¿Diospa Palabranta defendintsikku?
1 Kë mundocho Diospa Palabrampita mana allita parlayaptimpis, rasumpa cristianokunaqa Bibliata kuyarmi defendintsik. ‘Llapan qellqarëkaq Dios nenqanlla’ kanqanta musyarmi, Jesucristo nenqannö noqantsikpis nintsik: “Palabrëkiqa rasumpa kaqllam” (2 Tim. 3:16; Juan 17:17). Tsëqa, ¿imanötan alleq defendishwan Diospa Palabranta?
2 Yachakushun Bibliapa textonkunata: Jesusqa, Diospa Palabrampita alli yachakoqmi karqan. Tsëmi yachatsikoq Bibliapita llapan willapäkïnincho (Luc. 4:16-21; 24:44-46). ¿Imanötaq yarpashwan atska textokunata? Llapan hunaq Bibliata leirnin, y imanö kawënintsikcho o willapäkïnintsikcho yanapamanqantsikta yarpararnin. Reunionkunapaq preparakurnenqa ashinantsikmi mana qellqarëkaq textokunapa versiculonkunata, tsënöpa pensanapaq imanö comentanapaqpis. Reunionkunachöqa discursaq leimonqan textokunatam ashishwan. Bibliapa textonkunata alli yachakorqa, “allim inshishun rasumpa kaq palabrata” (2 Tim. 2:15).
3 Biblia parlatsun: Willapäkicho këkarqa, Bibliatam inshinantsik. Nunakuna wiyakoqno kayaptenqa, leirapushwan huk textotam. Tapupämashqa o mana wiyamänantsik-rëkur imatapis nimashqaqa, Bibliawanmi contestanantsik. Wayiyoqpa tiempom mana kaptenqa, hina Bibliapita yacharatsishwanmi kënö nishpa: “Ewkunäpaq kë textollata leiramushaq”. Wiyakita munayaptenqa, Bibliata rikätsir leipushun pëpis leir qatimänantsikpaq.
4 Huk nunata, Trinidadpaq Biblia mana yachatsikonqanta huk wawqi yacharatsiptinmi, tsë nuna nerqan: “Yurinqäpitam ewä iglesiaman y manam imëpis wiyashqatsu kä kënö Biblia yachatsikonqantaqa”. Tsënam kushishqa änerqan wawqiwan yachakita. Jesusqa nerqanmi üshankunaqa wiyayanmanshi kanaq pë qayaptin (Juan 10:16, 27). Alli shonquyoq nunakunaqa käyiyanqam rasumpa kaqta, kikin Bibliapita yachakur. Tsëmi, defendishun rasumpa kaq Diospa Palabranta.