Shumaq chaskishun
1. ¿Imëtaq imanö kanqantsikta rikätsikïta puëdishun, y imanir?
1 Jesus Wanunqanta Yarpëqa imanö kanqantsikta rikätsikunapaqmi kanqa. Kë wataqa chunka millonpitapis más nunakuna shayämunantam shuyarantsik salvamänantsikrëkur Jesus wanunqan ishkë más precisaq Diospa kuyakïninta rikätsikoq discursota wiyakuriyänampaq (Juan 3:16; 15:13). Jina Dios këta ruranqampita ima bendicionkunata chaskita puëdiyanqantam musyariyanqa (Is. 65:21-23). Pero manam discursamoqllatsu imanö kanqantsikta rikätsikamunqa. Sinöqa llapan publicadorkunam invitädokunata shumaq chaskir “allim ëwakayämurqunki” nishun (Rom. 15:7).
2. ¿Imanötaq invitädokunata shumaq sientikaratsishwan?
2 Reunión qallëkamunanta shuyaräkunantsikpa rantinqa, ¿imanirtaq lädontsikchö invitädokunata saludantsiktsu y jutintsikta willar parlapärintsiktsu? Quizá imanö kanampaq kaqta musyayantsu y tsënöpa mantsakur këkäyanman. Tsënö kaptinqa kushishqa saludarinqantsikmi shumaq sientikaratsinqa. Quizá invitacionta chaskishqa karlla shayämushqa. Musyanapaqqa quizá tapurishwan kananraq congregacionman shamunqanta o pillatapis reqinqanta. Noqantsikwan täkuyänampaqmi nishwan y Bibliantsiktawan canticontsiktam mañarishwan. Jesus Wanunqan Yarpëta salonchö rurarninqa, salontam alli reqiratsishwan. Discurso ushariptinnam imallatapis más musyëta munayanqanta tapurishwan. Juk congregación yëkamunampaq ras yarqunantsik kaptinqa quizá, “¿kënö yachatsikïkunata maslla musyëta munankimantsuraq?” nirnin mëchö täranqanta tapurishwan. Pëkunawan yapë parlanapaqmi tiempontsikta alli patsätsinantsik. Yachatsikïman manana yarqoq publicadorkuna shayämuptinqa anciänokunam pëkunapita altantolla këkäyanman yanapariyänampaq.
3. ¿Imanirtaq Jesus Wanunqan Yarpëman shamoq invitädokunata shumaq chaskinantsik precisan?
3 Invitädokunaqa këchömi rikäyanqa kushikïta, alli pasakïta y Diospa markanchö juknölla shumaq paraisochönöna kawakïkanqantsikta (Sal. 29:11; Is. 11:6-9; 65:13, 14). ¿Imataraq rikäyanqa congregacionnintsikman shamoqkunaqa? Alli chaskir kallpachakunqantsikpitam tsëqa kanqa.