Cristo yachatsikonqanno willapäkushun
1 Jesusmi willapäkitaqa yachatsimarqontsik. Tukïnopam y atska kutim rikätsikorqan, Diosta y nunakunata kuyanqanta. Wiyaki munaqkunatam rasumpa kaqta yachatserqan, y llakishqakunapaq y hipaqkunapaqpis allikunatam rurarqan (Mat. 9:35).
2 Jesús ruranqankuna y yachatsikonqankuna: Jesusqa manam imëpis willapäkita haqeqtsu, politicakunaman ni nunakunapa yanapakï arreglonkunaman mëtikurnin. Pëqa manam munaqtsu, ni ima rurëkuna alli kaptimpis willapäkinimpa puntancho kananta (Luc. 8:1). Nunakunapa hipakïninta Diospa Reinonlla altsamunan kaptinmi, pëqa Reinopita willapäkita haqeqtsu. Pepaqa preciso uryakïninmi kaporqan, këtaqa ichik tiempollachomi cumplinan karqan. Capernaumcho täraq nunakuna tse markacho quedakunanta munayaptinmi, Jesús discipulonkunata nerqan: “Huk ladopa ewashun [...] tsechöpis willapäkunapaq, tsepaqrekurmi shamorqo” (Mar. 1:38).
3 Discipulonkunata alleq yachëkatsirmi, mandarqan willapäkoq ewayänampaq këno nirnin: “Willapäkuye këno nishpa: ‘Cielopa reinonqa këllachönam’” (Mat. 10:7). Pëqa discipulonkunatam yachatserqan kawëninkunacho Diospa Reinonta puntaman churayänampaq (Mat. 6:33). Cieloman manaraq kutirnin nenqanmi, alleq rikätsikorqan imata rurayänampaqpis: “Ewayë, y discipulokunata rurayë tukïlaya nunakunata hinantin markakunacho” (Mat. 28:19).
4 Diospa Reinonmi alläpa preciso: Jesuspa parlakïninchoqa Diospa Reinonmi puntacho karqan, y discipulonkunatam nerqan ruranqanno rurayänampaq. Nunakuna problemakunata altsayämunampaq imekata rurarnimpis, manam altseta puedeyantsu (Jer. 10:23). Diospa Reinonllam Jehovapa shutinta santoyätsenqa y nunakunapa hipakïninkunatapis altsamonqa (Mat. 6:9, 10). Diospa Reinompita yachatsenqantsikmi yanapanqa, ‘mana alli rurëkunata rikarnin waqaqkuna y llakikoqkuna’ kushishqa y shumaq kawayänampaq kë tiempocho, shumaq kawakita shuyararnin (Eze. 9:4).
5 Diospa Reinompita alli noticiakunata willapäkuyanampaqqa, Jesusqa hawkallam uryekan y yanapamänantsikpaqpis nimantsikmi (Mat. 28:20). ¿Jesús yachatsimanqantsiknoku willapäkikantsik? (1 Ped. 2:21.) Kë ushanan tiempokunacho llapan puedenqantsikno Jesús ruranqanta rurashun, willapäkurnin Jesús yachatsimanqantsikno.