¡Shumaqpa rikäshun Jehovapaq rurënintsikkunata!
1 Unëpitanam Jehová qoshqa llapan nunankunata tukïläya rurëkunata, ollquta, warmita, wambrata, awkinta, waktsata y kapoqyoqtapis (Luc. 1:41, 42; Hech. 7:46; Fili. 1:29). ¿Kanampis tsënöllatsuraq? ¿Ima rurëkunatataq Jehová qomantsik?
2 Wakin rurëkuna. Jehovaqa qomantsik shumaq yachatsikïnintam (Mat. 13:11, 15). Hinamampis reunioncho tapukäyämuptin, parlar alabanapaqmi permitimantsik (Sal. 35:18). Këta musyarmi kallpachakushwan reunionkunachö comentanapaq o imata ruranapaq nimashqapis, shumaq kushishqa ruranapaq. ¿Imëpis yanapakuntsikku Ëllukäna Wayita pitsapakurnin y altsapakurnin? Kë rurëkunapis Jehovata alabëllam.
3 Atska millón nunakuna mañakïninkunata Dios wiyanqanta mana musyayaptimpis, noqantsikqa musyantsikmi kikin Diosnintsik mañakushqa wiyamanqantsikta (Pro. 15:29). Kikin Jehovami rikëkan nunankunapa mañakïnintaqa (1 Ped. 3:12). Manam Jehovaqa ëka kuti mañakonqantsiktapis yupakïkantsu. Awmi, hatun qarëtam qomashqantsik “imëpis” mañakïkänapaq (Efe. 6:18.)
4 “Diospa uryaqninkuna.” Huk shumaq rurënintsikqa “Diospa uryaqnin” këmi, Reinopita alli noticiata willapäkïmi (1 Cor. 3:9). Kë rurëqa, kallpatam y alläpa kushikïtam qomantsik (Juan 4:34). Jehovaqa imëkatapis parlatsinmanmi karqan willapäkuyänampaq, kuyamarnintsikmi kë uryëta qomashqantsik (Luc. 19:39, 40). Tsënö kaptimpis manam llapan nunakunatatsu qoshqa kë rurëkunata, wayin wayin willapäkuyänampaqqa alleqraqmi Jehová nenqankunata yachakuyänan (Isa. 52:11). Tsëpenqa, ¿shumaqpaku rikantsik kë rurënintsikta?, ¿semanapaq horariontsikta rurarnenqa puntamanku churëkantsik?
5 Jehová qomanqantsik rurëkunaqa kawënintsiktam alliyätsin (Pro. 10:22). ¡Ama imëpis ichikllapaqqa churashuntsu! Rasumpa kuyanqantsikta rikätsikushun. Tsënöpam kushitsishun cielochö Teytantsikta, pëpitam shamun “llapan alli qokï y llapan alli qarë” (Sant. 1:17).