Familiachö o hapallantsiklla Bibliapita yachakunantsikqa alläpam precisan
1. Kanan witsan Jehoväpa Testïgonkunata Pushaqkuna, ¿Jehoväwan imanö kanatataq munayan y imanir?
1 Jehoväpa Testïgonkunata Pushaqkunaqa, unë cristianokuna kawayanqan witsanchönöllam Jehoväpa markan alli yachakunanta munayan (Hech. 15:6, 28). Tamyanampaq yanëpa yanar pukutë shamoqnöraqmi alläpa hatun hipaki hanantsikllachöna këkan, tsëmi, imëpitapis más Jehoväwan alli këkänantsik. Libropita Yachakunapaq huk hora reunionpa rantin, ¿imataraq kananqa rurashun? Tsë hunaqchö Jehoväta adoranapaq familiawan shumaq yachakorqa, allitam rurashun. Tsënöpam Diosnintsikpa Palabrampita más alli yachakushun, imëka yaku kuchuncho jacha o monti verderäkoqnöraq kanapaq (Sal. 1:1-3; Rom. 11:33, 34).
2. Familiawan Diosta adoranantsikrëkur, ¿imanötaq tsë hunaqta provechanantsik?
2 Familiachö Diosta adoranapaq hunaq: Familiachö ollqukunatam alli atikayaq o willapäyaq Jehová mandanqanta rurayänëkipaq, y churayanqëki höracho mana haqita Bibliapita yachakuyänëkipaq (Deu. 6:6, 7). Mana pitapis yanapaq hapallan kaqkunatanam niyaq, tsë tiempochö Bibliapita y tukï librokunawan shumaq yachakuyänampaq. Más yachakurnin y leinqantsikkunaman yarpachakurnin ‘tyemputa alleq probechanantsikmi’ alläpa precisan. Tsënöpam kë “mana alli” tiempokunachö Jehoväpa kaqchö alli tsarakushun (Efe. 5:15, 16, QKW).
3, 4. ¿Imakunawan y imarëkurtaq yachakushwan?
3 ¿Imapitaraq yachakushwan? Índice de las publicaciones Watch Tower y CD-ROM Watchtower Library nishqankunam yanapamäshun familiachö imata yachakïta munanqantsiktapis tarinapaq, tsënöpam familiachö yachakï alläpa shumaq kanqa. Ataläyakunapitapis allim yachakushwan “Familiakunapaq yachatsikïkuna” kaqta, “Teyta mamankunapita wambrankunapaq” kaqta, y “Jövenkunapaq” kaqtapis. Y ¡Despertad! revistapitapis yachakushwanmi, “Jövenkuna tapukuyanqan” kaqta, o Diosnintsik kamanqampita parlaqkunatapis.
4 Bibliata yachakun yachakun leinqëkim yanapashunki shonqïkiman chänampaq, alli yachatsikïkunata mana qonqanëkipaq, y Dios munanqannö kawakunëkipaq (Heb. 4:12). Hina allichi rikäyankiman y parlariyankiman Jehoväpa markampaq yarqamoq videokunapitapis. Imata y imanöpa alli yachakunapaqpis atska yanapakïkunam kan. ¿Imanirtaq familiëkichö kaqkunata tapurinkitsu imata y imanöpa yachakïta pensayanqantapis?
5. ¿Imanirtaq precisan hapallantsik y familiachö yachakunantsik?
5 Imëpitapis, ¿imanirtaq alläpa precisan? Jehoväwan alli kanapaq más yachakurnenqa, kë texto nenqanta wiyakunapaq listom këkäshun: “Alleq tsarakuyë, y Jehoväpa salvacionninta rikäyë” (Éxo. 14:13). “Jutsasapa nunacunapa nopancho” kawarmi teytakunaqa wanayan Diosnintsik yanapananta, tsënöpa wambrankunata alli yachatsiyänampaq (Fili. 2:15). Escuëlakunachö imëka mana allikunaman mana heqayänampaqmi, wambrakunaqa yanapayänëkita wanayan (Pro. 22:3, 6). Casädokunaqa Jehoväwan “kimapashqa waska” kayanqantam más chachaqyätsiyänan (Ecl. 4:12). Tsëmi tiempontsikta perditsinantsiktsu, tsëpa rantenqa ‘Teyta Diosman marcäquinintsiccho alli firmi tsaracushun’ (Jud. 20).