa o ajam këkoq. Alläpa utishqa o pishipashqa karmi, hora höralla yachakuyaq kayä. Manam tiempota tariyaqtsu kayä. Tsëmi, Familiachö Diosta Adorana Hörata patsätsiyanqëkipita agradeciyänäpaq qamkunaman qellqarayämü. Kananqa cada semana yachakuyänäpaq hunaqta patsätsiyarqönam, y tsënö rurayanqäpitam atska bendicionkunata chaskïkäyä”.

13. ¿Imakunata rurartaq familiakuna bendicionkunata chaskiyanqa?

¹³ Sábado hunaqpaq Jehová unë mandakunqannömi, Familiachö Diosta Adorana Hörapis, familiakunata yanapanampaq Jehoväpa qarënin (Sant. 1:17). Unëqa, sábado hunaqchö rurayanqankunam yanapaq Jehoväwan más alli kayänampaq. Kanampis tsënöllam Familiachö Diosta Adorana Hörachö cada semana yachakurninqa, atska bendicionkunata chaskishun (2 Cor. 9:6; Gal. 6:7, 8; Col. 3:23, 24). Tsënö rurarqa salmistanömi qampis kënö ninki: “Noqapaqqa alläpa allim Diosman witï. Ciëlochö y Patsachö Autoridadyoq Teyta Jehovämi tsapämaqnïqa” (Sal. 73:28).

[5 kaq päginachö ninqan]

Familiachö Diosta Adorana Höraqa manam cada semana reunionnöraqtsu kanan, ni mantsanëpaqtsu, sinöqa Diosnintsik ninqannö kushikïpaqmi kanan

[6 kaq päginachö recuadru]

ALËROLLACHÖ KATSINËKIPAQ

Familiachö Diosta Adorana Hörachö imanö yachakunapaqpis

Biblia:

• Tsë semänapaq reunionchö Bibliata leinapaq kaqta wallkallatapis leiriyë. Y tsë leinqëkichö atskaq nunakunapaq qellqarëkaptinqa, drämachönö leiyämunampaq niri

• Bibliachö parlanqampita actuacionta rurariyë

• Llapëkikuna puntallapitana Bibliapa capïtulonkunata leirïkur huk o ishkë tapukïkunata qellqariyë. Tsëpitana llapëkikuna respuestanta ashiriyë

• Llapan semänakuna huk textota papelman qellqëkur de memoria yachakuyë, y tsëpitana tsë texto ima ninan kanqantapis parlari. Y llapan semänakuna tsë qellqayanqëki textokunata juntëkur leiyë, tsënöpa ëka textokunatapis yachakuyanqëkita musyayänëkipaq

• Bibliapita grabashqakunata wiyan wiyan Bibliachö qatiyë

Reunionkuna:

• Reunionchö yachakunapaq kaqta junto yachakuyë

• Shamoq semänapaq cantanapaq canticokunata yachakuriyë

• Yachatsikunapaq Diospa Escuëlanchö o Diospa Gobiernompita Yachatsikunapaq reunionchö mëqëkipis yarquyänëki kaptinqa, imanö rurayänëkipaq kaqtapis familiachö practicariyë

Familia wananqankuna:

• Los jóvenes preguntan o Aprendamos del Gran Maestro nishqan librokunapita yachakuyë

• Escuëlachö imata tapuyäshuptikipis imanö contestayänëki kaqta practicayë

• Wambrakuna yachakuyätsun huk tëmapita, tsëpita papäninkunata explikariyë, y tsënölla teytakunapis rurayätsun

Yachatsikoq ëwanapaq:

• Semana ushanan hunaqkunachö yachatsikoq yarqur imanöpis yachatsikuyänëkipaq kaqta alistakuyë

• Vacacionchö këkar o Jesuspa Wanïnin Yarpë witsanchö familianö masta rurayänëkipaq kaqta parlariyë

• Wallka tiempollachöpis tukïläya tapukïkunapa respuestanta yachakuriyë, tsënöpa yachatsikoq ëwarnin nunakunapa tapukïninkunata contestayänëkipaq

Këkunatapis rurayankimanmi:

• Tsëraq yarqamoq revistakunata llapëki leiyë

• Qepa yarqamoq revistakunapita huk tëmata akrëkur cada uno leitsun, y leinqampita Familiachö Diosta Adorana Hörachö parlakaramutsun

• Huk publicadorta o huk matrimoniota wayikikunaman invitëkur tapuriyë Jehoväpita imanö yachakunqantapis

• Vidëontsikkunata rikärir imata yachatsiyäshunqëkipitapis parlariyë

• ¡Despertad! revistapita “Los jóvenes preguntan” (Jövenkuna tapukuyanqan) o “Actividades para la familia” (familiakuna rurayänampaq) nishqan yachatsikïkunapita yachakuyë

• Täpakoq revistapita “Teyta mamankunapita wambrankunapaq” o “Jövenkunapaq” nishqan yachatsikïkunapita yachakuyë

• Anuario libropita o tsë wata asamblëakunachö chaskiyanqëki publicacionkunapita yachakuyë

• Hatun asamblëachö o ishkë hunaq o huk hunaq asamblëachö apuntayanqëkipita yapë yachakuriyë

• Jehová kamanqankunata rikärirnin, imata yachatsiyäshunqëkitapis parlariyë

• Llapëki huk dibüjota o mäpata rurayë, o uchukllanllachö arcata o imatapis rurayë