Yachatsikïta ichikllapaq churashuntsu
1. ¿Imanötaq yachatsikïnintsikta mundochö nunakuna rikäyan?
1 Satanaspa mundonchö nunakunaqa Diospita yachatsikïtam “bujunäda[tanö]” rikäyan (1 Cor. 1:18-21). Y niyanqankunata cäsokurqa, llakikushunmi y shonqupita patsënatsu yachatsikushun (Pro. 24:10; Isa. 5:20). ¿Imanirtaq Jehoväpa testïgon kanqantsikta ichikllapaq churashwantsu? (Isa. 43:10.)
2. Yachatsikïta, ¿imanirtaq santo ‘willaqui’ nintsik?
2 Santo “willaquininta”. Apóstol Pabluqa Diospita yachatsikïtam santo ‘willaqui’ nirqan (Rom. 15:15, 16). ¿Imanirtaq yachatsikïtaqa santo nishwan? Yachatsikurqa, “santu” Jehoväpa o ‘Diospa mincancunam’ këkantsik, tsëqa Diospa shutin santo kanampaqmi yanapakïkantsik (1 Cor. 3:9; 1 Ped. 1:15, QKW). Jehoväqa rikanmi “llapan shonquntsicwan alabe[canqantsicta]”, tsëmi Diosta adoranapaqqa, alläpa precisan shonqupita patsë yachatsikunantsik (Heb. 13:15).
3. Diospita yachatsikïqa, ¿imanirtaq ima rurëwampis igualantsu?
3 Manam llapantsu Diospita yachatsikïtaqa puëdeyan. Angelkunaqa imanö kushishqaraq Diospita yachatsikuyanman (1 Ped. 1:12). Y imanö alliraq yachatsikuyanman. Pero ¡“allpa mancanolla queca[shqa]” o hutsasapa këkashqapis, noqantsiktam akramarquntsik tsëta ruranapaq! (2 Cor. 4:7.)
4. ¿Imanötaq yachatsikïta ichikllapaq mana churanqantsikta rikätsikushwan?
4 Más precisaq kaq. Diospita yachatsikunqantsikta alläpa kuyarmi, kawënintsikchö “ima alli o ima mana alli canganta” alliraq tanteanantsik. Tsëmi llapan semänakuna yachatsikoq yarqunapaq tiempontsikta rakintsik (Fili. 1:10, MTCS). Hinantin Patsachö huk reqishqa orquestachö tocaq nuna tsëchö këta munarqa, más alli tocanampaqmi kutin kutin yachakïkänan. Y ‘Diosnintsic munashqanno yachatsicunapaqqa’, yachatsikïman manaraq yarqurmi alliraq yachakunantsik, tsënöpa ‘shumaq pasensiawan Diospa palabranta willapäcunapaq’ (2 Tim. 2:15; 4:2).
5. ¿Pikunataq yachatsikushqa kushikuyan?
5 Ama Diospa kaqta qepaman churëtsu nunakuna tukïta niyanqanrëkurllaqa. Atskaq nunakuna Diospita yachakïta munayanqanta yarpë. Pero manam nunakuna kuyamänata munarnintsu yachatsikuntsik. Más alliqa Jehová kushikunqanman pensanqantsikmi, y pëqa kuyëwanmi kallpachakunqantsiktaqa rikarëkämun (Isa. 52:7).