¿Imanöraq yanapashun Jesuspa Wanïnin Yarpëman shamoqkunata?
1. 22 de marzo de 2008 watachö, ¿ima shumaq yachatsikïraq kanqa?
1 Hinantin Patsapam 22 de marzo de 2008 watachö, atska millón nunakuna chaskiyanqa shumaq yachatsikïta. Jesuspa Wanïnin Yarpëman shamoqkunaqa wiyakuyanqa, Jehová kuyamarnintsik Tsurin wanunanta haqinqantam (Juan 3:16). Hina yachakuyanqam Diospa Reinompita, y tsë Reino Jehovapa munëninta Patsapaq imanö ruramunantapis (Mat. 6:9, 10). Hinamampis, shumaq chaskishqaqa rikäyanqam Jehovapa markanchö alläpa kuyanakonqantsikta y huknölla kanqantsiktapis (Sal. 133:1).
2. Jesuspa Wanïnin Yarpëman, Bibliapita yachakïkaqkuna shayämuptin, ¿imanöraq yanapashwan?
2 Bibliapita yachakïkaqkuna: Wakin shamoqkuna Bibliapita tsëraq yachakur qallashqa kayaptenqa, allichi reqitsinkiman wawqi panikunata, reunionnintsik imanö kanqanta willarinkiman, y Ëllukäna Wayipapis puriratsinkimanmi. Hinamampis discursochömi wiyayanqa Jehovapita yachakïta mana haqiyänampaq, y tsë willapäkayämonqampitaqa allichi parlapärishwan shamoqkunata.
3. Reuniontawan willapäkïta haqishqakuna, Jesuspa Wanïnin Yarpëman shayämuptenqa, ¿imanöraq yanapashwan?
3 Reuniontawan willapäkïta haqishqakuna: Jesuspa Wanïnin Yarpëmanqa, hina shayämonqam reuniontawan willapäkïta haqishqakunapis. ¿Imanirtaq witïkurnin shumaq saludarintsiktsu? Parlaparpis, manam penqakatsishwantsu ni llutaqa tapupashwantsu. Jesuspa Wanïnin Yarpëman shayämuptenqa ancianokunam watukayanqa, y shayämonqampitam shumaq kushi kushi parlapäyanqa, hina yarpätsiyanqam wakin reunionkunapaqpis.
4. ¿Imanötaq yanapashwan Jesuspa Wanïnin Yarpëman shamoqkunata?
4 Visitamaqnintsikkuna: Itsa shayämonqa wakin reqinakonqantsik, kastantsikkuna, o willapäkonqantsikcho invitacionta chaskimaqnintsikkunapis. Mana imëpis shamushqakunata rikarnin, ¿imanirtaq witipärir shumaq parlapärintsiktsu? Itsa kananraq shamïkäyan. Parlapärishqaqa itsa niramäshun mëcho täranqanta y imanö tarinapaqpis, tsënöpanam visitarishun o telëfonopa qayarishun Jesuspa Wanïnin Yarpë pasariptin, y munaptenqa Bibliapita yachatsinapaq.
5. ¿Imanöraq estudio Biblicota qallashwan?
5 Wiyakïta munaqkunaman kutishqaqa, discursocho wiyakonqantsikmi yanapamäshun Enseña librowan yachatsir qallanapaq. Discursaqmi leiramonqa Isaías 65:21-23 textokunata. Itsa kë textopita parlapärirnin kënö willapärishwan: “Yacharatsishqëki, Jesus wanonqampita wakin bendicionkunata tarinapaq kaqta”. Tsënam pëta yacharatsishwan Enseña libropa 4 y 5 kaq päginankunata. Hina kënömi willapärishwan: “Imëraq kë llapan chäkamonqa, nishpam wakinkunaqa tapukuyan”, tsëpitanam rikäratsishwan 9 kaq capïtulopa, 1 al 3 pärrafonkunata. O discursaq nimonqampita parlapärirmi, Enseña librota rikäratsishwan y yacharatsishwan imanö yachakuna kanqantapis.
6. ¿Imakunatayanraq rurashun Jesuspa Wanïnin Yarpëcho?
6 Bibliapita yachakïkaqkunata, reuniontawan willapäkïta haqishqakunata, y Jesuspa Wanïnin Yarpëman shamoqkunata yanapanapaq, ama tiempota perdishuntsu (Luc. 22:19). Reinopaqrekur imatapis rurashqaqa Jehová bendecimäshunmi.