Reunionkunata y willapäkita haqishqakunata ama qonqashuntsu
1. ¿Imataraq rurashwan reunionkunata y willapäkita haqishqakunata animanapaq?
1 ¿Reqinkiku pillatapis reunionman y willapäkoq eweta haqishqata? Itsa wayin wayin willapäkikarnin tarirqontsik pillatapis congregacionwan mana ëllukaqtana. Tsëno kaptimpis yarpänantsikmi, tse nuna wawqintsik o panintsikllaraq kanqanta. Hawkallaraq kuyanqantsikta, y congregacionman kutinanta munanqantsiktam rikätsita munantsik. Hinamampis “almantsikpa rikaqninman y mitseqninman” kutinampaq yanapeta munanqantsiktapis (1 Ped. 2:25).
2. ¿Imanötaq animashwan reunionman y willapäkoq mana ewaqkunata?
2 Yarparanqantsikta rikätsishun: Telefonopa ichikllapis parlapäri o rasllapis watukarimi, rikätsenqa mana qonqanqantsikta. ¿Imataraq nishwan? Pëman pensëkanqantsiktam ninantsik; tsëmi kushitsenqa. Shumaq y alli cosaskunapitapis parlapäshun (Fili. 4:8). Parlapärishwanmi, tseraq reunioncho yachakonqantsikpita y gustamanqantsik temapitapis. Hina invitashwanmi reunionman o shamoq asambleaman, y nishunmi täkunampaq sitiota guardanapaq o ewanampaq yanapanapaqpis.
3. ¿Imanötaq huk pani yapë reunionman y willapäkoq ewar qallëkorqan?
3 Willapäkuyanqanchomi tariyarqan huk panita ishke chunka watana reunionman y willapäkoqpis mana ewaqtana. Estudiota ofreciyaptin mana munëkaptimpis, willapäkoq paniqa seguidom apapaq qepa yarqamonqan revistakunata. Asamblea de distrito usharenqanchomi kë publicadora visitarqan y willarqan más preciso yachatsiki wiyanqankunata. Këmi yanaparqan tiempowan reunionman y willapäkoqpis ewanampaq.
4. ¿Imanötaq rikashwan huk wawqi o huk pani yapë reunionkunaman shamur qallëkuptin?
4 Pipis yapë kutimuptin: ¿Imanötaq parlapashwan reunionkunaman huk wawqi o huk pani yapë shamur qallëkuptin? ¿Imanötaq Jesús parlaparqan discipulonkunata wanunampaq këkaptin haqiyanqampita? Wanonqampita kawariramurmi kuyëpa “wawqilläkuna” nishpa qayarqan y pëkunaman confianqantapis rikätserqanmi, huk shumaq uryeta rurayänampaq qornin (Mat. 28:10, 18, 19). Tsepita ichikllatanam, pëkuna “mana hamashpa” willapäkur qallëkuyarqan (Hech. 5:42).
5. ¿Imakunata manaraq rurartaq, ancianokunawan parlashwan?
5 Atska tiempopa Jehovata haqishqakunata estudiatsinapaq manaraq nirninmi o willapäkiman manaraq invitarninmi, ancianokunawan parlashwan. Willapäkonqantsikcho, reunionta y willapäkita haqishqakunata tarirnenqa, willanantsikmi ancianokunata necesitanqanmanno shumaq yanapayänampaq.
6. ¿Ima kushikitaraq chaskishwan reunionkunata y willapäkita haqishqakunata yanaparnenqa?
6 Bibliaqa alleqmi willamantsik, ushananyaq aguantaq kaqmi salvakonqa (Mat. 24:13). Tsëmi, yanapashun espiritualmente mana alli këkaqkunata. Jehovapa kuyakïninta shumaq rikätsikur y rasumpa interesäkushqaqa, itsa kushishqa rikäshun noqantsikwan pëkuna Jehovata yapë servirnin qallëkuyaptin (Luc. 15:4-10).