¿Precursor auxiliar kashwanku?
1. ¿Ima rurëtaraq churapukashwan septiembre killapita patsë?
1 Espiritual kaqcho winëta munarqa kallpachakushwanmi allikunata ruranapaq. ¿Septiembre killapita patsë churapukashqantsikku Jehovata alli servinapaq? Huk alli rurëqa kanman, huk o más killakunallapis precursor auxiliar këmi. Tsëpaqqa alli arreglokunatam rurashwan, y kananmi alli tiempo tsëta ruranapaq. ¿Imanir-raq tsë alli rurëman yarpakachashwan?
2. ¿Imanirtaq precursor auxiliar kashwan?
2 ¿Imanirtaq precursor auxiliar kashwan? Precursor auxiliar këqa yanapamantsik alli willapäkunapaq y cielochö Teytantsikta “más alleq” servinapaqmi (1 Tes. 4:1). Jehovapitaqa willapäkuntsik, noqantsikpaq llapan ruranqanman yarpakacharmi (Sal. 34:1, 2). Hinamampis willapäkunantsik-rekur sasa rurëkunachö kallpachakushqaqa, rikarëkämunmi y alläpam kushikun (Heb. 6:10). ¡Alläpam kushikuntsik llapan ruranqantsikpita Jehová kushikuptin! (1 Cró. 29:9.)
3, 4. ¿Ima allikunatataq tarintsik precursor auxiliar karnin?
3 Willapäkïman atska kuti yarqïmi, yanapamäshun shumaq y kushishqa willapäkunapaq. Tsëmi, atska kuti yarqorqa mantsakushuntsu wayikunaman charnin, shumaqmi parlashun y Bibliatapis alli inshitam yachakushun. Fënintsikpita más parlarnenqa masmi kushikushun. Estudio bíblico mana kapamashqaqa, itsa wakin wawqikunanöpis precursor auxiliar karnin estudiota tarishwan.
4 Precursor auxiliar karqa, willapäkurnin más kushishqam kashun. Huk wawqim precursor regular këninta haqirïkur, käyirerqan uryakïninllata puntaman churëkanqanta, y tsënam precursor auxiliar kanampaq churapukarqan. Pëmi nerqan: “Manam creirïraqtsu huk killallacho espiritual kaqcho más alli tikrarenqäta. Alli arreglokunatam rurarqä precursor auxiliar këta mana haqinäpaq, tsëpitanam precursor regular këman charqä.”
5. ¿Imataraq rurashwan willapäkïta mantsakorqa?
5 Imanöpapis kallpachakushun precursor kanapaq. Wakinkunaqa manam churapukäyantsu precursor kayänampaq, manam alleq willapäkïtaqa yachätsu nirnin. Tsënö pensarqa, yarpäshun Jehovami yanapamäshun. Tsënöllam Jehová yanaparqan Jeremiasta, y Moisestapis insherqanmi voluntadninta ruranampaq ‘mana parlëta yachëkaptin, wata qallu këkaptimpis’ (Jer. 1:6-10; Éxo. 4:10-12). Willapäkïta mantsakorqa, mañakushun Jehovata yanapamänantsikpaq.
6. ¿Imanöraq precursor kashwan qeshyapäkïkar o ima rurakïyoq këkarpis?
6 ¿Qeshyapäkurninku o tiempota mana tareqnö karku precursor këta munantsiktsu? Qeshyapäkïkarqa, itsa saludnintsik kanqanmanno kallpachakushwan precursor këta cumplinapaq. Hina alläpa rurakïyoq karqa, mana preciso kaqkunata itsa shamoq killapaqna haqirishwan. Estable uryakoq wawqikunanam, mañakuyan huk o ishkë hunaq vacacionta, precursor auxiliar kayänampaq (Col. 4:5).
7. ¿Imanir-raq precursor këpaq parlapashwan Jehovata?
7 Imanöraq precursor këman chashwan. Jehovata mañakurnenqa, willashwanmi willapäkunantsik-rëkur tukï rurëta munanqantsikta, y mañashwanmi kallpachakïkanqantsikta bendecimunampaq (Rom. 12:11, 12). Pëmi yanapamäshun alli arreglota ruranapaq (Sant. 1:5). Precursor këta mana munaqnö këkarqa, Jehovata mañakushun willapäkurnin kushishqa purinapaq (Luc. 10:1, 17).
8. ¿Imanöraq yanapamashwan Proverbios 15:22 nenqan, precursor auxiliar kanapaq?
8 Precursor auxiliar këta munanqantsikta familiantsikwan parlashun (Pro. 15:22). Itsa wayintsikcho mëqanllapis precursor këman chanman yanapanakushqaqa. Hina, congregacionchö wawqi panikunawan y noqantsikno pasëkaqkunawan parlashun rurëta munëkanqantsikkunapaq. Tsënö kaptenqa, itsa precursor këta atskaq munariyanman.
9. ¿Mëqan killakunataraq akrashwan precursor auxiliar kanapaq?
9 Alleq rikäshun septiembre killapita willapäkunantsik horariontsikta y rikäshun mëqan killash alli kanman. Estable uryarqa o estudiëkarqa, akrashwanmi feriadoyoq o pitsqa säbadoyoq y pitsqa domingoyoq killakunatapis. Alli käyirinapaq, septiembre, diciembre, marzo y agosto killakunam apayämun pitsqa säbadokunata y domingokunata. Mayo killachömi kapamäshun pitsqa sabadokuna y junio killachönam pitsqa domingokuna. Qeshyapäkoq karnenqa, ashishun alli tiempota mëqan killakunallachöpis. Hina akrashwanmi superintendente de circuito visitamanqantsik witsankunatapis. Tsënöpam precursor regularkunawan circuito ëllukaptin media hörallapis karishun. Hina shamoq watapaqqa, Jesuspa Wanïnin Yarpë ratamonqa 22 de marzom, tsëmi marzo, abril, mayo killakunapis alli kanqa precursor kanapaq. Mëqan killallatapis akrashqana karqa, huk alli horariotam rurashwan hörantsikta cumplinapaq.
10. ¿Imataraq rurashwan precursor këta mana puederqa?
10 Septiembre killapita patsë precursor auxiliar këman mana charpis, precursorkunanö willapäkïcho kallpachakushun. Tsënö llapan kawënintsikwan Jehovata servishqaqa kushikonqam (Gál. 6:4). Shumaq willapärishun, hina yanaparishun precursor kë munaqkunata. Rurakïnintsikchö arreglokunata rurashun llapan semanakunachö precursorkunata yanaqänapaq, yarqonqantsikkunapita huk hunaq masllapis.
11. Ushakë witsankunachö, ¿imanirtaq willapäkurnin kawashwan?
11 Ushakë witsankunachönam kawantsik, tsëmi ushashwan umpamanqantsikta: alli noticiapita willapäkïta. Nunakunapa kawëninmi peligrocho, y manam alläpa tiempo kannatsu (1 Cor. 7:29-31). Diosnintsikta y nuna mayintsikta kuyëmi, yanapamäshun alleq willapäkunapaq. Alli kallpachakur y shumaq arreglokunata rurarqa, atskaqmi precursor auxiliar këman chäshun huk killallapis septiembre killapita patsë.