Huk alläpa hatun yachatsikïmi kanqa
1. Discursopita, ¿ima mastaq gustanqa Jesuspa Wanïnin Yarpëman shamoqkunata?
1 ¿Imë? Jesuspa Wanïnin Yarpë ampi. Tukïnöpam kallpachakurquntsik shayämunanrëkur pï më nunakunata invitanapaq. Shamoqkunataqa manam wiyakuyanqanllatsu gustanan, hina rikäyanqampis gustanantam munantsik. Jesuspa Wanïnin Yarpëman ëwashqa warmim, llapampis alläpa kuyanakuyanqan, Yachatsikuyänan Wayi alläpa shumaq rurashqa y limpio kanqan y tsë llapanta kikinkunallapita shumaqta katsiyanqan alläpa gustanqanta nirqan. ¿Imatataq tsëpita yachakuntsik? Manam discursaqllatsu, sinöqa llapantsikmi yanapakunantsik Jesuspa Wanïnin Yarpëman shamoqkuna alli yachakuyänampaq (Efe. 4:16).
2. ¿Imanötaq shamoqkuna llapan rikäyanqanta gustayänampaq yanapakushwan?
2 Shamoqkunata shumaq chaskishun. Llapan shamoqkunata kushi kushilla “¿Imanöllataq këkanki?” nishqaqa alläpam kushikuyanqa (Juan 13:35). Llapanta mana saludëta puëderpis, lädïkichö këkaqkunataqa shumaq kuyëpam saludarinkiman (Heb. 13:1, 2). Rikachakurëkë yëkamoqkunata, pillapis mana ni pita reqiptinqa yanapanëkipaq. Itsa campaña witsan huk invitacionta chaskirqan. Tsëqa, kënö nirmi tapurinkiman: “¿Imëllapis shamushqanaku kanki?”. “Manam” nishuptikiqa, junto hamakuyë y imallatapis musyëta munarqa tapurishunëkipaq niri. Salonman huk congregación yëkunanrëkur congregacionniki raslla yarqunan kaptinqa, kënö nirmi tapurinkiman: “¿Ima nillankitaq? ¿Allinöku kashqa kanan yachatsikayämunqan? ¿Mëchöraq tareqman Diospa kaqpita yapë parlakurinapaq?”.
3. ¿Imanötaq chaskishwan unëna mana ëllukaqkunata y yachatsikoq manana yarqoqkunata?
3 Jehoväpa kaqchö qelanashqakunata shumaq chaskishun. Reunionkunaman manana shamoq y yachatsikoq manana yarqoq wawqikunawan panikuna, y Jesuspa Wanïnin Yarpëllaman cada wata shamoqkunapis mëraq chäyämunqa. Pëkunatapis shumaq chaskirishun, y yapë rikärinqantsikpita alläpa kushikunqantsikta musyatsishun (Rom. 15:7). Anciänokunapis tsë hunaqkunallam wayinkunaman watukarnin congregacionman yapë kutikayämunampaq animariyanman. Diosnintsikmanmi mañakuyä pï më shamoqkuna pëta alabëkuyänampaq, wiyakuyanqanllapitatsu, sinöqa “alli rurashqantsiccunata ricarnin[pis]” (1 Ped. 2:12).