Valeq tesorotam confiamarqontsik
1 Apóstol Pabloqa alläpam kuyaq Diosnintsik willapäkunampaq mandanqanta, tsëmi willapäkipaq huk “tesoro” nerqan (2 Cor. 4:7). Kë willapäkita cumplinqanchomi, hipakïkunata y chikikïkunatapis aguantarqan. Llapan tarenqan nunakunatam mana utishpa willaparqan. Hina, patsapapis yakupapis, sasa y mantsëpaq chänan markakunamampis ewarqanmi. ¿Imanötaq Pablopa ejemplonta qatishwan y rikätsikushwan willapäkita kuyanqantsikta? (Rom. 11:13.) ¿Imanirtaq willapäkinintsik tesoro cuenta alläpa valoryoq?
2 Más alli kaq tesoro: Kë Patsacho tesorokunaqa llakikïkunayoqmi imëpis shamun, hinamampis ichik tiempollapam yanapamantsik. Pero, willapäkinintsikqa apamun mana ushakaq kushikitam, noqantsikpaq y nuna mayintsikpaqpis (1 Tim. 4:16). Hina yanapanmi alli shonquyoq nunakuna Jehovata reqiyänampaq, kawakïninta altsayänampaq, y mana wanushpa kawakita tariyänampaqpis (Rom. 10:13-15). Alli valeq tesorotano willapäkinintsikta rikarqa, y imapaq kawanqantsiktapis musyarnenqa, atska kushikitam tarishun. Hina animamäshunmi shumaq kawakita shuyaränapaqpis (1 Cor. 15:58).
3 Tesorontsikta kuyanqantsikta rikätsikushun: Imatapis kuyanqantsiktaqa rikätsikuntsik, tsepaqrekur imatapis rurarninmi. ¡Ima shumaqmi tiempontsikta y kallpantsikta Jehovata alabanapaq inshintsik! (Efe. 5:16, 17.) Imano tiempontsikta rakinqantsikmi rikätsikunman wakin cosaskunapitapis Diospa kaqta más valoranqantsikta. Kë shumaq tesorota katsirninmi, nuna mayintsikta kushishqa willapashwan y listo këkashwan imë horapis kë alli noticiapita willapäkunapaq.
4 Más valeq tesorokunataqa, imëpis llapan nunakuna rikäyanampaqmi churayan y manam tsapashqatsu katsiyan. Willapäkinintsikta huk tesorotano kawënintsikcho rikashqaqa, llapan ruranqantsikkunapa puntanchomi këkanqa (Mat. 5:14-16). Llapan shonquntsikwan kushishqa apóstol Pablo ruranqanno imëpis rurashun, y huk shumaq tesorotano rasumpa kuyanqantsikta rikätsikushun, imë horapis willapäkurnin.